¹ Amwiye honi, amwe a fumanyi, mucile n kuleta mukonda kolikando likeya kukwenu. ² Lufumo lwenu lunolo, no ivata yenu ina liwa ku menje. ³ Gauda no shilivela wenu shinapiluka n'alawe nen'alawe thzo thza kukale opaki oku mialukela akulye nyama weci mulilo. Munongomeka lufumo lwenu mu mayuwa okuhula. ⁴ Mumone, mali a na mutuleka kutunda kwa kukwama alila no kumi alukela. Kulila kwa ka kuyanga kuna kakuma mu matwi a Fumu wo nvo. ⁵ Muna yoyo no thsenga pashi no litota yamwe ashinda. muna nunisha micima thzenu muliyuwa lyo kupaa. ⁶ Muna atula no kupaa munu okupila mulandu. Ka kanine kukwenu. ⁷ Mutatiele, ne, apange, kupitela kukeya kwa Fumu. Mumone mukwa kulima eli ana tatelelanga oshuka wo makomwa kutunda mumuve ne nathzi tateela, kupitela apa thzitambula mvula omatatekelo no kuhula. ⁸ Namwe, kengeyo, mutatiele. Mukolopishe micima thzenu mukonda kukeya kwa Fumu kuli popepi. ⁹ Mwavilaela, apange, mwa lyalukela munu na muenjenji, ci mwa kuatuliwe. Mumone, muatuli onemana pashelo. ¹⁰ Muende mulikun'wa, apange, kutundu ku likando no mucima wo uthzungi wa apolofita, awo a amba mulithzina lya Fumu. ¹¹ Mumone, twa wa amba ci ano fiyauthzi ana twesha kulitanalisha. Munayuvu yo kulitanalisha kwa Jobo, ne mwa limuka maayalo aFumu, eli ali no shiemo no n'eke. ¹² Kutunda kweyo, apange, mwa ethza, shaanga ko liwilu nji ko pashi, nji kuethza kumweya, unone, mushiye "Ee" akale "Ee" ne "Kukana kwenu" kukale okukana okukana," ne kamwa kuwela muku atuliwa. ¹³ Eci kali yumweya kukwenu oyu nyanda nene? Mu mushiye alombele. Eci kwali yumweya oyu na nyanyuka? Mu mushiye ashangala mukwimba. ¹⁴ Eci kwali yumweya kukwenu oyu kola? Mu mushiye elishe akulu a chechi, ne muashiye amu lombelele. Mu ashiye amuweshe mathzi mulithzina lya Fumu. ¹⁵ Shilombelo sho shitawo kenge shipolisha muethzi, ne Fumu kenge amu yoisha. Ngeci ona kwama ivi, Nyambi kenge amukwatela. ¹⁶ Nehoni muli ambele ivi yenu ku munu na muenjenji no kuli lombelela munu kwa miuenjenji ci muyoishiwe. Shilombelo sho munu omuwa shikoo nene muikwama. ¹⁷ Elye nakala mukwelume ci atwe, ayepo lombela nene ci mvula akuloka, ne kana loka mulitunga mu myaka thziatu no maonda mutanu no ngonda thzo foci. ¹⁸ Nehoni elye ayepo lombela kalo. Liwilu alyopo lilokisha mvula, ne pashi popamena ushuka. ¹⁹ Apange, ngeci yumweya kukwenu ona tundu mu niti, yumweya a muhushe. ²⁰ Oya munu aloela kulimuka ci yomuhe oyu shiulula munu oshivi kutunda ku imango wenji kenge a muyoyisha kukufa ne kenge akuthsika omango wouhe