¹ Honi eci ko ei yo shikati no myaka, apange, kamuloelile ci shime muin'oleliwe. ² Mukonda amwe mwashinda mwalimuka shuwana ci liyuwa lya Fumu lyakeya eci mwithzi ushiku. ³ Anu ou aku amba ci, ''Shihuno no kuliyala,'' popo mwene kuipishiwa poliyo pa kukeyela kukwo. Kenge kwakulipitula eci omu kunakeyelanga kukola ko kueleka koyu li no lila. Kwithsa omu akucilela. ⁴ Unone amwe, apange, kamuli mumilema ci eli liyuwa lyakumikeyele eci mwithzi. ⁵ Mukonda mwaheno mwaana o mwethzi no ana o mutanya. Kali twa ana o ushiku nji milema. ⁶ Nehoni, lelo twalala eci eli akwama anu wahe. Unone, tukenge no kutanala. ⁷ Mukonda awa analalanga alalanga ushiku, nawa anapendanga apendanga ushiku. ⁸ Unone amona twaka mutanya, tutanale no kuvata shitawo no shihemo ci ipiluke yo kucilisha kukuluka pa muili, ne tuvate tepa thzo kukulipela ku yoishiwa. ⁹ Mukonda Nyambi kanatuhangulela uanji, unone ci tuwane kuyoishiwa ko Fumu Jesu Kilesite, ¹⁰ oyu watufelelile, ci shanga ci twa kenga nji tunalala, ci tuyoye pofoci nenji. ¹¹ Honine mulitanalishe munu na mungenjenji no kuumba munu na mungenjenji, eci eli munakwamanga. ¹² Twamilomba nene, apange, mulimuke awa akwama mukaci kenu nawa amiendisha kwa Fumu nawa amituminina, ¹³ muwa kuteke nene ko shihemo mukonda o ekwama yo. Mukale mukuliyala mukaci kenu. ¹⁴ Twamilimukisha, apange: munangule awo abapa, mutanalishe akakukana kutanalisha, mukwathse awa akwanga, kalo mukale no mucima oule kwa anu wahe. ¹⁵ Mumone ci kwithsa okuhusha umango ku umango ku munu yomuhe. Unone, mufote uwa ku munu na mungenjenji no ku anu wahe. ¹⁶ Muloele shikati shoshihe. ¹⁷ Mulombele kokukana kushiya. ¹⁸ Mukandelele mu enu yoihe. Mukonda ei yoliyo ahima Nyambi ko Jesu Kiesite kukwenu. ¹⁹ Lelo mwathzima mupepo. ²⁰ Lelo mwashwaula ei amba a polofita. ²¹ Mueleke enu yoihe. Mukwate kutanalisha enu yoiwa. ²² Mutunde enu yoihe yoimango. ²³ Nymbi o shihemo amikenishe kumanenena. Enu yenu yoihe mupepo, moyo, no elama itulekiwe kokupila omango kutatelela kukeya kwa Fumu wetu Jesu Kilesite. ²⁴ Oli no shihemo oyu muiisha, yoliyo wakuikwama kalo. ²⁵ Apange, natwe mutulombelele. ²⁶ Muvumenene apetu wahe ko kulicuveta ko kukenu. ²⁷ Namituminina ko Fumu ci eli lin'olo mulibalele apetu wahe. ²⁸ Shihemo sha Fumu wetu Jesu Kilesite shikale nenu.