¹ Yame, Paulusi, muapositola wa Jesu Kilesite kokuhima kwa Nyambi, no Timotea mwapetu, mu keleke thza Nyambi ethzi thzili mu Korinte, no ku anu wahe wo wakenu a Nyambi awo ali mulitunga lyo lihe lyo Akaya. ² Shihemo no ku liyala ikala nenu kutundelela kwa Nyambi tata wetu no Fumu wetu Jesu Kilesite. ³ Nyambi na Tata wetu wa Fumu wetu Jesu Kilesite ashangaliwe. Aye Tata wa shihemo shoshihe no Nyambi wa kuhenga hengiwa. ⁴ Nyambi oyu tuhenga-henga mu makando etu wo wahe, eci natwe tuhenga-hengiwe awo ali mu makando o wahe. Twahenga henga apetu mu kuhenga-hengiwa oku Nyambi ona tuhenga henga natwe. ⁵ Mukonda o makando a Kilesite awo tuli nawo, nehoni kuhenga hengiwa kwetu kuna vulu kupitela. ⁶ Unone ngeci tuli mukukwatela, kuli mu kuhenga hengiwa no ku yoyishisha kwetu; Kalo ngeci po tuna henga hengiwa, kuli muku henga hengiwa. Kuhenga hengiwa kwenu kwa kwamahala nene mu makando enu ao natwe tunyanda. ⁷ Kukulupela kwetu kukwenu kuna tanala, mukonda twalimuka eci natwe ou mulyeela makando, kenge mulyeela no kuhenga hengiwa kwetu. ⁸ Mukonda ka tuhimine eci mukane ku limuka, apetu, makando natukala nao mu Asia. Twa wanine ukalu nene kupitelela okolo wetu, nehoni twapwelelile no maano oku yoya. ⁹ Yashemwa, no kufa kwa kalile netu. Unone eci twali kulupela yatwe, unone tukulupele Nyambi, oyu wa pindukile aka kufa. ¹⁰ Wa tuyoyishile kukufa ko kumango, kalo kenge atu yoisha. Kukwenji koliyo tuna paka shikulupela shetu eci atuyoishe. ¹¹ Kenge akwama ei ou namwe mutukwa kwathsa muilombelo yenu. Nehoni o wangi kuitumela. mukonda o shipiwa shoshiwa shina piwa kukwetu kuthza muilombelo yo wangi ¹² Livaka eli lileta ci tuliyuve eli: Lizwalo lyetu lyaninga opaki eci tunaende mulitunga mu ukenu utunda kwa Nyambi, kali kuthza mu mano etu unone mushihemo sha Nyambi. ¹³ Yakwithsa na tun'olo ei mukwanga kutala no kuyuvishisha, kalo nalimuka eci kenge muiyuvishisha ¹⁴ ou mwa tuyuvishile mu mushivaka shimweya, eci mwa twesha kuliyuva muliyuwa lya Fumu Jesu, eci ou natwe tuliyuva kukwenu. ¹⁵ Mukonda nayangulukile nene mwei, nafotile kukuya kukwenu matatekelo, eci na mupiwe shipiwa shimweya. ¹⁶ Nafotile kupita kukwenu apa nathzile ku Methsodonia. Kalo nafotile kupita kukwenu ou na kahukile ku Methsodonia, no kalo eci yamwe muni fundule kuthza ku Judea. ¹⁷ Ouna ayalile ei, namonine eci na nyangupile nene? Nakwamine ei kuthza mu maano ange, eci ni ambe "Ee, ee" nji "kwithsa, kwithsa" pashikati shofoci? ¹⁸ Unone eci Nyambi oshemwa, maywi etu kukwenu kali "Ee" nji "kwithsa." ¹⁹ Mukonda mwana Nyambi, Jesu Kilesite, ou Salvano, Timotea name na tuamba, yenji kukwenu kali "Ee" nji "Kwithsa." Unone, shikati shoshihe "Ee." ²⁰ Mukonda yoihe ikupelisha ya Nyambi po "Ee" kukwenji. Nehoni kukwenji twa amba ci Amen" eci ashangaliwe Nyambi. ²¹ Nehoni Nyambi yoliyo otukolopisha namwe kwa Kilesite, nekalo ²² yoliyo kalo natuswaya namba thzenji no kutupa mupepo okunu mu micima thzetu eci shikale shikolopisha kwei ikeya. ²³ Unone naisha Nyambi eci akale paka wa moyo wange ci livaka elyo kana nikeya ku Korinte eci ni mivavalele. ²⁴ Kalici mukonda twafota ci tuendishe myoyo thzenu. Unone, natwe twa apenu mu makando mu kunyanyuka kwenu, ou muli mushitawo shenu.