¹ Kwathalele matangwa abali ku patheka na chiwano cha kubujula likende lya kwilika muthima. Bakulunu baka kulombela kuli Njimbi na baka Ku thoneka bakele na kutonda ngila mwa kumukwatela Yesu ngechi bamu thsihe. ² Mwafwa bakele na kwendeka ngwabo, "Keti ha thimbu wa chiwano, kwilike kukala mpindangano mu banu." ³ Hathimbu Yesu akele ku Mbetane munjubo ya Simona muka mbumba, thimbu akele nakulikotamena kumetha, kwethzile mukathzi na njaba ya alabasta yakele na mathzi andando yakama, akele mathzi a nanda. Wathsiyile ije njaba ya mathzi naku wetila ha mutwe wendi. ⁴ Oloni kwakele banu bamo balubalele. Bendekele mukati kabo ngwabo, "Bikajo nabihithila ngachije. ⁵ Awa mathzi athzimba anatelele kuwa landetha na bi mbongo byakutubakana ha bita bitatu, nakwa baka kuhutwa." ⁶ Oloje Yesu wendekele ngwendi, "Mwecheleni. Bikajo muli nakumupakethela, napanga chipangi chachibwa hali yange. ⁷ Baka kuhutwa mukala nabo thimbu yoshe, cho hathimbu yoshe imuna shaka munatha kubalingila byabibwa, oloje kumukakala nange thimbu yose. ⁸ Ikeye na lingi echi cha nalingi. Ikeye na bwahetha mubila wange kubwahethela ku thsinda. ⁹ Buthunga bene njendeka kuli yeni ngwange, kuje kwoshe ku bakambulula muthzimbu ou munakathzi bakachendeka, muku mwanukilamo." ¹⁰ Cho Yudasi Sakalyota, umo muli baje likumi na babali, waile kuli baka Kulombela babakulunu mangana akathe kubanayo. ¹¹ Omu baka kulombela babakulunu bachithzibile, ba bwahelelele na kumukulahetha kumwana bimbongo. Waputukile kutonda thimbu yaibwa ya kumwanenamo kuli bakebo. ¹² Hali tangwa lya bubanga lya likende lyakwilika muthima, omu balambwile manga wa Paseka, ba ndongethi bendi bendekele kuli ikeye, "Kuli una shaka tuye na kubwahetha, mangana ukalileko kulya cha Paseka?" ¹³ Cho watumine bandongethi bendi babali naku baleka ngwendi,"Yeni munganda, cho muka liwana na munalume nambata Njaba ya mema. Muka mukabe. ¹⁴ Oku akakobela munjubo, muka mukabe mukati na kwendeka kuli babenya ngweni, 'Mulongethi ngwendi. 'Njubo yange ya bungenthzi ili kuli omu njilila Paseka naba ndongethi bange?" ¹⁵ Cho amimwetha njubo yakama yahelu eyi bana longetha laja. Muka tubwahethelamo muje bene." ¹⁶ Baje bandongethi bakatukile na kuya munganda. Ba wanene byoshe ngwe muje wendekele, cho ba bwahethele kulya cha Paseka. ¹⁷ Omu chetele chingwethzi, wethzile na baje likumi na babali. ¹⁸ Hathimbu ba tumamene kumetha, na kulya, Yesu wendekele ngwendi, "Buthunga bene njendeka kuli yeni, umo weni yeni mulinakulya nange aka njenda bungungu." ¹⁹ Boshe bakele na buthiwa, cho umo na umo bendekelekuli ikeye ngwabo, "Buthunga bene kethi yange?" ²⁰ Yesu waba kumbulwile nakwendeka kuli bakebo, "Hali umo muba likumi na babali, ou bene ana kutanta likende hamo nange mu lilonga. ²¹ Mwafwa muna munu aya ngwe omu bana chithoneka hali ikeye. Oloni Lubinda kuli uje munalume kwitila muli ikeye muna munu baka mwenda bangungu! ngwe chakele chachibwa kuli ikeye kujeneka kuthemuka." ²² Hathimbu bakele na kulya, Yesu wambatele likende, wa likwithwile, na kulipathzula. Wa banene na kwendeka ngwendi, "Ambateni echi. Ou mubila wange." ²³ Wanonele nganja, wanene kukandelela, nakuyana kuli bakebo, cho boshe banwile muli ikeyo. ²⁴ Wendekele kuli bakebo ngwendi, "Awa maninga ange a lishiko, maninga awa banetilila mbunga. ²⁵ Chili bene njendeka kuli yeni ngwange, kunjikanuho lalo ebi bija bushuka bwa mulihya kubanga halitangwa nji kanwa mubu Mwene bwa Njambi." ²⁶ Hanima ya kwimba mwatho, batuhukile nakuya ku Munkinda wa Oliveta. ²⁷ Yesu wendekele kuli bakebongwendi, "Muba boshe mukanjitewa, mwafwa bana thoneka, 'Njikapupa kapupa kanyungi cho bimanga boshe baka lishandoka.' ²⁸ Oloni hanima ya kunjithangula, njikalibanga kuya ku Ngalileya." ²⁹ Petulu wendekela kuli ikeye ngwendi, "Nambe boshe balishandoka na kutewa, yangeni embwe." ³⁰ Yesu wendekele kuli ikeye ngwendi, "Buthunga bene njendeka kuli yobe, lelo—eyo buno bene buthsiki—thimbu kanda ndenba atambeke lubali unjibyana lutatu." ³¹ Oloni Petulu ngwendi, "Osho nga njapande kuthsa nobe, kunjikabyana." Chojo boshe bamu kulahethele chifwa chimo lika. ³² Bethzile ku mutambela bathana Ngetesemani, cho Yesu wendekele kuli ba ndongethi bendingwendi, "Kaleni hamo thimbu njilomba." ³³ Wambatele Petulu, Yakomba, na Yowano cho waputukile kuthzeya mu mbunge na kulibupukila manene. ³⁴ Wendekele kuli ba kebo, "Mwonyo wange uli na buthiwa manene, bunatha na kunjitwala ku kuthsa. Thaleni hano cho lalo toneni." ³⁵ Kuyako halutwe kamandondo, Yesu wawililele hathi na kulomba ngwendi ngwe chinathiwa eyi thimbu yathe kumutumbukila. ³⁶ Wendekele ngwendi, "Abba, Tate, byuma byoshe byabyathi kuli yeni. Tunditheni eyi nganja kuli yange. Oloni kethi kushaka change embwe, olojo cheni." ³⁷ Welukile cho wa wanene bana lala, Cho wendekele kuli Petulu, "Simona wa lala?" Kumani kuwatha kutona ha thimbu ino? ³⁸ Toneni na kulombela mangana mwilike ku kobela mu byetheko. Muthzithzime chili bene uli na kushaka, oloni mubila wajuka." ³⁹ Waile lalo nakulomba, cho wakalikwathethe majwi amolika. ⁴⁰ Omu welukile lalo, wabawanene bana lala, mwafwa mesho abo alemene. Ku bathzibukile bya kwendeka kuli ikeye. ⁴¹ Wethzile lwa muchitatu cho wendekele kuli bakebo ngwendi, "Muchili na kulala lika na kutonda kuhwima? kyeko! Thimbu inete. Kengeni! Muna Munu bana kumusholwela mumaboko aka shili. ⁴² Katukeni; tuyeni. Kengeni! Ou anjishola ali muyehi." ⁴³ Hajebene achili nakwendeka, Yudasi umo wa baje likumi na babali, wetele, cho wethzile na mbunga yakama yambatele mikwale na bimbweti, yatundile kuli baka Malombelo baba kulunu baka Kuthoneka, na Ba kulunu. ⁴⁴ Cho uje muka kumwenela bungungu wabanene chi mwetho, ngwendi, "Uje nji thzemba cho ikeye. Mukwateni, na kumwambata mumunyunge." ⁴⁵ Omu Yudasi wetele, hajebene waile kuli Yesu ngwendi, "Mulongethi," na kumu thzemba. ⁴⁶ Cho bamu kwatele na kumu bumbateya. ⁴⁷ Oloni muno wabo ou wemanene kuyehi ashomwene mukwale wendi na kubatula litwi lya ngamba wa Tupilisitu ba helu. ⁴⁸ Yesu wendekele kuli bakebo ngwendi, "Munaija, ngwe kuli lipwepwe, na mikwale, na bimbweti na kunjikwata? ⁴⁹ Omo njakele neni matangwa oshe na kulongetha mu Tembele, ku mwanjikwatele. Olojo echi bana chilingi mangana bithoneka bishulithiwe." ⁵⁰ Boshe baje bakele na Yesu ba muthethzele cho ba tewele. ⁵¹ Mukwenje, wathzalele nanga ije ya linyu bamuthzengelekele, wakabangeyele Yesu. Omu, baje banamulume bamukwatele ⁵² wathethzele ije nanga ya linyu nakutewa mutototo. ⁵³ Batwalele Yesu kuli Kapilithitu wa helu. Kuje kwakungulukile boshe Tupilithitu babakulunu, Bakulunu na baka Kuthoneka. ⁵⁴ Cho Petulu wamukabele wakeleha lyala kamandondo, nomu ba kobelele muchipango cha Kapilithitu wa helu. Watumamene hakati baka kunyunga, bakele ku liko nakulishalwisha. ⁵⁵ Cho tupilithitu babakulunu na baka thzango yaba Yuleya batondele bukaleko bwa kumubangela Yesu mangana baka muthsiye. Oloni Kubawanene nambe bumo. ⁵⁶ Mwafwa babengi banenele bukaleko bwa makuli na kumubangela, oloni nambe bukaleho bwabo ku bwalitabathanene. ⁵⁷ Bamo bakatukile nakunena bukaleko bwa kumubangela; bendekele ngwabo, ⁵⁸ "Twamuthzibile kwendeka ngwendi, 'Njika thilula eyi Tembele yakutunga na maboko, cho muma tangwa atatu njikatunga yeka yakujeneka kutunga namaboka.'" ⁵⁹ Nambe ngocho bukaleho bwabo ku bwalitabathanene lalo. ⁶⁰ Kapilithitu wa helu wemanene na kwihula Yesu, "Kuwethi na mukumbu? Indi bikajo ebi aba banalume balina kukubangela?" ⁶¹ Oloji ikeye wolokele na mukumbu wahi. Kapilithitu wa helu wa mwihwile lalo ngwendi, "Yobe Kilithitu, Muna ou bakithwila?" ⁶² Yesu ngwendi, "Yange bene; cho mukamona Muna Munu omu aka tumama kuliboko lya chilyo lya nthzili na kwija na mashelwa a mwilu." ⁶³ Kapilithitu wa helu watabwile buthzalo bwendi na kwendeka ngwendi, "Tuchili lika na kutonda bunjiho bukwabo?" ⁶⁴ Munalithzibila kushaula. Biyongola byeni bilibati?" Bamuhithile ngwe atela kuthsa. ⁶⁵ Bamo baputukile kumu jekwila mate na kufwika hamesho endi na kumupupa na kwendeka ngwabo, "Polofita!" Baje bakakunyunga bamwambatele na kumupupa. ⁶⁶ Hathimbu Petulu watumamene mwithi ya chipango, umo mumbanda ngamba ya Kapilithitu wa helu wethzile kuli ikeye. ⁶⁷ Wamumwene Petelu ana kwota tuhya, wamukengela shwi na kwendeka ngwendi, "Nobe lalo wakele na Yesu mu Nazalena." ⁶⁸ Olojo walibyananganene kwendeka ngwendi, "Kunjathibukile nambe kuthzibithitha bi mwendeka." Cho watuhukile kuchikolo chaku chipango. Bithoneka byakuthañulu byakelako, "Cho hajebene nademba watambeka" Oloni bithoneka bije byabibwa manene byakuthañulu kubyethi neyi mbathzubwila. ⁶⁹ Oloni auje mumbanda wakele ngamba wamumwene nakutuka kwendeka lalo kuli baje bemanene kuje. "Ou munalume napu umo wabo!" ⁷⁰ Olojo ikeye walibyananganene lalo. Hanima ya kathimbu kakandondo baje bemanene kuje bendekela kuli Petulu ngwabo, "Chili bene nobe napu umo wabo, Mwafwa nobe umuka Ngalileya." ⁷¹ Oloni aputukile kulyaka ibenya ha mathingo nakulithinga ngwendi, "Kunjimuthzika ou munalume muli na kwendekaho." ⁷² Na ndemba hajebene watambekele kamuchibali. Cho Petulu wanukile aje majwi wendekele Yesu kuli ikeye: "Thimbu kanda ndemba atambeke lubali, wakunjibyana lutatu, cho wa wililile muli kumbu lya kulila."