¹ Sure kweizvi Phauri wakabva Atenesi akaguma Khorinte. ² Naye wakaona munhu muJudha waizwi Akwira, waiya munhu wePontusi ngokubarwa, waiya achandoguma echibva Itaria, pamwepo nomukadzi wake Prisira, ngokuti Kraudhiusi waiya apanga kuti vaJudha veshe vabve muRoma. Phauri wakaenda kwavari. ³ Ngokuti iye waiya nomushando wakatodzana newavo, wakagara navo, vakashanda pamwepo; ngokuti mushando wavo waiya wokuruka matende. ⁴ Naye wakaphikisana navo vomumhatso yokudira mazuva eshe eSabatha, echida kutenderudza veshe vaJudha nevaGiriki. ⁵ Asi apo Sirasi naThimothi vaiya vauya vechibva Masedhonia, Phauri akabatika ngeizwi, wakapupura kuvaJudha kuti Jesu ndiye Kristu. ⁶ Vakati vaphikisa nokumutuka, iye wakaguwa bukuta kubva pane zvokusimira zvake, akati kwavari: “Ngazi yenyu ngaigare padera pemasoro enyu! Andina ndaa inini. Kubvira zvino ndinozoenda kune vemadzinza.” ⁷ Naye wakabvapo, akapotera mumhatso yomunhu waizwi Thitiusi Justusi, uwo waidira Mwari; mhatso yake yaiya pasinde pemhatso yokudira. ⁸ Krispusi, mukuru wemhatso yokudira, wakatenda Mambo nevemhatso yake yeshe; nevazhinji vevaKhorinte vakazwa Phauri, vakatenda, vakabhabhatidzwa. ⁹ Mambo wakati kunaPhauri muchioniso usiku: “Usatya, asi ereketa, usanyarara;, ¹⁰ ngokuti inini ndinewe, akuna munhu unozokumukira kukuremadza; ngokuti ndine vanhu vakawanda mudhorobha iri.” ¹¹ Naye wakagarapo gore nomwedzi mitanhatu, echidzidzisa izwi raMwari pakati pavo. ¹² Asi apo Gario aita mutongi mukuru weAkhaiya, vaJudha vakamukira Phauri ngechisungo chimwe, vakamuunza pamberi pechigaro chokutonga. ¹³ vechiti: “Uyu munhu unopausa vanhu kuti vadire Mwari ngenjira inopesana neMipango.” ¹⁴ Apo Phauri ooda kubeura muromo wake kuereketa, Gario wakati kuvaJudha: “Kudai yaiya ndaa yokushata nokuti yokumukira, imwimwi vaJudha, ndaisisira kuti ndisengerere kwomuri. ¹⁵ Asi kudai iri ndaa yemibvunzo yemazwi neyemazina neyemipango yenyu, dzionerei pachenyu imwimwi; andidi kuita mutongi wendaa dzakadaro.” ¹⁶ Naye wakavadzinga kubva pachigaro chokutonga. ¹⁷ Navo veshe vakabata Sosithenesi, mukuru wemhatso yokudira, vakamurova pamberi pechigaro chokutonga. NaGario aazi kutambudzika ngechimwe cheizvi. ¹⁸ Naapo Phauri agarapo mazuva mazhinji, wakavhaisa vatendi, akahamba ngengarava kubva apo kuenda Siria, echiperekedzwa ndiPrisira naAkwira; muKhenikeria wakaparwa soro rake, ngokuti waiya akapika mhiko. ¹⁹ Naapo aguma paEfesu, wakavasiyapo; asi Phauri pachake wakapotera mumhatso yokudira, akaereketa nevaJudha. ²⁰ Naapo vakakumbira kuti agare navo mukuwo wakapinda kureba, aazi kutenda. ²¹ Asi wakavavhaisa echiti: “Ndinozouyazve kwomuri, kudai Mwari echitenda,” wakahamba ngengarava kubva Efesu. ²² Naapo aguma Sizaria, wakakwira kuchingamidza chiara, wakadzaka kuenda Antiokhi. ²³ Agarapo mukuwo, wakabveyo, akahamba nyika yeGaratia neFrigia ngokuteererana, echigwinyisa vadzidzi veshe. ²⁴ Zvino muJudha waizwi Aporosi, muArekizandria ngokubarwa, waiya munhu waikona kuereketa zvakanaka, wakauya Efesu; naye waiya ngwazi muzvinyorwa. ²⁵ Uyu waiya akadzidziswa njira yaMambo; echipisha mumweya, wakanasa kuereketa nokudzidzisa ngendaa yaJesu, kunyazwi waizia ngorubhabhatidzo rwaJohani rwega. ²⁶ Wakatanga kuereketa ngokushinga mumhatso yokudira, asi apo Prisira naAkwira vamuzwa, vakamutora parutii, vakanasa kumududzira ngenjira yaMwari. ²⁷ Naapo echida kupinda kuenda Akhaiya, vatendi vakamugwinyisa, vakanyora tsamba kunevadzidzi kuti vamuashire. Naapo aguma, wakadetsera kakurutu avo vakatenda kubudikidza ngenyasha. ²⁸ Ngokuti wakanasa kunyisa vaJudha pamhene, echionisa ngezvakanyorwa kuti Jesu ndiye Kristu.