¹ Hono, otumona nji tunapakiwa mukachi ko libuyi likulu lyo a paki, tuleshe yoshe ei itumelile na sibi. Tuhunduke mushiyano echi china lukisezwe yetu. ² Tuteteche kwa Jesu, mutateki wo kupetahala ka tumelo. Kakuli echo tabo nachi pakiwa okwae. Kuma naakukunda shifapahano, kushimba a maswabi asho, na kuikala kulikaha lyo shilyo paulena wa Mulimu. ³ Honi mumunahane, oyo naku kunda e shitulo sho ngeyo kwa atendi o iyi oku kutula yofochi, nji mwaka ikala angenda mu michima chenu na kuleshelela. ⁴ Kamwa shilwanena kale kapa kunyanda ku kuma pa nako cho kutunda unyinga; ⁵ Mi munabulama susuezo echo chimi endishile wenji ana; ''mwanange, wakanyaza Mulena yoku kalimela, waka china ou sikululiwa okwae. ⁶ Kakuli Mulena aka limela oyu ashingile, mi apa koto kwa mwana na mwana oyu a amuhelile.'' ⁷ Omukalimelwa okuongoche. Mulena amishimba wenji anae. Kakuli kwa ikala mwana honi oyu kanine kuchinenwa kwa ihwae? ⁸ Kono o mukanine ku kalimelwa, eyo anu akutapelile, apo ono unyazi kame kaha anaye. ⁹ Muku ekeza, aa ihwetu opashi aa anatu kalimele twa akuteka. Shuwa ngeyo twafanena kukutula yonone kushi cho ihwetu o moya na kuyoya! ¹⁰ Aa ihwetu kumana atukalimele mu nako chinyonyo fela muswanelo. Kono Mulimu ka uwa wetu, nji tuwane ku kutapela mu kukena kwae. ¹¹ Kakusha kalimelo chimonahalile kusha wapa muchino nako, kono chaha kola. Kono chaleta miselo cho kuluka na kozo kwao na alutiwa ngeyo. ¹² Honi mu ongoche a makaha enu a analapele mi na manwi enu aa aknine kukwata machi. ¹³ Mutende maulu enu njila cho kuluka, nji eli liteenine lyaka chelela kono liyoyishiwe. ¹⁴ Mupindamene kuyoya mu kozo na anu oshe, na kukena, kwanambula eyo kakusha oyu mona Mulena. ¹⁵ Mumamele okwenu nji munu akayongeliwa shishemo sha Mulimu, nji munji waka kula kuleta a matata, nji anu angi aka sinyeha kwao. ¹⁶ Mumamele nji kwa kaikala oyu yoya muuhule kapa oyu kanine kutulela ngana kwa Mulimu anu wenji Isau, oyu naku ulisha tukelo cho ukulu chaye nji awane musulo wo shilya. ¹⁷ Kakuli mwa limuka nji kuposho, apa naa lakaza kuwana mbuyoti, kuma naakaneniwa, kakuli kela awana shibaka sho kubaka, shuwa ngeyo apana shifaa namihochi. ¹⁸ Kakuli kamwashikeya ku lilundu eli tweshile kukwatiwa, lilundu lipile mulilo, lyo lififi, libui na lin'ungwa. ¹⁹ Kamwashikeya ku tolombita cho lilata, shuwa ku liywi liambile maywi eyi ayubi nalombo nji likwalio liywi liambe okoo kayubishishile. ²⁰ Kumana akwangela kuongocha taelo chokuamba nji: ''shuwa shiyama apa shikwata ku lilundu, shahafenena kupobauliwa.'' ²¹ Kuma nashumbukisha mu men'o a Mushe mane yopo amba nji, ''ninambuku mi na njanja''. ²² Kupita nji, munakeye ku lilundu lyo Zioni ku mulenen'i Mulimu wo kuyoya, ku Jerusalema mu lihalimu, mi man'eloi a akumine ku lule lwama kumi awapelile. ²³ Muna keye ku kopano cho Keleke cho a eli , a anan'olisha mu lihalimu. Munakeye kwa Mulimu, o muatuli wo inu yoshe, mi ku mioya cho kuluka ngaa anatendiwa kupetahala. ²⁴ Munakeye kwa Jesu, muimaneni ou likani upya, nakuunyinga wae tuna hasakiwa ou uambile wino kupita wa Abele. ²⁵ Mumone nji mwaka kanena kuyuba oyu ambile nenu. Kakuli nji akacha kuma naa kanene oyu naapu mamela pashi, kumatupanduka ngepi apatualukela oyu tuambelile mamela kutunda kuwilu. ²⁶ Nako chimweya, e liywi lyae kumana linyunga kaye. Kono ona sepisa na kuamba nji, ''munako chimweya kana kunyunga fela akaye, konona kuwilu koshe.'' ²⁷ Aa maywi, ''kamweya kame'', natalusa kutundishiwa kwa inu ei inyungiwa, ei, kuinu naiumbiwa, nji eyi yasha nyungiwa ishiyale. ²⁸ Honi, kutambula mubuso wonambula kuzikinyeha, tuku tumele mi mu mukwa wo kulapela otu kwite likute na kuambuka. ²⁹ Kakuli kaniti Mulimu wetu lubya lomulilo.