¹ Apa Rahere namonanji kaelekelile Jakobo mwana, Rahele apofela mukulwae muna. Opo amba kwa Jakobo, "Onipe mwana, kapa monifa." ² Jakobo yopo nyongonyena Rahele. Opo amba, "Naikala muhibaka hya Mulimu me, oyu nakulwihya olibumo lyo kueleka?" ³ Opa amba, "Omone, kwiikile mutanga wange Biliha, oce kwae, omuyeke nji aeleke mwana pa manwi ange, mbanikwata mwana mulibaka lyae." ⁴ Yopo mupa mutanga wae Biliha kuikala munuwaye. Jakobo yopoca kwae. ⁵ Biliha opo lemupa nakuelekela Jakobo mwana wa mulume. ⁶ Henyi Rahele opo amba, " Mulimu onani atulele, kame unayubu elii lyange nakunipa mwana." Mulibakeli yopo muta licina lya Dani. ⁷ Biliha, mutanga wa Rahele, yopo lemupa kame nakuelekela kame Jakobo mwana wa mulume. ⁸ Rahele apa amba, " Hinalu namukulwange ndwa cikalu, hinamu komo." Opo muta licina lya Nafetali. ⁹ Henyi Lea apa namona nji onemana okueleka, opo himba ¹⁰ Zilipa, omutanga waye, nakumupa Jakobo inji aikale munuwaye. Zilipa, mutanga wa Lea, oelekela Jakobo mwana wa mulume. ¹¹ Lea opo amba, " Eli litohonolo!" Opo mupa licina lya Gadi. ¹² Heni Zilipa, mutanga Lea, oelekela Jakobo mwana mulume wa weli. ¹³ Lea opo amba, "Hina tabele! Kakuli oana kumani hyana tabo." Henyi opo muta licina lya Asha. ¹⁴ Reuben yopoca mumayuwa no kucola uloto nakukawana macila muhyanda. Nakualeta kwa inawae Lea. Henyi Rahere apo amba na Lea, "Onipe kumacila amwanoe." ¹⁵ Lea apo muambela, "Wahambanji ehi hiambo hinyonyo koe kuhimba humwange? Apa kame wafaa kuhimba na macila amwanange? Rahele opo amba, " Tange alale noe pelo ushiku, nji mukushobanihye na macila amwanoe." ¹⁶ Jakobo yopokuma kutunda ku hyanda omangolangola. Lea yopomumbatawela nakumwambela nji, "Waswanela kukeya kwange, hinakumeme na macila a mwanange." Henji Jakobo opo lala na Lea owo ushiku. ¹⁷ Mulimu opoteteca kwa Lea, opo lemupa nakuelekela Jakobo mwana wa mulume no mutanu. ¹⁸ Lea apo amba, "Mulimu ananipu tifo cange, kakuli mono nipu mutanga wange kwa humwange." Yopo muta licina lya Isakale. ¹⁹ Lea apo lemupa kame nakuelekela Jakobo mwana wa mulume no mutanu nakamweya. ²⁰ Lea opoamba, "Mulimu ananipu mpo ciwawa. Apa henyi ohumwange kumani kuteka, kakuli hinamuelekele ana noalume mutanu nakamwea." Yopo muta Zebulani. ²¹ Kutundapo yopo eleka mwana wa mukaci nakumuta Dina. ²² Mulimu yopo itana Rahele naku muteteca. Yopo muletela nji alemupe. Yopo lemupa nakueleka mwana wa mulume. Yopo amba, ²³ " Mulimu onatundihya shonyi cange." Yopo muta licina lya Josefa, nakuambanji, ²⁴ "Ominya moyo onani ekeleze kame mwana wa mulume." ²⁵ Yomana Lahele kueleka Josefa, Jakobo yopoamba kwa Labani, " Onilukulule henyi nji nice, nice kumunji na litunga lyange." ²⁶ Onipe akaci ange na anange aahinabelekele koye, onilehe nice, kakuli walimuka musebezi hinakutendele." ²⁷ Labani yo"po mwambela nji, " Nji hinawana kushemubiwa mumeng'o oe , otateele, kakuli hinawana nji ominya moyo onani fuyaula mulibaka lyoe." ²⁸ Henyi yopo amba nji, "Oambe tifo coe, moni kulifa." ²⁹ Jakobo yopo muambela nji, " Walimuka omuhinakubelekele, namuhina babalelele imunanu yoe. ³⁰ Monokwata fela inyonyo uniulwa kale nakukeya, pano inaekeze yonene. Ominya moyo onafuyaula koshe hinakubelekele. Henyi kamwaka apa nakufaa ei no njiyo cange name?" ³¹ Henyi Labani yopo amba, " Ike yombani kwika?" Jakobo yopo amba, "Hiwanjiko ei waku nipa. Ohitenda fela ngeyo, mana kulihya naku babalela imunanu yoe kame. ³² Oleshe nipita pite mumitapi coe coshe pelo, nitundihemo oshe mangu no malimbalimba, na mangu melu oshe, na tumbembe no mabwanda. Cocikala tifo cange. ³³ Okusepahala kwange mokukumonahaza kuposho, apokeya kuyamona tifo cange. Coshe nombula malimbalimba ku tumbembe, na mangu melu, nji kumawanahala nange, kuma himbiwanji aneciwa." ³⁴ Labani yopo amba, "Hinetana. Kuikale omuona ambele." ³⁵ Mwelyo liiwa Labani yopo tundihya ambembe no a lume no mibala bala na undolindoli, na mbembe oshe no akaci noku baima na undolindoli, nai yoshe nai kwata ukenu, na mangu melu oshe naikala mukaci koo, na kuapa mumakaha anaye. ³⁶ Labani yopo paka maiwa mahatu no mweendo mukaci kaye na Jakobo. Henyi Jakobo yopo lihya mitapi ca Labani. ³⁷ Jakobo yopo himba mitai no mupulanga, naci no alumon, na itondo fela. Na ku yanja mo ikenu opo tenda hitondo no mukaci inji himonahale ei naikala okwahyo. ³⁸ Henyi yopo paka amambafa na yanja posho noimunanu, na posho no maciya omo moshe ikeya ku nwa imunanu. Yopo ilemupa yoikeya kukunwa. ³⁹ Henyi mitapi apa naci kuhyelanga posho noitondo; Yopo ihyema ya mibalabala, kubaima, nai no undolindoli. ⁴⁰ Jakobo yopo tapa aa mangu, kono yopo tenda amangu oshe kutaneka kuiyama nomibalabala na mangu melu oshe mumutapi wa Labani. Henyi yopo tapa omitapi yo hinda yohoci na kwa haciwaneka pa mweya naci ca Labani. ⁴¹ Omangu oshe no mata apa na lemupanga, henyi Jakobo mana himbanga oitondo kupaka muma ciya posho no imunanu, inji henyi itwehye kulemupa mukaci noitondo. ⁴² Henyi oiyama no ku fokola yoikeya mumutapi, hiwanji apakanga oitondo posho cayo, ei no kuyonda yoshe neli ya Labani, ei no mata yoshe neli ya Jakobo. ⁴³ Oyu mulume yopo fuma yonene. mana kwata mutapi ukulu, apika noakaci naa pika no alume, na makamele na ma mbongolo.