¹ Honyi Jakobo opo lemuha nji kwa hawaniwa nona mu Engepita. Ombela anaye, "Ikei mukutanekela ngeyo oyu na nayu?" ² Oambo, "Mumone kuno, naniyubu nji kwa waniwa nona mu Engepita. Muceko muka tu uleleko kuya nji tu yoye ka tunafa." ³ Akulwa Josefa alikumi naili opo acha ku Engepita kukaula ya kulya. ⁴ Kono Jakobo nakena atuma Benjamine, mina Josefa, na kulwaye, kuma naamba nji, "nahe yepa apo hinu himweya himu tendahalela." ⁵ A ana Isilaele no alume opo aca kukaula mukaci kuo nakeya, enjala hemwa kuma na cikalamo munaha ca Kanana. ⁶ Apo Josefa yonekala yo muendehi mu naha. Oye yono ulihya anu oshe munaha ca Kanana. ⁷ Josefa yomona akulwaye yopo alimuka, kono oku lyanganihya okwa na kwamba mukuhalifa okwo. Opo oambela, "Mwa tunda kupi?" A laba, "Kunaha ca Kanana kwa kuula ya kulya." ⁸ Josefa opo limuka a kulwaye, kono nao nakena amulimuka. ⁹ Cwale Josefa ohupula okulota na lotanga pa libaka lyo, Oambela nji, "onwi mwa itwela! Kuma munakeye kwa ku mona ei baka eyo nokuha cingeleliwa hiwana munaha." ¹⁰ Opo amwambela, "Hiwanji, Mulena wange. Apika oa kuma anakeye kwa kuula ilya. ¹¹ Otwi twa na amunu mweya. Twanu aku sepahala. Oatanga oe kanji itwela." ¹² Opo oambela, "Hiwanji, kuma munakeye kwa kumona ibaka eyo no ku hasileleziwa wino no naha." ¹³ Opo aamba, "Otwi twa apika oe twa hekala likumi na anu aili twa anu amweya ana no alume amunu mweya munaha ca Kanana. Mumone, omwanuce pano ona hyaala na ihwetu, minetu mweya hiwanji ku yoya." ¹⁴ Josefa opo oambela. "Opaya hi namiambele: mwa itwela. ¹⁵ Peci kuma mulikiwa. Kuca na moyo wa Pharao momupwela mwa hiya hino hibaka, ene minenu mutomo yo keya kuno. ¹⁶ Mutume omweya nmukaci kenu akahimbe minenu. Kumo mu hyaala mutolongo, cieyo muna amba imoniwe nji nahikuma eyo munaamba onwi. Nji hiwanji, kupitela mumoyo wa Pharaoh, ya hikuma mwa matwela." ¹⁷ Opo apaka mutolongo mayuwa mahatu. ¹⁸ Josefa opo oambela muliwa no uhatu, "Mutende nji muyoye, na he yapa Mulimu. ¹⁹ Nji hemwa mwanu ahikuma, muhiye munu mweya o kwenu a hyaale mutolongo, onwi muce, muhimbe ilya kumanjiyo enu kwa hekala njala. ²⁰ Mukalete minenu kuno kwange tumone nji aa mai munaamba ahikuma nji komunafa." Opo atenda ngeyo. ²¹ Opo akwmbela oyu noyu, "Yahikuma tuna foso kucomu natutendela minetu natumona moyo waye yotu lomba kono otwi natukena twa yuba. Honyi ou ukalu wa huko kwetu." ²² Reuben opo oa alaba. "Nanikena na miambela. Komuna tenda sibi kuyu mwanuce, kono onwi no mukena mwa yuba? Pano, mumone henyi, ou nyinga waye au faela petu." ²³ Nakena alimuka nji Josefa no a yuba, kakuli kuma na kwikala oyu no kumutolokela mukaci ko. ²⁴ Opo tunda koo na kuka lila. Yopo huka okoo na kuka amba kwoo. Yopo himba Simion kutunda mukaci koo na ku mumanga pa meño oo. ²⁵ Honyi Josefa opo laela apika aye nji a ombihye a masaka no akulwae nailya, naku a hucela mali o mu masaka oo, na ku atenda mufaho no musipili wo. Opo atendela. ²⁶ Akulwae yopo a longa eilya yo pama mbongolo o na kuca. ²⁷ Apo mweya na nungununa e saka caye nji ape mbongolo waye yakulya, apo na pumulela, omona omali aye mumone. Paku a pula pamulomo no shaka caye. ²⁸ Oambela akwaye, "Ana ni hucele amali ange, muamona; aikala mu saka cange." Emicima coo opo chitotobela opo aluka na kunjanja oyu nayu, ambile, "Ei honyi yoike ana tutende Mulimu?" ²⁹ A hukela kwa Jakobo, ihwo munaha ca Kanana na kumuhimekeca eyo nai atendahalela. Opo aamba, ³⁰ oyo mulume mulena no ciya naha, kuma naka amba netu muuhali naku tunahanela nji otwi twa matwela muciya naha. ³¹ Natu muambela, "Otwi twanu akusepahala. Kanji twa matwela. ³² Twaana likumi naili, ihwetu mweya. Omweya hiwanji kuyoya, minetu mutomo pano paliyuwa ahekala na ihwetu munaha ca Kanana.' ³³ Oyo mulume, mulena neco naha, kuma natwamba nji, "Apa kuma nilimuka nji mwanu akusepahala. ³⁴ Mukalete oyo minenu mutomo okwange. Apo kumanimona nji kaanji mwa ma twela, kandi mwaanu akusepahala. Apo kuma ni lukulula mwa penu okwenu, apo kuma muula mucino naha."' ³⁵ Kuma nakwikala ngeya apa shukula amasaka o, apo, aya taneka, munu na munu mu saka caye mwa hekala mukotana wa silibela. Ao naihwo apa amona emikotana no silibela, opo aiyapa. ³⁶ Ihwo Jakobo oa ambela, "muna ni swabisa anange, Josefa kena ka yoile, Simion naci, kame kuma muhimba Benjamine ku mutwala. Yoshe ei inu ya nilwihya." ³⁷ Rubeni oamba kwa ihwaye, oamba, "kombo ipae anange aaili no alume nji monipwela naka leta Benjamine ku muhuca o koe. Omunipe mu ma kaha, kuma ni ka muleta kame okoe." ³⁸ Jakobo opo amba nji, "Mwanange mwapwela aca nenu. Kutenda nji mukulwae nofa oye nohiyala yohoci. Nji hinyangunyu hya mutendahalela munjila omo muca, henyi kuma muleta o huki cange nobi muku swaba mu liteke."