¹ Mumukanda wange wa kulibanga nja thonekele, Teofile , wa lekele bije byoshe Yesu waputukile kulinga na kulongetha, ² nakweta halitangwa lije ba mutwalele mwilu, hanima ya kumushiko kwitila mu mundzindzime wa kujela kuli muluwa baje ashakwile. ³ Hanima ya kumuyandetha, walisholwele kuli bakebo wa mutoni na bukaleho bwa bwingi. Ha matangwa makumi awana washolokele kuli bakebo, cho wendekel bya bwana bwa Njambi. ⁴ Omwo waliwanene hamo nabo, wabashikile ngwendi, kethi mukatunde mu Yelusalema, Oloni mukabandamene lishiko lya Tate, bije endekele ngwendi, "Muna thzibi kuli yange ⁵ ngwenge Yowano chili bene wamumbwitikile na mema, oloni yeni bakami mbwitika na mundzindzime wa kujela mu matangwa a mandondo." ⁶ Omwo baliwanene hamo bamwihwile ngwabo, "Shukulu, ino ikeyo thimbu ukatunga bumwene ku Isalela?" ⁷ Wendekele kuli bakebo ngwendi, "Ku chethi kuli yeni kuthzibuka bithimbu nambe bingonde bije Tate na bwahetha na ndzili yendi babenya. ⁸ Oloni mukatambula ndzili omwo mundzindzime wa kujela uka ija hali yeni, nakupwa binjoho bange mu Yelusalema na mwoshe mu Yuleya na mu Samaliya, na ku mamanethelelo akaye." ⁹ Omwo Shukulu Yesu wa manethele kwendeka ebi byuma, omu bakele nakutala mwilu, bamujundwile mwilu, cho lishelwa lya mufwkile cho kubamumwene. ¹⁰ Omwo bakele nakutala mwilu Shwi muje mwaile, hajebene, banalume babali bemanene kuyehi na buthzalo bwa kutoka. ¹¹ Bendekele ngwabo, "Eni banalume bamu Ngalileya, bikajo munemanena hamo na kukenga mwilu? Ou Yesu ibanatwala mwilu kutunda kuli yeni akeluka mu chifwa chije bene mwamumwena aya muje mwilu." ¹² Cho belukile ku Yelusalema kutunda ku Munkinda wa Oliveta, muyehi na Yelusalema, bungendzi bwa litangwa lya Sabata. ¹³ Omwo betele, baile munjibo ya helu, kuje kubakele nakulala. Aba bakela, Petulu, Yowano, Yakomba, Anduleo, Filipu, Tomasi, Mbotolomeo, Mateo, Yakomba muna Alufiya, Simona Zaloti na Yundase muna Yakomba. ¹⁴ Cho boshe bakele na mangana amo akulomba, hamo na banakathzi, na Maliya baina ya Yesu, na bandolome bendi. ¹⁵ Cho muna tangwa aje Petulu wemanene mukati ka ba ndolome, hakati ka chita na makumi abali a mathzina, Wendekele ngwendi, ¹⁶ "Bandolome, chinashakewa bithoneka binapande kuli shulithila, mwafwa mundzindzime wa kujela wendeke hakati ka kanwa ka Ndabiti kutumbula bya Yundasi, uje watwamenene baje bakwatele Yesu. ¹⁷ Mwafwa wakele umo wetu cho lalo nendi watambwile mbathzulbwila yabu ntwamena." ¹⁸ (Cho ou munalume walandele lihya ha bi mbongo bi atambwile ha kulinga bubi, wawile cha mutwe, cho mubila wendi watubikile, namila yoshe ya longomokelemo. ¹⁹ Boshe baje bakele na kuyoyelela mu Yelusalema bathzibile ou muthzimbu, cho balukile lije lihya muli limi lyabo ngwabo, "Akelundama" kulumbununa "Lihya lya Maninga." ) ²⁰ "Omu babithona mu libulu lya myatho, 'Echeni lihya lyendi lipwe lya mupulungwa, Kethi mukatabethe nambe munu umo kuyoyelamo. Tabetheni munu weka kwambata chitwamo chendi cha buntwamena.' ²¹ Chakutamo, cho, uje munalume twendeke nendi hathimbu ya Shukulu Yesu wakele na kutuhuka na kukobela thimbu yoshe, ²² kuputuka haku mbwitika cha Yowano kweta na halitangwa bamu tambwile kuli yetu, bapwile binjiho netu ha kuthanguka chendi." ²³ Cho bemikile banalume babali halutwe, Yosefa uje ibalukile Mbalasamba, cho bamutumbwile lalo Njusita, na Matiyasi. ²⁴ Cho balombele nakwendeka ngwabo, "Yobe, Shukilu, uthzibuka bimbunge bya banu boshe, tusholwele iya hakati kabo banu babali uje ²⁵ washakula ambate chela cha buntwama nakupwa muluwa kutunda kuli Yundasi na kuya ku chela chendi." ²⁶ Ba balingilile ñela ya kushakula, cho babengi ba shakwile Matiyasi, cho bamu kundamekele ku muluwa likumi na umo.