¹ Yame Paulusi muapositoa wa Jesu ko kuhima kwa Nyambi, ko shikulupelisho sho mwoyo eshi shili kwa Jesu Kilesite, ² kwa Timotea, mwana oyu hemiwa: Shihemo, neke, no kuliyala kutunda kwa Nyambi Tata na Kilesite Jesu Fumu wetu ikale kukoe. ³ Nakandelela kwa Nyambi, oyu nikwamena kutunda kowa tata wetu okukale, no shihemo shokukena, nakuvulukanga shikati shoshuhe muilombelo yange mutanya no ushiku. ⁴ Konivuluka mihothzi thzoe, nafota kukumona ci niyale shinyanyu. ⁵ Ninavukuluka shitawo shoye shokuyala, eshi shakalile kwa nyakulyoe ombuyama Loisi no mamaoe Eunise, natawa ci no kukwoe koshli koshii. ⁶ Eshi sholiyo shileta ci nikuvulukishe ci opindule shipiwa ya Nyambi eshi shili kukoe ko kupakiwa moko ange. ⁷ Mukonda Nyambi kanatupa mupepo o wowa, unone onatupa mupepo o okolo, shihemo no kulithsingimeka. ⁸ Honi lelo wayuvela honyi upaki wa Fumu wetu, nji kuyuvela yame honyi, ame Paulusi, nili mukamenga mukonda wenji. Unone, mukale nenji mu makando o kunyandela evangeli kuthza ko okolo wa Nyambi, ⁹ oyu watushoyoyishili no kutuisha kokukena. Kuma akwamine ei, kali kuthza ko ekwama yetu, unone kuthza komu analoishela no shihemo shenji, eshi atupile ko Jesu Kilesite shikati koshishime kutateka. ¹⁰ Unohoni kuyoyisha kwa kunaletiwa ko kumonahala kwa mushoyishi wetu Kilesite Jesu, oyu wamanine lifu ko kuleta mwoyo no kukana kufa mu mwethzi ko evengeli. ¹¹ Mukonda wei, ninapiwa kuendisha, uapositola, no ufundishi kwa anu angana. ¹² Mukonda wei iamba, nayuvishwa kukola pei enu. Unone kaniyuvu honyi, mukonda namulimuka oyu ninalitawa kukwenji. Natawa ci atweshe kunitulekela ei ninapaka kukwenji kukakuma elyo liyuwa. ¹³ Omamele likun'wa lyo maywi oshemwa aa onayuvu kukwange, ko shitawo no shihemo ei ili kwa Kilesite Jesu. ¹⁴ Shinu shoshiwa eshi anapaka Nyambi kukoe, oshinyunge ko mupepo oukenu, ou uyoya kukwetu. ¹⁵ Walimuka ci, wahe awa ali mu Asia anayundu kukwange. kwao anu kuli Figelasi no Hemogenesi. ¹⁶ Fumu akale no shihemo kwaka njiyo thza Onesiforasi, pakunitulumwishanga ne kanayuvela honyi mawenge ange. ¹⁷ Unone, ou akalile mu Roma, kuma atanalile kunifota, ne ayepo kaniwana. ¹⁸ Fumu amutawethze kutambula shihemo apo liyuwa elyo. Momuhe omu anikwamenine mu Efese, owe walimuka shuwana.