¹ Paulusi na Timotea, a ngamba wa Kilesite Jesu , ko wahe anu a Nyambi owakenu mwa Kilesite Jesu awali mufilipi, na endishi oma keleke nawa ana wa kwasha. ² Shihemo shikale nenu no kuliyala kutunda kwa Nyambi Tata wetu no ku kwa Fumu Jesu Kilesite. ³ Nakandelela kwa Nyambi shikati shoshihe na mivuluka, ⁴ Popahe, mukumilombelela kwange mwahe, na nyanyukanga mwilombelo yange ⁵ mukonda omo munalikwatishela kuamba liywi lya Nyambi kutatekela liyuwa lyo matatekelo kuleta pano tuli. ⁶ Nina kulupela eci eyi enu yoihe, eci oyu natateka ekwama yoiwa okokukwenu henge akuimanenena kupitela liyuwa lya Jesu Kilesite. ⁷ Naloela kuliyuva nawa kukwenu mwaheno mukonda nilineno mu mucima wange. Mwahe munaliwana nange mushihemo momuhe no mukamenga no mukwimanena no kutanalisha liywi lya Nyambi. ⁸ Mukonda Nyambi yoliyo paki wange, omu nina himena ko shihemo sha Kilesite Jesu. ⁹ Unone eshi sholiyo shilombelo shange: Eci shihemo shenu shikule nene mu kylimuka no mukuyuvishisha kokuhe ¹⁰ eci wangu mulimuke yoiwa yoihe, kalo ci henge mutawa eci kamu shomololiwa kupitela muliyuwa lya Kilesite, ¹¹ ko munayala oshuka oku kena ou utunda kwa Jesu Kilesite kukutethzima no kushangala Nyambi. ¹² Apange, nafota eci mulimuke, eci ei inakwamahala kukwange ina kwathsa shemwa kukulisha liywi lya Nyambi. ¹³ Eyo ina lele eci, kuangiwela kwange ya Kilesite ina keye pohuma kwa kunyunga shikun'a no kumunu yomuhe. ¹⁴ Ongi wa pange ana wana kutanalishiwa nene kwa Fumu mukonda okwangiwa kwange, ne ali no ndume okupila wowa o kuamba liywi. ¹⁵ Amweya shemwa amba Kilesite mukuni yuvela shipululu no likan'i, kalo amweya amba yenji ko micima thzo thziwa. ¹⁶ Omanyima aikwama ko shihemo, kwana limuka eci nina pakiwa muno eci ni lwela liywi lya Nyambi. ¹⁷ Unone awatangile kuamba ya Kilesite ko lipome, kai ambile nawa. Hime ayala eci henge ani nyandisha konina angiwa. ¹⁸ Ine honi? kuninga eci makun'wa oahe- nji ko maheta heta nji ko shemwa- ya Kilesite ya fundishiwa, ne nanyanyuka. Ee, kalo henge na kunyanyuka, ¹⁹ mukonda nina limuka eci henge ya kuleta ci ni angululiwe ke lombelo yenu no okwathsi o mupepo wa Jesu Kilesite. ²⁰ Nina talelela nene no kukulupela eci kana ku enishiwa, unone muunu wange, pano no shikati shoshihe, Kilesite henge a akala kukwange, mukuyoya nji na kufa. ²¹ Mukonda kuyoya kwange Kilesite no kufa lufumo. ²² Unone ngeci po amepo myoya munyama, eyi ya amba eci ekwama yange ina paka oshuka. Honi wangu ni hangule ipi? Kani limuka. ²³ Mukonda nina kwatiwa kweinu ili. Nafota eci nga nina funo kakala na Kilesite, yoliyo yoiwa nene, ²⁴ honi kuyoya munyama iwawa nene mukonda ikenu. ²⁵ Natawa kengeyo eci, nalimuka eci henge nakuyoya no kwikala nenu mahe, kumikwathsa mukuloisha no mushinyanyu no mushitawo, ²⁶ eci kukwange muwane yo kulishangala nayo kwa Jesu Kilesite ou na kukeya kalo. ²⁷ Mulinyunge pohuma mwa shinda nawa eci muloele kutambula evengeli thza Kilesite, eci shinga konina keye kuna mimona nji ko nina piliko, nafota eci niyuve eci, munemana kokutanala mu mupepo ofoci, no maayalo ofoci ko mueleko kutanalisha pofoci shitawo sho liywi lya Nyambi. ²⁸ Mwa yapa akwethzimbo yenu mwinu ipi no ipi. Eyi po yamonisha kuwa ko, no ku yoishiwa kwenu- ne kwa tunda kwa Nyambi. ²⁹ Mukonda ya kumipa kenge pakukwamene Kilesite kali kulitawa pohuma kukwenji, unone pa kunyanda kolivaka lyenji, ³⁰ kuli kwatisha nenji mumvo ethzi muna mono kukwange, nethzi muyuva kukwange.