¹ Paulusi, Siluvano no Timotea kun'olela ku keleke thzo ku Tesalonika kwa Tata no ku kwa Fumu Jesu Kilesite. Shihemo no kuliyala ikale nenu. (Mabuka amweya okale o Agelike anan'oliwa ci: ''Shihemo no kuliyala ikale nenu kutunda kwa Tata no Jesu Kilesite.'') ² Twakandelelanga kwa Nyambi ko amwe mwahe kotumivuluka kukwatelela mu ilombelo yetu. ³ Twavuluka pa meho a Nyambi no Tata wetu ekwama yenu yo shitawo, ekwama yenu yo shihemo, no kutanala ko shikulupelo eshi muli nasho kwa Fumu Jesu Kileste. ⁴ Apetu ahimiwa ko Nyambi, twalimuka ci onamihangula, ⁵ mukonda evangeli thzetu kuma nathzikeya kukwenu kali ko maywi pohuma, unone no mu okoko, mu mupepo oukenu, no mushikulupelo sho kutanala. Mulikun'wa lyofoci, namwe mwalimuka ci twa anu ongepi mukaci kenu mukonda wenu. ⁶ Kuma namupiluka aka kutamenena yatwe na Fumu ou nambula liywi mu makando oshokulu ko shinyanyu shitunda ku mupepo oukenu. ⁷ Ko elyo livaka munapiluka akakumonisha kwa anu wahe awa ali mu Masedonia no mu Akaya awa analitawa. ⁸ Mukonda kutundelela kukwenu liywi lya Fumu linayuvahala nene, kalo kali mu Masedonia no mu Akaya pohuma, unone shitawo shenu kwa Nyambi shinathzi mu matunga oahe. Honine katuloelile ci shime tushiambe. ⁹ Mukonda awo ashinda atongola yomu namututambulela mukaci kenu, nomu munahukela kwa Nyambi kutunda kukulombela athzimu kuhuka kukukwamena Nyambi oyu yoya no shemwa, ¹⁰ no kutateela Mwanenji kutunda kuwilu, oyu apindulile kwa afu- Jesu oyu tuamwena kuanji ukeya.