¹ A laka o Jisu i ulunivanua ni violive. ² I na qwataqwata caka ca a laka leqwa i were ni masu, a re sa laka coko mai na tamata, a no i ra qa vavulici kora. ³ O kora na vunivola qa na varisi a re mea mai a lia na vibulou a sobe ni dau vidrivati. A re qei vatuni koya i medra buto donu. ⁴ Re qei kwaya vua, daunivavuvuli, na vibulou kwe a sobe ni a vidrivati. ⁵ Ko kwe e i kwaya na lawa, o Mosese e i vakaroti keta me lei vakaviri i na vatu na mataqali tamata kwe; na yava re e kwaya, baletia koya?" ⁶ A re kwaya kwe me rewa ni re rewati koya me bau lia na kwa e re tavui ti koya ka, a koruva civo o Jisu qa volavola i na qwele i e titi ni lima. ⁷ I na gauna re togaya ga no ka ledra taro vua a dure i yata qa kwaya vuara." E i lia i va kem i tam valavala cakaca, me tia i matai ni tamata me virikia na vibulou kwe." ⁸ A koruva civo leqwa, qa volavola i qwele e titi ni lima. ⁹ A re sa rogo kwe, re deidei yalia yati, taula sara ga mai vua e tuqwaqwa talia vuara. Sa qei vo talia o no o Jisu, qa na vibulou ko a dure tu i buto donu. ¹⁰ Dure i yata o Jisu qa kwaya i vua,"Vibulou, i vei ni kora na tavui tiko no?. A lala lia a kwai iko vaka ca?". ¹¹ A kwaya ," A lala lia momo,"A kwaya o Jisu, O au muni qi tam kwai iko vakaca. Laka qo kua ni valavala cakaca leqwa." ¹² A qei tata leqwa i vuara o Jisu qa kwaya, "O au na cece ni vuravura kwe; o koya i takuci au i na tam laka i na gigilo, i na tau vua na cece ni cola" ¹³ Re kwaya na varisi vua, "O iko e tia i vadudu vataki ni iko; na lem i vadudu i tam du." ¹⁴ Saumia o Jisu qa kwaya i vuara,"I vitalia qi vadududtaki ni au boto, na lequ i vadudu, i du ga qi kilatia na vunua qu laka mai ka qa na vanua qi laka tovo ka, o vatikem o ba tam kilatia re na vanua qu laka no mai ka qa na vanua qi laka tovo ka. ¹⁵ Ba dau didiloi i na rairai, o au qi tam valewa i lia. ¹⁶ Ia ma ga qi vatulewa na lequ lewa i du do tam ni au talia, o au qa Vava o koya a vatalai au mai. ¹⁷ Io, i na vatilemam lawa i volai, na i tukutuku ga ni rua na tamata i du. ¹⁸ O au qi tia i vadudu baleti au, qa o Vava o koya a vatalati au mai, e i tia i vadudu baleti au" ¹⁹ Re kwaya vua," I vei tio tamam?" Saumia o Jisu ," O ba tam kilati au du se o tamai au; Maga o ba ke kilati au o ba na ke kilati tamai au muni." ²⁰ A kwaya na tata raki kwe i na vanua i dau maroroi ka na i yau i na were ni masu ni vakavuli vali, a lala lia a sobeti koya do na lea yauwa si tam laka no mai. ²¹ A kwaya leqwa vuara," Qi sa laka dei kwe; o ba na vadani au qo ba na mate i na vatilem i valavala cakaca. Na vanua qi laka ka , o ba na tam rewa ni laka ka." ²² Re kwaya na Jiu," I na vamate ni koya? A ma kwaya ka," Na vanua qi laka ka o ba na tam rewa ni laka ka?" ²³ A kwaya vuara o Jisu ," O vatikem i ra kwe; o au mai yata. O vatikem o ba va vuravura; o au qi tam va vuravura. ²⁴ Qu sa kwaya so kwe, ni o ba na mate boto i na vatilem i valavala caka ca. Vakavo ga mo ba vabautia ni o au, o ba na mate i na vatilem i valavala cakaca" ²⁵ A re qei kwaya sara i vua, " O ei o iko?" Kwaya o Jisu vuara, "Na yava re qu vece i va vatikem mai na kea i tautau la. ²⁶ I tau no i va au i bi na kwa mequ kwaya qa diloi ti vatikem ka. Ia so kwe, o koya a vatalati au mai e i du; qa na vikwa qu varogo mai vua, qu sa kwaya i vuravura." ²⁷ A re tam kilatia ni vecera no na kwa baleti tamaya. ²⁸ A vecera o Jisu," I na gauna o ba na lavetia ka i yata na luve ni tamata, o ba na qei kilatia ka ni o au boto, ni qu tara e lala lia na kwa e i baleti au. O Vava a vavulici au me kwayana vikwa kwe. ²⁹ O koya a vatalati au mai ei no qai au, qa tam dei ni au mequ no talia tu, ni qu dau tara ga na kwa ei donu vua. ³⁰ Ni kwaya no o Jisu na vikwa kwe, re sa bi sara ga na vabauti koya. ³¹ A qei vecera na Jiu ko re sa vabauti koya o Jisu , "Maga o ba sa nodoki ga no i na lea tata, o ba na leqi au tisaiveli du sara ga. ³² O ba na kilatia na du ga kwe i na sereki vatikem mo ba vagwalala. ³³ A re saumia vua," Vatikemam na kawa i Eparama qa ba tam tia tamata bobula vua i lia, mo rewa ni kwaya vakayava, " Ni o ba na rewa ni vagwalalataki?" ³⁴ Saumia vuara o Jisu," Ei du sara, e i du sara me qu vecei vatikem, i lia ga i tara na i valavala caka ca e i bobula i na caka ca. ³⁵ Na bobula e i tam nodoki vakalia ga no i were, o luvea ga i no vakalia no. ³⁶ O koya sokwe, maga i ba sereki vatikem o luvea o ba na vagwalalataki sara ga vakalia. ³⁷ Qi kilatia no ni o ba kawa i Eparama; ba sagatia mo ba vamatei au, do a lala tu va vatikem na lequ tata. ³⁸ Qi dau kwaya na kwa qu dania mai va tamai vatimem" ³⁹ Re saumia qa re kwaya vua," O tamai vatimem o Eparama" Kwaya vuara o Jisu," Maga o ba na ke tara na cakacaka lei Eparama. ⁴⁰ Ko kwe, o ba sagatia mo ba vamate ni au, o au qi kwaya no va vatikem na du ni qu rogo mai na Kalou. O E parama a tam tara kwe. ⁴¹ O ba tara na cakacaka lei tamai vatimem." Re kwaya i vua," A ba tam sucu i na dauyalewa; e i lia o tamai vatimemam; Na Kalou". ⁴² Kwaya o Jisu vuara, maga i tamai vatimem na Kalou, o ba na ke lomani au, ni qu laka mai vua na Kalou, sa ni au kwe; qu tam laka mai vataki ni au ga o vatala ti au mai. ⁴³ Na yava o ba tam kilatia ka na kwa qi kwaya no? E i baletia ni o ba tam mata rogo na lequ tata. ⁴⁴ Na vatilem vava na nitu, qo ba vinatia mo ba tara na gagadre lei tamai vatimem, Okoya na daulaba mai na tautaula qa tam dure tu i na du baletia e i lala na du i vua. Ni kwaya i lia na cori, e i kwaya mai na lea i tutu baletia e i coricori kalawa, qa ledra Vava muni na coricori. ⁴⁵ Ia, ni du dau kwaya na kwa du, qo ba tam vabauti au. ⁴⁶ O e i vatikem e vadania ni qu i valavala caka ca. Ni qu kwaya na kwa du, na yava ba tam vabauti au no ka?. ⁴⁷ O koya ga sa lea na Kalou e i varogo na tata ni Kalou; o ba na tam rogo ga ni o ba tam lea na Kalou. ⁴⁸ Re saumia na Jiu qa re kwaya i vua," I ba tam kwaya du no ni o iko na koi Samaria qa lia no lem nitu?" ⁴⁹ Saumia o Jisu," E i tam lia no lequ nitu, qi vakarokorokotaki ni Tamai au, o vatikem o ba tam varokorokotaki ni au. ⁵⁰ Qi tam vinatia me qu lai qoroi; ei lia ei tola no qa vatulewa no. ⁵¹ E i du, ei du, qi kwaya va vatikem, maga ei lia i maroroya lequ tata, i na tam dania rewa na mate" ⁵² Re kwaya vua na Jiu," Ba sa kilatia kwe sa lia lem nitu. O Eparama qa ra na Varovita re sa mate a kwaya," Maga e i lia i maroroya lequ tata, i na tam tovele rewa na mate." ⁵³ O iko e tam tetelagi mai va tamai memam o Eparama a sa mate , qa ni iko? Ko ra muni na Varovita re sa mate. O e i o iko mo tarai iko me ni ei?" ⁵⁴ Saumia o Jisu ," Maga qi vacerecerei au na lequ vacerecerei i tam yaga; o tamai au ga koi vacerecerei au-ko ba kwaya no me vatilem Kalou. ⁵⁵ O vatikem o ba tam kilati koya, o au qi kilati koya. Maga qi kwaya," Qi tam kilati koya,' Qi na wetai muni o iko, na cori. Ia , qi kilati koya qa maroroya lea tata. ⁵⁶ Vatilem Vava o Eparama i gadre i tolavia na lequ siga; sa ligocia oti qa sa gadre. ⁵⁷ A re sa vece na Jiu i vua," O iko e si bere ni yabaki limasagavulu ka lima, qa o sa ligoci Eparama?" ⁵⁸ Sa vecera o Jisu," I du, i du, qi sa kwaya i va vatikem, a si bere ka o Eparama, o Au." ⁵⁹ Qa re sa tomia na vatu me re vaviriki koya ka, ia sa qei vunitaki ni koya qa laka dei mai na buto ni were ni lotu.