¹ Phauri echiringisisa vatongi vevaJudha wakati: “Hama, inini ndakapona ndisina ndaa mumwoyo pamberi paMwari metsa kuguma zuva iri.” ² Zvino mupristi mukuru Ananiasi wakapanga avo vaiema pasinde pake kumupamhadza pamuromo. ³ Naapo Phauri wakati kwaari: “Mwari unozokupamhadza, iwewe rukumbati rwakachena! Unogara kunditonga ngeMipango, nokupanga kuti ndipamhadzwe ngenjira inopesana neMipango here?” ⁴ Naavo vaiema pasinde vakati: “Unotuka mupristi mukuru waMwari here?” ⁵ NaPhauri wakati: “Andizi kuzia, hama, kuti ndiye mupristi mukuru; ngokuti kwakanyorwa kuti: ‘Usazoereketa zvakashata ngomutongi wevanhu vako.’ ⁶ Asi apo Phauri paakaona kuti rupande rwavo rumwe rwaiya vaSadhusi norumweni rwaiya vaFarisi, wakadaidzira mumbungano: “Hama, inini ndiri muFarisi, mukororo wevaFarisi; ngendaa yokugonda kwokumuka kubva kwevakafa inini ndinotongwa.” ⁷ Naapo adaro, pakamuswa hasha pakati pevaFarisi nevaSadhusi; nembungano yakaguka ngepakati. ⁸ Ngokuti vaSadhusi vanoti akuna kumuka kwevakafa nokuti akuna ngirosi nokuti mweya; asi vaFarisi vanotenda zveshe. ⁹ Naapo kwakamuka bope guru; vamweni vevanyori vevaFarisi vakamiruka, vakaphikisa vechiti: “Ationi kushata kunouyu munhu. Pamweni mweya wakaereketa kwaari nokuti ngirosi?” ¹⁰ Naapo kwamuka kuphikisana kukurutu, nduna huru yemakumi emazana, yechitya kuti Phauri unozobvajurwa ndivo kuita zvigurwa, yakapanga varwi kuti vadzake vamubvuke ngesimba kubva kwavari, vamuise mumhatso yevarwi. ¹¹ Usiku hwaiteera Mambo wakaema pasinde pake akat: “Shinga! Ngokuti kudai ngezvewakaita chapupu ndini muJerusarema, ngokudaro kunosisira kuti uite chapupu muRomawo.” ¹² Zvino kwaedza, vaJudha vakapangana, vakadzisunga ngemhiko yokuti avazodyi nokuti kumwa metsa vauraya Phauri. ¹³ Naavo vakapangana iri zano vaipinda makumi marongomuna kuwanda. ¹⁴ Navo vakauya kunevapristi vakuru nevakuru vechiti: “Tadzisunga ngemhiko hurutu kuti, atizorairi chiro metsa tauraya Phauri. ¹⁵ Ndizvo zvino imwimwi pamwepo nevatongi ronzerai nduna huru yemakumi emazana kuti amudzase kwomuri, muite kudai ngevanoda kunasa kutsvakisisa ndaa yake. Isusu tinonga tanasirira kumuuraya asati aguma pano.” ¹⁶ Asi mwana womukunda waPhauri wakazwa ngendaa yokumuhwarira kwavo, naye wakaenda, akapotera mumhatso yevarwi, akaronzera Phauri. ¹⁷ NaPhauri wakadaidza kwaari imwe yenduna dzezana, akati, “Enda neiri jaha kunduna huru yemakumi emazana, ngokuti rinacho chiro chokumuronzera.” ¹⁸ Ndizvo yakaenda naro kunduna huru yemakumi emazana, yakati: “Phauri mubhanditi wakandidaidza kwaari, akakumbira kuti ndiunze iri jaha kwouri rinacho chokuronza kwouri.” ¹⁹ Nduna huru yemakumi emazana yakaribata ngenyara, ikaenda naro, ikaribvunza ngokufishika yechiti: “Chiinyi chounoda kundironzera?” ²⁰ Naro rakati: “VaJudha vatenderana kukukumbira kuti udzase Phauri mangwani kuvatongi vevaJudha, vechiita kudai ngevanoda kutsvakisisa chiro ndiye. ²¹ Ndizvo usazotenda kwavari; ngokuti vanozomuhwarira vanhu vanopinda makumi marongomuna, avo vadzisunga ngemhiko yokuti avazodyi nokuti kumwa metsa vamuuraya; zvino vanasirira, vechigarira chigondiso chinobva kwouri.” ²² Ndizvo nduna huru yemakumi emazana yakatendera kuti jaha riende, echiripangisisa kuti: “Usazoronzera munhu kuti waziisa izvi kwendiri.” ²³ Zvino wakadaidza kwaari nduna mbiri dzezana, akati: “Nasirirai varwi mazana mairi, vanogadha mahachi makumi manomwe, vane mikhondo mazana mairi, okuenda Sizaria ngeawa rechitatu rousiku. ²⁴ Munasire zvifuyo kuti mugadhise Phauri padera pazvo, mumugumise akangwaririka kunaFerikisi mutongi.”, ²⁵ Naye wakanyora tsamba ngendaa iyi echiti: ²⁶ “Kraudhiusi Rusiasi unomuchingamidza imwimwi mambo wakanasa kunaka Ferikisi. ²⁷ Uyu munhu wakabatwa ngevaJudha, waiya ooda kuurawa ndivo, apo ndakaguma kwavari nevarwi vehondo, ndakamuponesa, ndaiya ndazwa kuti muRoma. ²⁸ Ngokuti ndaida kuti ndizie ndaa yevakamuitira, ndamudzasa kuenda naye kuvatongi vavo vevaJudha. ²⁹ Ndakaona kuti wakaitirwa ndaa yemibvunzo yemipango yavo, asi waiya asina ndaa yaakaitirwa inosisira kuti aurawe nokuti asungwe., ³⁰ Naapo ndakaronzerwa inini kuti kunopanganwa zano rokuuraya uyu munhu, paripo ndakamutumira kwouri, ndechipangirazve avo vakamuitira ndaa kuti vaerekete kushaisha kwake pamberi pako.” ³¹ Ndizvo varwi, kudai ngezvevakapangwa, vakatora Phauri, vakamuunza usiku Antipatirisi. ³² Asi ngechimangwani vakasiya vanogadha mahachi kuti vaende naye, vakahwirira kumhatso yevarwi. ³³ Naavo vaguma Sizaria, vakapa tsamba kunomutongi, vakaunza Phauri pamberi pake. ³⁴ Naapo aidzidza, wakabvunza kuti waiya wenyika iri. Naapo azia kuti waiya weSirisia,, ³⁵ wakati: “Ndinozozwa ndaa yako, apo vaguma avo vanokuitira ndaa.” Wakapanga kuti angwarirwe mungome mwaHerodhi.