¹ Elyo liiwa Jesu yopopanena panji, kutunda munjiyo, na kukekala kumanyonga no liwate. Anu angi yopo akeya kwae. Yopo ingena muhisepe nakukatongomana mo. ² Anu yopo aimana pa likamba. ³ Jesu honyi yopo ambela inu ingi muma nguli yopo amba: Neli kwa hekala mulimi oyu noca kukakuna mbuto cae. ⁴ Yokunine ngeyo mbuto cimwea yopo cingwela kuma mbali no njila, oinyunyi yopo ikeya kuya cilya. ⁵ Cimweya mbuto yopo cingwela mumacwe omu nakukana kuikala mubu hiwana, henyi wangu wangu yopo cikukuta kakuli hiwanji mwaikala mubu. ⁶ Wangu-wangu liiwa apa nalihila, yopo cikukuta kakuli hiwanji cakwata minji cokoli, yopo ciolaola. ⁷ Mbuto cimweya yopo cingwela mumikakani henyi mikakani yopo cikula, henyi yopo ci palelwa kukula. ⁸ Mbuto cimweya yopo cingwela mumubu uwawa, yopo cikula naku paka mianda anda, cimweya makumi 7, cimweya makumi mahatu. ⁹ Henyi oyu kite matwi ayube. ¹⁰ Alutiwa yopo akeya kwa Jesu yopo ayamba nji; ike apo ambile na nyangela namanguli? ¹¹ Jesu yopo alaba, nakuamba nji; "munapiwa kolo cakuyubihya imakazo no mubuso no kuwilu, kono ao hiwanji apiwa. ¹² Henyi yoshe oyu kite kumapiwa yonene; kono koyu kana kukite, ehi akwite, mahiyangiwa. ¹³ Ponyiko apa ni ambile noo na manguli, hiwanga amonahala nji amona, kono kamonine. Nao amonahalile nji ayuba kayubile kapa kuutwisisa. ¹⁴ Henyi upolofita wa Isaya waku taleleza ou uambile nji: " kuyuba momuyuba kono komwa kuyibihihya, nakumona kono ko mwa ku monihihya. ¹⁵ Ehyo micima noanu angangatelile henyi kakuyuba omeño oo anacimana kaku mona hiwana mukuhayuba no matwi oo na micima coo, kumahuka kwange, henyi niya yoihye. ¹⁶ Kono oyu no fuyauci oyo meño ae amona na matwi ae ayuba. ¹⁷ Muhikuma na amba nji, ome naamba nji mapolofita na anu akuluka, kumana lakaza kumona eyi mumonine, kono kaimonine. Alakaza kuyuba eyi muyubile kono kaiyubile. ¹⁸ Henyi mutetece ku nguli no mulimi oyu nokuna mbuto cae. ¹⁹ Nji munu apa yuba lii no mubuso no kuwilu, kono hiwanji kuli yubihihya, omu nyangunyu akeya naku ya himba hiya hina kuniwa mumucima wae munu, eco conyiko mbuto nacikuniwa munjila. ²⁰ Ece na cikuniwa mumawe, munu yo amuhela lii, nakuwapela kono kakite minji cakuamba nji elyo lii litiye kwae nako cile. ²¹ Apa kukeya miliko na manyando wangu wangu alesha na kungwa. ²² Eco nacikuniwa muikakani anu ayubile lii, kono minyaka no litunga apacikuma na takazo no ufumu, wangu-wangu alesha na kupaka miselo. ²³ Eco mbuto nacingwela mumubu uwawa, anu ayubile lii lya Mulimu nakuli yubihihya nakupaka miselo na kukutula yonene mianda ca makumi mahatu kapa mutanu na twili kupita omunaci kuneniwa." ²⁴ Jesu kame yopo aambela nguli cikwaco nokuamba nji; mubuso wa Mulimu wafeka wenji munu yokunine mbuto cae muhyanda. ²⁵ Kono uhiku anu analala, hila yopo hikeya kame kuya kuna mufuka muhyanda himweya, ehi nouloto na kukucela. ²⁶ Eco mbuto apa nacimena camenena pamweya na mufuka. ²⁷ Mutanga nohyo hyanda, yopo keya kuya himekeca hinda no hyanda, moolyange hiwanji mwa kuna mbuto ciwawa muhyanda hyenu? kwakeya ngepi nji kuikale mufuka? ²⁸ Yopo amba nji hila hyonyiko hinatende ngeya: mutanga yopo amba nji twatwehya kukacula ou mufuka muhyanda no uloto? ²⁹ Kono munya hyanda yopo amba nji, hiwanji mulehye kakuli mwatwehya kucula na uloto pamweya. ³⁰ Kono muleshe ikulele pamweya, kutwala apatukutula. Ku mamucula weli mufuka nakuumanga nakuutumbeka, ouloto wo kumaukutuliwa naupaka muhishete. ³¹ Jesu kame yopo ambela nguli caco; "Mubuso wa Mulimu wafeka wenji hitondo hya mahitete eyo Mulimu nakuna muhyanda hyaye. ³² Eci mbuto cinyonyo kumanenena kumbuto coshe; kono eci mbuto ocukula ngeya, opo cikula kupitelela naiitondo yoshe no kumena muhyanda. Yopo hitenda hitondo hikulu, nainyunyi yoshe yopo ikeya kuyatenda iyaleto yayo ku mitai cahyo. ³³ Jesu kame yopo apa nguli cikwaco; mubuso wa Mulimu wafeka wenji mumela owo mukaci awanekile na fulawa kupitela ufufumuka. ³⁴ Ei inu yoshe Jesu aiamba mumanguli kwa anu, kame hiwanjiko ehi inambanga hikana kuikile mumanguli. ³⁵ Eyo neli yakuamba nji, ehi nahiambiwa muapolofita hitalelezwe, apa naamba nji: "Inji kuma niyanjulula mulomo wange mumanguli. Kuma niamba inu iya naiholekiwa kutunda kuma tatekelo no litunga. ³⁶ Jesu kame yopo ahiya nakuingena munjiyo. Alutiwa aye yopo akeya kwae kuyamuambela, nji, aatolokele nguli no mufuka nomu hyanda." ³⁷ Jesu yopo aalaba nji; Oyu nakunu mbuto ciwawa yonyiko mwana Mulimu, Henyi hyanda litunga. o mbuto onyiko ana Mulimu. ³⁸ O mufuka myoya cinyangunyu, oila diabulozi. Henyi kutulo conyiko nako nomamaneno, Henyi akutuli mañeloi. ³⁹ Oyu no hicimbo nakunu, yo Diabulozi. Katulo conyiko nako nokupwa no litunga; Akutuli mañeloi. ⁴⁰ Henyi, mufuka apauwanekiwa ngeyo nakutumbekiwa na mulilo. Conyiko katulo noma maneneno no mubuso wa Mulimu. ⁴¹ Mwana munu kumatuma mañeloi aye, kuma ya waneka inu yoshe naitenda sibi naku haitana kucola mulao. ⁴² Kuma kuya yumbeliwa mu liyekuyeku no mulilo, apo mo kuyaikala kula kulila nali kwecameno. ⁴³ Apo ana Mulimu no kukena kuma kuya esha wenji liiwa mumubuso waihoo. Ao akwite matwi no kuyuba ayube. ⁴⁴ Mubuso wa Mulimu, wafeka wenji hikwama no kuholeka muhyanda. Munu apa hiwana, ahimba yo wapelile, aulihya, ei akite yoshe nakuula ehyo hyanda. ⁴⁵ Mubuso wa Mulimu kame wafeka wenji munu wa Pihinihi wa mutondo. ⁴⁶ Apa uwana aulihya ei akwite, nakuula owo mutondo. ⁴⁷ Kame mubuso wa Mulimu wafeka wenji kanyandi kana yumbeliwa , muliwate aka noku kwata shi coshe. ⁴⁸ Apa kaumba, omuyambi akakokela palikamba. Yopo aketapo shi cikulu ci wawa nakupaka muitele yoo. Eci no kwipa yopo aciyumba. ⁴⁹ Kuma kwa kwikala ngeyo ku mamaneneno no litunga. Mañeloi kuma keya kuya keta anyangunyu mukaci no awawa. ⁵⁰ Anyangunyu kuma yumbeliwa mu liyekuyeku no mulilo omo mba kuikala nali kweca meno. ⁵¹ Henyi munayubu einu yoshe? Alutiwa ae yopo aalaba; Eni. ⁵² Henyi Jesu yopo ambela nji; Pangeyo muñoli yoshe oyu nokeya wenji mulutiwa mumubuso no kuwilu, afeka wenji mulume o minya njiyo oyu ketanga ito yae ipya nai nokale muhibulukelo hyaye. ⁵³ Onako apa naci kwana, Jesu, yopo mana kuluta muma nguli, yopo tundapo nakuku cela kwako. ⁵⁴ Jesu yopo muhibaka hyae, nakwingena mu Sinagoge kuka luta. Oma kalabo na maikuto oo neli akuamba nji, kuma nakomoka yonene, yopo amba nji; kandi oyu munu ona wana kupi owu utali, na maata nomamakazo aa oshe?" ⁵⁵ Oyu mulume kanji mwana kalupenda no mabala. Kanji mwana Maria na kulwae aka Jakobo na Josefa,Saimoni na Jonasi? ⁵⁶ Kandi aa oshe kanji onyiko amanjae, a twikile noo? Henyi okuana wana eiinu yoshe kupi? ⁵⁷ Kumana filikanya akwaye, kono Jesu yopo amba koo, "Mupolofita kapiwanga likute mulitunga lyae, na mulusika lwae. ⁵⁸ Hiwanji atenda na makazo koo mulibaka nokulwa kutwisiso koo.