¹ Hanoni munalume umo wa lithzina lya Ananiya, na munakathzi wendi Safila, ba landethele libu, ² cho wa tumbikile mbathzubwila ya bimbongo bya landethele (na mwebwe wendi naikeye wa thzibukile), na ku nenako mbathzubwila ikwabo na kuyitula ku mendi a miluwa. ³ Oloni Petulu wendekele nwgwendi, "Ananiya, bikajo Satana na shulithila mbynge yobe ku kwitha Sipilitu wa kujela na tumbika mbathzubwila ya ndando ya libu? ⁴ Omu kanda uli landethe, kulya kele lyobe, na hanima ya ku lilandetha, ku lyakele mu binthzili byobe? Iyajo ou naka echi chilinga mu mbunge yobe? kuwa kwithile banu, oloni kuli Njambi." ⁵ Kuthziba awa majwi, Ananiya wa wililile hathi na kuthsa, lyoba lyakama lyethzile hali boshe ba je bathzibileko. ⁶ Bakwenje ba katukile na ku mubunga bunga, cho ba mwambatele ku mutuhwitha na ku kamushitika. ⁷ Hanima ya kwetheketha ma ola a tatu, manukathzi wendi wa kobelele, kujeneka kuthzibuka bika bya lingikile. ⁸ Petulu wendekele kuli ikeye ngwendi, "Njileke nge mwalandethele libu mundando eyi." cho wendekele ngwendi, "Eyo, mundando eyi." ⁹ Cho Petulu wendekele kuli ikeye ngwendi, "Chinafu bati mwa lithzibathanene hamo mwetheka Sipilitu wa kujela wa Shukulu? Kenga, myanja ya ba nalume ba shitikile munalume wobe ili ha chikolo, cho ba ku kwambata." ¹⁰ Haje bene wa wile hathi ku na kuthsa. Omu bakwenje bakobelele mo, ba mu wanene nathsi, cho ba mwambatele na ku mushitika kuyehi na munalume wendi. ¹¹ Lyoba lyakama lyethzile ha chingulwilo choshe na hali boshe ba thzibile ebi byuma. ¹² Bimwetho na bya ku komowetha bya bingi byakele na kusholoka ku banu ba bengi kwitila mu maboko a miluwa. Boshe ba kele hamo mu chimbimbi cha Solomoni. ¹³ Oloni kukwethi na umo ha kati kabo wa kalukile na kuli kumbathana nabo; nambe ngocho, banu ba bashangathzalele manene. ¹⁴ Nambe ngocho baka ku kulahela ba bengi ba kele na ku bakelako kuli Shukulu, bwingi bwa ba nalume na banakathzi, ¹⁵ batwalele babethzi mu bitapalo na kubalangeka ha myela na bitumamo, mangana Petulu mwakwita, munthzinthzime wendi hamo uwila ha bamo babo. ¹⁶ Kwethzile lalo mbunga ya banu ba bengi kutunda mu bimbaka bya thzengeleka Yelusalema, kunena baka kubinja na baje ba yandethiwile na masipilitu a mabi cho boshe ba kangukile. ¹⁷ Cho ka Pilisitu wa kama wemanene, hamo na bathze boshe bakele nabo (aka kambunga ka ba Sanduke); cho ba shulile na chipululu ¹⁸ bakwatele miluwa, na ku baka mu kamenga ka mbunga. ¹⁹ Oloni na thimbu ya buthsiki kangelo wa Shukulu wa shokolwele bikolo bya kamenga na kuba tuhwithamo, na kwendeka ngwendi, ²⁰ "Yeni, imaneni mu tembele na kwendeka kubanu mathwi oshe achino chiyoyelo." ²¹ Omu ba thzibile ebi, ba kkobelele mu tembele kuyehi na kukya na kulongetha. Oloni kapilisitu wa mukulunu wethzile, na baje bakele nabo, na kuthana Mbanja hamo, boshe ba kulunu ba Isalela, cho wa tumine ku kamenga kuka nena miluwa. ²² Oloni ba kabipangi baileko ku ba bamwene mukamenga, cho balukile na kwambulula, ²³ "Twawanene kamenga ka kushhoka na tunyungi ba nemana ha chikolo, oloni mu twa chishokolwele, kutwawanenemo munu nambe umo." ²⁴ Cho omu kapilisitu wa kutembele na bakulunu na bakulunu baka kukombela bathzibile awa majwi, balikomokolele manene kwetheketha nebi bika ba sholokela. ²⁵ Cho kwethzile mnu na kubaleka, ngwendi, "Banalume ba munakele mukamenga ba nemana mutembele na kutangetha banu." ²⁶ Chojo kapitau waile ku tembele na banu bendi, na kubelwitha, oloni chakujeneka ku bathindethzeka, mwafwa ba tewele hamo ba basha mamanya. ²⁷ Muba belwithile, ba banenele mumbanja. Kapilisitu wa helu wa behwithithile, ²⁸ ngwendi, "Twamishikile na lishiko kethi ku longetha muli eli lithzina, oloni yeni muna shulitha Yelusalema na bilongetha byeni na kushaka kunena maninga ou munalume hali yetu." ²⁹ Oloni Petulu na miluwa ba kwabo ba kumbulwile ngwabo, "Twatela kwononokela Njambi kutubakana banu. ³⁰ Njambi wa ba kukulwila betu wa thangwile Yesu, ou imwa thsiyile na kushukika ha Chiti. ³¹ Njambi wa mujundwilile ku liboko lyendi lya chilyo kumu pwitha nuna mwene wa munalume na mwobole, kwana kutenguluka mu Isalela, na lukonekelo lwa bibi. ³² Yetu tube kaleho webi byuma, cho hamo na muthzithzime wa kujela; ou Njambi nana kuli obbo ba mwononokela." ³³ Omwo mako ba mumbanja bathzibile ebi, ba lubalele cho ba shakale ku thsiya miluwa. ³⁴ Oloni mu Faliseo wa lithzina lya NGamalilyelo, mulongethi wa machika ou iba lemethele ku boshe, wemanene mu mbanja cho washikile miluwa ku ba tuhwitha hanja ha thimbu ya yindondo. ³⁵ Cho wa balekela ngwendi, "Banalume ba Isalela, thinganyekeniho manene hali ebi mushaka kulinga naba banu. ³⁶ Kanda laja ano matangwa, Theundasi wa Thnsimanene kupwa wa kulema, na theteko ya banalume, ya kweta bita biwana, bali kumbathanene nendi. Ba muthsiyile, na boshe baje ba mwononokele ba shandokele na ku thzimangana. ³⁷ Hanima yowu munalume, Yundasi wa Ngelileya wa sholokele mu matangwa a kutanda nabu mu lifuti cho wa kokele bamo banu ba mukabele. Naikeye lalo wa nyongele, na boshe ba mwononokele na bali shandokele. ³⁸ Choni njendeka kuli yeni, shondolokeni aba ba nalume na kubeche abolika,oshe echi chiyongola nambe chipangi cha banu, chika tunaho. ³⁹ Oloni ngwe cha Njambi, kumukatha ku batundithano; hamo mukaliwana muli na kulwitha Njambi." Cho ba chitabelele. ⁴⁰ Cho ba thanene miluwa na kuba pupa na kuba shika kujeneka kwendeka mu lithzina lya Yesu, na ku bechela. ⁴¹ Baile kutunda mumbanja bana bwahelela omwo baba tandela ku kuyanda na na kashauka mwafwa ya lithzina . ⁴² Kutunda haje hatangwa na tangwa, mu tembele na kutunda njubo na njubo, bakele na ku twalelelaho kutangetha na kwambulula muthzimbu wa ubwa ngwabo Yesu ikeye Kilisitu.