¹ Mulimu apa nakengela Nuwe. Naiyama yoshe, na inu yoshe naikala mu a leka. Mulimu yopo fukiha mepo mulitunga lyoshe. Omeyu yopo atateka kuhuka pashi. ² Omaweluwelu no kwa hapwela yopo acikiwa na ma fifitele no ku wilu yopo a yangeliwa. obula yopo lesha kuloka. ³ Omeyu apa na huka pashi mulitunga, mumanyima no maiwa 150 omeyu oshe ana pwele mulitunga. ⁴ Aleka opo ya fuwama muma kweci mutanu na meli, mumayuwa mutanu na meli mukweci, ku maundu a Lalati. ⁵ Omeyu yopo aekeza kuhuka pashi kupitela mukweci no likumi. Mu liiwa no ma tatekelo no kweci, omayulu no malundu yopo atateka ku monahala. ⁶ Apa na kupita maiwa no kukuma pa makumi mane Nuwe yopo ya njulula Lififitele no Aleka naa panga. ⁷ Yopo paniha Likololo yopo lituka tuka kuca na ku huka. Kupitela omeyu a pwela mulitunga. ⁸ Yopo panihya Likuci kumona nji omeyu ana pwele mu litunga. ⁹ Kono likuci hiwanji lya wana apa no ku lyata, yopo lihukela okwaye mualeka, kakuli meyu ahikile mulitunga lyoshe. Yopo tundihya likaha lyae, kuhimba Likuci kuli twala mu Aleka. ¹⁰ Yopo tateela kame mutanu wa maiwa na maiwa meli yopo tuma likuci. ¹¹ Olikuci yopo lihukela okwaye oma ngolwa ngolwa. Otaneke! ku mulomo wa lyo lina himbi lyawa lya ku lelema lina kayula kuhitondo hya olive. Nuwe yopo limuka nji omeyu an pwele mulitunga. ¹² Yopo pitihya kame maiwa mutanu na meli, na kutuma Likuci kame. Hiwanji lya kahuka kame kwaye. ¹³ Mutanu wa mianda na muanda umweya mu hilimo no matatekelo, mu kweci no pili, mu liiwa no pili no mu kweci, omeyu muli tunga ana pwele. Nuwe yopo fukula ohituwa no Aleka, yopo taneka panji, na kumona, hyemwa, pashi no litunga pa kukuta. ¹⁴ Mu kweci no wili, mumutanu no maiwa na maiwa meli, olitunga lyoshe lina kukuta. ¹⁵ Mulimu yopo ambela Nuwe. ¹⁶ "Otunde mu Aleka, owe, munuwoe, anoe no alume, na akaci aikile noe. ¹⁷ Opanihye oinu yoshe no ku yoya ikile noe-oi nyunyi, oi yama, na inu yoshe ifalambile pa lifasi-nji ye keze yonene pa litunga, inji ikale miselo na kuata mu lifasi." ¹⁸ Nuwe yopo pana naanaye, na munu wae, naka nyamunwaye aa aikile naye. ¹⁹ Ei yose iyoyile, nai yoshe i falambile, na inyunyi yoshe, yoshe ei ye ndile pa lifasi,mumasika ayo yopo ihiya Aleka. ²⁰ Nuwe yopo umbela kalani Mulimu. Yopo himba iyama imweya ikenu na inyunyi ikenu, na ku pa hitabelo no kutumbeka pa kalani. ²¹ Mulimu yopo yuba munuko u wawa na kuamba mumucima wae, "Ka na kukuta lifasi kame mulibaka lyo munu, hiwanga nji o milelo no micima coo unyangunyu kutunde lela kuutomo woo. Hiwanji kame Kana kusinya ei iyoyile yoshe, we nji omu ina tendele. ²² Olitunga lyo likile ngeyo, nako no mbuto na kutulo, kuombola na kupya, bumbi na mupepo, na liiwa na uhiku koya kupwa."