¹ Kuzwa awo kwakaba pobwe lya ma Juda,Mponya Jesu wakainka ku Jelusalemu. ² Ino mu Jelusalemu kumbali omulyango wembelele kwali ziba, elyo mumushobo we Aramaic wikwa kuti Bbetisaida, ape walijesi zitungu zyosanwe. ³ Mwelo mupati wabantu balikuciswa, boofu, balema, ⁴ Abatakozi kwenda balilede awo. ⁵ Kwali mwalumi walikuciswa kwe myaka ili makumi otakwe emyaka ili lusele. ⁶ Ino Jesu nakamubona kalede alya, ape kuzwa awo nakayeya kuti waliwo awo kwe cindi cilamfu, wakati kulinguwe, '' ino ulayanda kuti uponisigwe?'' ⁷ Mwalumi mulwazi wakataba, ''Omwami, Nsikwe naba omwi watandibike muciziba manzi nacivundoka. Ndati ndize, umwi wandindila wanjila nketana kusika. ⁸ ''Jesu wakati kulinguwe, ''nyamuka, bweza bulo bwako, wende.'' ⁹ Mponya mponya mwalumi oyo wakaponisigwa, amane wakabweza bulo bwakwe okwenda. Mponya buzuba obo bwali bwe Nsabata. ¹⁰ Mponya maJuda bakati kulinguwe wakaponisigwa, ''sunu mbuzuba bwe Nsabata ape takwe niwazumizigwa kunyamuna bulo bwako. ¹¹ Inguwe wakataba kuti, ''oyo wandiponya wandambila kuti, 'Nyamuna bulo bwako wende.'' ¹² bakabuzya kuli nguwe kuti, ''ngwani oyo mwalumi wakwambila, 'nyamuna ino bulo wende'?'' ¹³ Nikuba namu, oyo wakaponisigwa talizi kuti wali ni kambo Jesu walinkide kale mucumwinizi, Nkambo kwali bantu banji abusena awo. ¹⁴ Nikwakazwa awo, Jesu wakamujana mutempele ape wakati kuli nguwe, ''Bona, waponisigwa! Ino utakabi noyobisya, nkokuti cimwi cintu awa citakacitiki kuli yebo. ¹⁵ ''Mwalumi oyo wakazwa wakainka kwambila ma Juda kuti ngu Jesu wakamuponya. ¹⁶ Ino akambo kezintu ezi ma Juda bakatalika kupenzya Jesu, nkambo wakacita zintu ezi mubuzuba bwe Nsabata. ¹⁷ Jesu wakataba wakati, ''Batata balimukubeleka niba alicino ciindi, ape Amibo, ndilimukubeleka. ¹⁸ Ankambo ako, ma Juda bakayeya nzila yokumujaya nkambo takwe nakatyola buyo mulawo we Nsabata, pele ape wakamba kuti Leza ngo isi, camba kuti ulibika mu cimo comwi o Leza. ¹⁹ Jesu wakabataba, '' Nconzyo, nconzyo, Mwana takonzi kulicitila alike, ati enzyo nzyabona isi nzyacita, kufumbwa Isi ncacita anguwe Mwana ulacicita mbubonya. ²⁰ Mbonya mbuli Isi mbwayanda Mwana wakwe ape okumutondezya zyeense ezyo zyacita nguwe, ape uyomutondezya zintu zipati kwinda ezi camba kuti muyokomokwa. ²¹ Mbonya mbuli Isi mbwabusya bafwide okubapa bumi, ape mbubonya o Mwana ulapa bumi kuli weense muntu ngwayanda. ²² Mbonya mbuli Isi mbwatakwe ngwabeteka, pele wakapa bubetesi bweense ku Mwana ²³ .Nkokuti kufumbwa muntu uyomuleka Mwana mbuli mbwa lemeka Isi. Oyo utalemeki Mwana talemeki o Isi wakamutuma. ²⁴ Nconzyo, nconzyo, oyo uswilila ijwi lyangu ape okushoma oyo wakandituma ulijesi buumi butamani ape takayobetekwi, pele wayokolwa mulufu okunjizigwa mubumi butamani. ²⁵ Nconzyo, nconzyo, ndamwambila kuti ciindi cilasika, ino casika kale, awo bafu nibaswilila jwi lyo Mwana Leza, ape abo baswilila bayoba obuumi. ²⁶ Mbubonya mbuli Isi mbwali o buumi muli nguwe, pele mbubonya namu wakapa ku Mwana kuti anguwe abe o buumi mulinguwe, ²⁷ ape Isi wakapa ngunzu ku Mwana kuti abeteke kaambo Mwana womuntu. ²⁸ Mutakomokwi cintu eci, mbonya mbokuli kuti cindi ciyosika cokuti kufumbwa abo bali mu makumbu bayo limvwa jwi lyakwe, ²⁹ ape bayo zwa anze: abo bakacita kabotu bayo bukila buumi butamani, ape ambabo abo bakacita zibi bayobukila cisubulo. ³⁰ Takwe ncenga ndacita kuzwa mulimebo. Ndemweni mbuli mbundavwa, ndilabeteka, ape bubetesi bwangu bulasalala nkambo tandiyobuyandoli mukuyanda kwangu pele mukuyanda koyo wakandituma. ³¹ Kuti na ndatalika kulipandulula lwangu ndemweni, bumboni bwangu tabukoba bwe nconzyo. ³² Nkwali umwi undilungulula, ape ndilizi kuti bumboni bundilungulula mbwe nconzyo. ³³ Mwakatuma kuli Joni, ape wakapa bumboni bwe nconzyo. ³⁴ Kono bumboni bundakatambula tabuzwi ku muntu. Ndamba zintu ezi kutegwa mufutulwe. ³⁵ Joni wali lampi liyaka okumweka, ape nywebo mwakayanda kusekelela mu mumuni wakwe kwakaindi kanini. ³⁶ Pele bumboni mbwejesi mbupati kwinda obo mbwajesi Joni, nkambo milimo njakandipa kuti ndimanizye, njonya nje milimo njecita, mundipandulule kuti Tata nguwakandituma. ³⁷ Oyo Tata wakandituma wakapa kale bumboni bokundipandulula. Takwe nimwamvwa jwi lyakwe nikuba kubona cimo cakwe muciindi cili coonse. ³⁸ Takwe majwi akwe ngimujesi asyede mulinwyebo, kambo tamushomi muli oyo ngwakatuma. ³⁹ Mulayandola malembe nkambo muyeya kuti mulingayo mulijesi buumi butamani, ape malembe aya ngangawo andipandulula, ⁴⁰ ape takwe nimuyanda kuza kuli mebo kutegwa mujane bumi butamani. ⁴¹ Mebo tanditambuli bulemu buzwa kubantu, ⁴² pele ndilizi kuti tamukwe luyando lwa Leza mukati muli nwyebo. ⁴³ Ndakaza muzina lya Tata, ape tamundi tambwide.Kuti umwi waza muzina lyakwe mulamutambula. ⁴⁴ Ino ninga mwashoma buti, nwyebo nomutambula bulemu buzwa kubenzinyoko pele tamuyandoli bulemu buzwa kuli Leza alike. ⁴⁵ Mutayeyi kuti mebo lwangu ndime ndiyomupa mulandu kuli Tata. Mozesi oyo ngomushoma ngwatakamupe mulandu. ⁴⁶ Kuti na mwakamushoma Mozesi, mulelede kundishoma, nkambo wakalemba zigama mebo. ⁴⁷ Kuti na kamutashomi mumalembe akwe, ino ninga mwakonzya buti kushoma majwi angu?''