¹ Popo wahe mafumu o Maamori oku wiko wa Jordani, no mafumu o Makanana, awa na tungu ku nyonga thzo likululwale, nayuvu echi shinda sha moyo po onakukutisha meyu a Jordani kupitela anu o isilaele na yavukela muthsambwa, michima thzoo a athzopo thzilea nene, kalo kanakukala mupepo kukwoo mukonda ko anu a isilaele. ² Mushikati esho Shinda sha moyo ayepo amba kwa Joshuwa, ''ofule ma moko kalo otwale ana oa kwelume o isilaele wahe ku mukanda.'' ³ Ne Joshuwa ayepo lifulela mamoko aye shinda no kutwala ana a isilaele oa kwelume wahe ku mukanda ku Gibeati Haaraloti. ⁴ Eli lyo liyo livaka Joshuwa nawa twalela ku mukanda: Wahe akwelume awa natundu ku Egepita, pofochi na akwelume omvo, na fela mumbulwakukutu kwali mulikun'wa, kwa tunda ku Egepita. ⁵ Shianga echi akwelume wahe awa natundu ku Egepita nathzi ku mukanda,shianga kengeyo, kwithsa kwa nuke owa kwelume awa nelekela mumbulwakukutu mulikun'wa ku tunda ku Egepita awa nathzi ku mukanda. ⁶ Mukonda anu o isilaele na ende myaka makumi ane mumbulwakukutu kupitela anu wahe, wahe akwelume omvo awa natundu ku Egepita, nafu mukonda kana kuteka liywi lya Shinda sha moyo. Shinda sha moyo na lyethze ku kwoo echi kakuwa tawethza kumona litunga liya na lyethze kwa a kukuwo echi kenga akulitupa, litunga lyo mahwe no oki. ⁷ Woliyo ano na kulisha Shinda sha moyo mu shivaka shoo shiya Joshuwa nawa twalela ku mukanda, mukonda kanathzi ku mukanda kwali mulikun'wa. ⁸ Apa na mana kuwatwala ku mukanda wahe, kuma nakala pa shilombo kupitela apa napolela. ⁹ Ne Shinda sha moyo ayepo amba kwa Joshuwa, ''Lino liyuwa ina thzingulukisha shoshimango sha ka Egepita kutunda kukwoe.'' Ne, lithzina lyo shiya shivaka alyopo likala Giligali kuleta no pano tuamba. ¹⁰ Anu a Isilaele awopo aumba shilombo ku Giligali. awopo atuleka paseka mu liyuwa lyo likumi no mayuwa ane o mungonda, kulungulo, mu maanda a Jeriko. ¹¹ Muliyuwa lyo munyima thzo paseka, mwelyo liyuwa mwene elyo, awopo alya kuilya yomo mulitunga, makende okukana kuthza mamene no oheke o kupona. ¹² Maana aopo apwa munyima thzo liyuwa lyo kulya kuilya yokutunda omo mulitunga.Kanakukala kalo maana kwa anu o Isilaele, unone awopo alya ilya yo kutunda omo mulitunga lya kanana owo mwaka. ¹³ Apa Joshuwa akalile po pepi na Jeriko, ayepo thsikula meho enji no kukenga, ne ngamumone, mukwelume onemana posho thzenji; ona homona mwele wenji mundalo no ku ukwatelela mulyoko lyenji. Joshuwa ayepo thza kukwenji no kuamba echi, ''owe owetu inji o shitothzi shetu?" ¹⁴ Ayepo tawa echi, ''lyombo. mukonda no mutumini wo mashwalale a Shinda sha moyo.Ne nineya.'' Ne Joshuwa ayepo wela pashi kutanekelisha lupala lwenji pashi kulombela no kuamba kukwenji echi, ''iné eyi aamba náthsile wange kwa mupika wenji?'' ¹⁵ Mukakutumina mashwalale a Shinda sha moyo ayepo amba kwa Joshuwa echi, ''otundishe makatulo oe ku maulu oe, mukonda shivaka eshi onemana po shikenu.'' Joshuwa ayepo kwama hengeyo.