¹ Josefa opo twaliwa mu Engepita. Potifaro, nduna wa Faro oyu neli muendihi no a tateleli wa mu Engepita, opo mu ula ku maishimaele, a ana mutwalako. ² O Minya moyo mona ikala na Josefa opo ikala munu wa kukondihya. Monaikala munjiyo ca molyae no mu Engpita. ³ O molyae mana amona nji o Minya moyo neli aikala naye na minya moyo mo akukondihyeca eyiyoshe na tendanga. ⁴ Josefa yopo wana hishemo mu meño aye. Opo belekela Potifaro. Potifaro opo tenda Josefa muendihi wa njiyo caye, na inu yoshe na heta, opo itula mu pabalelo caye. ⁵ Mumanyima na mutenda muendihi wa njiyo caye no inu yoshe na heta, o minya moyo mona fuyaula o njiyo ca mu Engepita bakeñisa Josefa. O fuyauci ca minya moyo neli caikala pa inu yoshe eyo potifaro na kwata munjiyo na muhyanda. ⁶ Potifaro opo tula oinu yoshe nakwata mu pabalelo ca Josefa. Hiwanji akengela hikwahyo kutundihyako o ilya nalyanga. Josefa neli muwawa yonene naku tabihya. ⁷ Opo kwikala munyima nwei inji munu wa molyae opo yumbela meño aye pa Josefa na kuamba, "O lale nange." ⁸ Kono opo kana na kuamba kwa munu wa molyaye, "mone, molyange ka tetecanga kwii nitendanga munjiyo, o napaka oinu yoshe ahetile mu pabalelo cange. ⁹ Akwihyako mukulu muno munjiyo kupita ome. Hiwanji anikanihya oinu yoshe ene owe, kakuli o munu waye. Henyi ngepi yoni twehya kutenda ou nyangunyu ukulu na sibi kuneku ca Mulimu?" ¹⁰ Mona amba na Josefa liiwa na liiwa, kono opo kana ku lala naye kapa kwila naye. ¹¹ Opo kukeya liiwa limweya eli naca munjiyo kwa kutenda musebezi waye. Nekena kwa ikala anu omo munjiyo. ¹² Opo mukwata kuikumango yaye na kuamba nji, "o lale nange." opo muhiyela o hikumango hyae mulikaha lyae, na kwituka, nakuca panji. ¹³ Opo kukeya nji, apa namona nji ona muhiyele o hikumango hyae mulikaha na kwitukela panji, ¹⁴ henyi opo ihyana anu no munjiyo caye na kuambela, "mumone, Potifaro o na lete o Muheberu kuya tufapahanya. Moanakeye o kwange nji alale nange, opo ni kalumuka kukuwa. ¹⁵ Opo kukeya nji paya aniyuba onikuwa, henyi opo nihiyela o hikumango hyaye, kwituka, na kupanena panji. ¹⁶ "Opo buluka ohikumango hyae kumambali aye kupitela apa molyae akeya ku mwanda. ¹⁷ Opo muhimekeca ohiambo, mupika no muheberu oyu na kutuletela, onakeye kwa kufapahana nange. ¹⁸ Apo kukeya nji apa ina kalumuka kukuwa, opo hiya o hikumango hyaye kwange na kwitukela panji." ¹⁹ Opo kukeya nji, paya molyae ayuba hyambo na mutolokela munuwaye, "Eyi yo nyiko ana tende o mupika woe o kwange," opo nyongonya yonene. ²⁰ O molyae Josefa opo muhimba na kumutula mutolongo, muhibaka omu a yanjilelanga o mapantiti a mulena. Neli a ikala omo mutolongo. ²¹ Kono minya moyo neli aikala na Josefa na ku monihya ouhonyi no kusepahala o kwaye. Opo mupa hishemo pa meño no mukulu no tolongo. ²² O mukulu no tolongo opo tula o mapantiti oshe naikala mutolongo mu likaha lya Josefa. Eyi atenda ko yoshe, Josefa yo muatuli. ²³ O mukulu notolongo hiwanji a bilaela inu yoshe naikala mulikaha lyaye, kakuli Minya moyo neli aikala naye. Eyi yoshe natenda, Minya moyo yo mu kondihi.