¹ Kwakalile mukwelume oku Ramataimi, oku Zofini, litunga lyo mikinya lyoku Efraimi; Lithzina yenji neli Elikana mwana Jerohami mwana Elihu mwana Tohu mwana Zufi, oku Efrata. ² Kuma ayekile ambuyama eli; lithzina lyoyu omutatekelo neli Anna, lithzina lyoyu omushili neli Penina. Penina kuma akalile na ana, unone Anna kakalile na ana. ³ Oyu mukwelume shime atundangile mu mbongi thzenji mwaka no mwaka kukalombela no kukakwama shitavelo sha Shinda sha moyo o mvo mu Shilo. Ana Eli owakwelume eli Hofini na Finehasi, mupulisita wa Shinda sha moyo, moliyo nakalanga. ⁴ Liyuwa apa nalikumanga ci Elikana akwame shitavelo mwaka no mwaka, shime napanga nyama yumweya kwa munu wenji Penina, noku kwa anenji wahe owakwelume nawa owambuyama. ⁵ Unone shime napanga Anna nyama okukwana anu eli, mukonda kuma nahimi Anna, Shanga ci shinda sha moyo kuma amuyumenine kueleka. ⁶ Mukalifuta lyenji kuma namushethzanga nene ci amuanjipishe, mukonda shinda sha moyo onamuyumena kueleka. ⁷ Honi mwaka no mwaka, apa nathzanga ku njiyo thza Shinda sha moyo naka njiyo thzenji, mukalifuta lyenji shime nakwatelelanga kumushethza. Honine kuma nalilanga no kukana kulya. ⁸ Elikana munu wenji kuma namuambelanga ci, ''Anna, ine o lila? Ine okanena kulya? Mucima oye ine unaanjipa?'' ⁹ Pa shikati shimweya, Anna ayepo katuka apa amanine kulya no kunwa mu shilo. Honi Eli kuma akalile pa shipula shenji kushelo thzo tempele thza Shinda sha moyo. ¹⁰ Kuma avilaelile nene; ayepo lombela kwa Shinda sha moyo no kulila nene. ¹¹ Ayepo liethza no kuamba ci, ''Shinda sha moyo o mvo, nga wataneka likando lya mupikoe no kunivuluka, ne wavulama mupikoe, unone ope mupikoe mwana o mukwelume, honine kenge nakumupa kwa Shanda sha moyo mayuwa enji o kuyoya oahe, ne kwithsa kavemba kakuthza ku mutwi wenji.'' ¹² Apa atalishile kulombela kengeyo kwa Shinda sha moyo, Eli ayepo nangula kanwa kenji. ¹³ Anna kuma ambile mu mucima wenji. Kanwa kenji kuma nakanyanganya, unone liywi lyenji kanaliyuvahala. Honine Eli ayepo anekela ci onapende. ¹⁴ Eli ayepo amba kukwenji, ''Kenge openda shikati shokukima papi? Veine oe thzikucinuke. ¹⁵ Anna ayepo tawa, ''Kwahi, n'athsile wange, no mbuyama oyu li no honyi mu mupepo. Kaninwine veine nji kunwa shinu shoshihe eshi shipendisha, unone namwaela moyo wange kwa Shinda sha moyo. ¹⁶ Lelo wamona mupikoe ci mbuyama okupila okwathsi; kuma ninaamba yo ukulu o ukalu wange no kushethziwa kwange.'' ¹⁷ Nehoni Eli ayepo tawa no kuamba ci, ''Othze konaliyala; Nyambi o Isilaele akupe eshi onamulombo.'' ¹⁸ Ayepo amba, ''Mupikoe awane kuvethzuka kukoe.'' Nehoni mbuyama ayepo lithzela no kukalya; lupala lwenji kanalumonahala kuvilaela honi. ¹⁹ Awopo apinduka mashikushiku no kuombela kwa shinda sha moyo, ne honi awopo ahuka kalo ku njio thzo ku Rama. Elikana ayepo limuka munu wenji Anna, ne Nyambi ayepo muvuluka. ²⁰ Shikati apa nashikumu, Anna ayepo kala no lila ne ayepo eleka mwana o mukwelume. Ayepo muta lithzina lyo Samuele, kuamba ci, ''Mukonda ninamulombo kwa Shinda sha moyo.'' ²¹ Kalo, Elikana naka njiyo thzenji awopo akanduka kukapa Shinda sha moyo shitavelo shenji sho mwaka no kukakula kuliethza kwenji. ²² Unone Anna kathzile; kuma ambelile munu wenji ci, ''Kanithzi kukakumena apa akuhumukela mwanuke; nehone kenge nakumuleta, ci akamonahale kwa Shinda sha moyo ne akakaleleko.'' ²³ Elikana munu wenji ayepo muambela ci, ''Okwame eshi omona ci shinaloo. Otatelele kukakumena apa wakumuhumunena; pohuma, Shinda sha moyo atanalishe liywi lyenji.'' Honi mbuyama ayepo shiyala kuyamwisha mwanenji kukakumena apa namuhumunena. ²⁴ Apa amuhumunine, ayepo mushimba, no kushimba poho o myaka thzihatu, no ushunga okuyala efa, no votela thzo veine, no kumuleta ku njiyo thza Shinda sha moyo mu Shilo. Mwanuke kushili omuonye. ²⁵ Awopo apaa poho, ne awopo aleta mwanuke kwa Eli. ²⁶ Ayepo amba, ''N'athsile wange! Eci eli oyoya, n'athsile wange, yame mbuyama oya waimanine pano kunyonga no noe kulombela kwa Shinda sha moyo. ²⁷ Oyu mwana yoliyo nalombelile ne Shinda sha moyo onanipa eshi nanimulombo. ²⁸ Ninamupa kwa Shinda sha moyo, mukuyoya kwenji kokuhe onapiwa kwa Shinda sha moyo.'' Nehoni ayepo lombela kwa shinda sha moyo omo.