¹ Nehoni, apa tunakana kuyuba ei, twaayalile ci kuwa ci tushiyale munyima twafoci ku Atene. ² Tunatumu Timotea, mwapetu mupika Nyambi mu evangeli thza Kilesite, kunamitanalisha mu shitawo shenu, ³ ci kwawaniwa munu oyu nyenyengiwa ko ou ukalu. Mukonda amwe mwashinda mwalimuka ci ei yoliyo tunahanguleliwa kunakwama. ⁴ Shemwa, apa natukala nenu, shime twatangile kumiambela ci kenge tuingena mu ukalu, ne yakwamahalalile kengeyo, eci eli mulimuka. ⁵ Ne ko eli livaka, apa nakwangile kutanala omo mu ukalu, ninatumu munu ci nilimuke yo shitawo shenu. Nahimi ngwa mukakueleka onamieleka, ne ekwama yetu inathzi mukenge. ⁶ Unone Timotea onakeye kukwetu kutunda kukwenu onanatutongwela iamba yoiwa yo shitawo shenu no shihemo shenu. Onatutongwela ci mwatuvulukanga shuwana shikati shohsihe, ne kalo mwafota kutumona eci eli tufota kumimona natwetu. ⁷ Mukonda wei, apange, munatutanalisha mu ukakalu no likando lyetu mukonda o shitawo shenu. ⁸ Mukonda honi twayoya, ngeci mutanale kwa Fumu. ⁹ Mukonda kenge tukandelela ngepi kwa Nyambi mu livaka lyenu, ko shinyanyu tuli nasho kwa Nyambi livaka lyenu? ¹⁰ Ushiku no mutantanya twalombela nene ci tumone ihanga yenu no kumipa ei munapili mu shitawo shenu. ¹¹ Nyambi wetu aye Tata wetu, no Fumu wetu Jesu, akwame ci likun'wa lyetu ilkeya kukwenu. ¹² Fumu amikulishe mukulihima no kuhima anu wahe, eci eli tunakwamanga kukwenu. ¹³ Atanalishe micima thzenu ci thzakala no mulandu mukukena pa meho a Nyambi no Tata pa kukeya kwa Fumu Jesu no anu enji o kukena wahe.