¹ Paulusi, muapositola wa Jesu Kilesite kokuhima kwa Nyambi, no ku kwa mwapetu Temotea, ² kun'olela anu a Nyambi owa kenu oawawa apetu kwa Jesu Kilesite awa ali ku Kolose. Shihemo shikale nenu, no kuliyala kutunda kwa Nyambi wetu, no kwa Fumu wetu Jesu Kilesite. ³ Twa kandelela kwa Nyambi, Tata wa fumu wetu Jesu Kilesite, kalo shikati shoshihe twa milombelelanga. ⁴ Natuyuvu yo kulitawa kwenu kwa Jesu Kilesite no shihemo shenu kwanu a Nyambi owakenu. ⁵ Mulineshi shihemo mukonda okukulupela ana mitulekela muliwilu. Mwatangile kuyuva yo shikulupelisho mu maywi oshemwa, mu evangeli, ⁶ ethzi nathzi keye kukwenu. Ethzi evangeli thza ema oshuka no kuyala kkaye kokahe-eyi thzina kwama kukwenu muna ilimuka kutatekela muliyuwa mwa iyuvile no kulimuka shihemo sha Nyambi shemwa. ⁷ Ethzi po evangeli ethzi mwa lifundishile kwa Epafalasi, muenjetu ngamba oyu twahima.Oyu ngamba omuwawa wa Jesu Kilesite na twimamene. ⁸ Epafalasi natutongwela yo shihemo shenu mumupepo. ⁹ mukonda oshi shiemo kutunda eli liyuwa natuyuvu yenu kana tushii kumi lombela. Twa milombela eci mu limuke eyi ahima no nyanyami ouhe no myoyo oku yuvishisha, ¹⁰ eci muende mulikun'wa lya Fumu omu muna muloela. Kokwima oshuka mwikwa mayoihe yoiwa no kukala koku limuka Nyambi, ¹¹ Koku tanalishiwa kokolo ouhe, kuthza kokolo wenji okutethzima, eci mulithzue mumicima no kukala no ocikwato, kalo munyanyuke ¹² no kukandelela kwatata, oyu namitweshisha eci muwane shipashi mweyi akushwama ana Nyambi owakenu mumwethzi. ¹³ Natu amwena kukolo omilema no kutututwelela ku muvuthso wa mwanenji oyu ahima, ¹⁴ kentzi ana tuyoisha, no kututetela ku milandu thzetu. ¹⁵ Aye shikupulo sha Nyambi shimoniwa, mwana omweli kwiyumbiwa yoihe. ¹⁶ Kenthzi enu yoihe yombiwile, eyili mu mawilu neyi ili mukaye, eyi imonahala neyi ishimonahala. Mipepo thzo shokolo, nji mivuthso, akwa kuvuthsa, enu yoihe yakwamiwile mukonda wenji. ¹⁷ Aye yoliyo omatatekelo kwenu yoihe, kalo kenthzi enu yoihe ina liwana pofoci. ¹⁸ Yoliyo mutwi welema, keleke yoliyo matatekelo, mweli kwa kwa kufa wahe, eci akale mushivaka sho matatekelo kwinu yoihe. ¹⁹ Nyambi yowafotile eci enu yoihe ikale ku kwenji ko kuliyala, ²⁰ no ku husha kukwenji kka mwanenji enu yoihe yoshinda, Nyambi wa letile kuliyala ko nyinga o pa mbinda thzenji. Nyambi nalihushela enu yoihe yoshinda, kenu eyi ili muwilu nji mukaye. ²¹ Pa shikati shimweya shime mwakalile mwen da kwa Nyambi kalo neli mwa kwethzimbo yenji mwi eanekela no mwi ekwama yoimango. ²² Ambene honi nalihushu nenu kokufa mwilama, nakwama eyi eci amipe oukenu, okupila kapongonyi, no kukana kushomololiwa palupala lwenji, ²³ ngeci omutanalishe mu kulitawa kwenu, mushishe no kukolopa, eci katale munyanga-nyangishiwe kushi kulupelo sho evangeli ethzi na muyuvu, ethzi evangeli atongwelile munu no munu wo mbiwile mushi thzo liwilu, ethzi po evangeli ame no, Paulusi, nenekala no ngamba. ²⁴ Honi nina nyanyuka muma kando angekenu, kalo nuna yala mwilama eyi nani pili eyi nina wana milama ya Jesu ethzo keleke. ²⁵ Kethzi keleke no shikombwa, okombwa ou utunda kwa Nyambi ou anipile mukonda wenu, kuyalishelela liywi lya Nyambi. ²⁶ Aliyo maywi aholekelile anu kutunda kumatatekelo unohoni na tongwela kwana Nyambi owakenu. ²⁷ Neli kukwo oko Nyambi nafoto eci awatongwele yo lufumo loku tethzima mukaci ka anu kenge, aye Kilesite oyuli kukwenu, aye shikulupelo sho kutethzima. ²⁸ Twa mukuwelela, kukutulula no kufundisha munu yomuhe ko nyanyami ouhe eci wangu tutwale anu owawa kwa Kilesite. ²⁹ Keyi na kwama no kulitanalisha ko n'anyo kokwama no kolo.