¹ Henyi neli kwaikala njala muhibaka, ene njala na citanga kuikala mu maiwa a Abrahama. Isaka yopo ca kwa Abimeleki, kwa mulena no Mafilisita ku Gera. ² Henyi Minya-moyo yopo ku monahaliha kwae na kuamba nji, "Kona shetumukela mu Engepita; opile mu hibaka omu nina kwaambele inji opile mo. ³ Otunge omu muhibaka hemwa, ku maniikala noe ni kufuyaule; Henyi owe na ku masika oe, ku manipa yoshe ei ibaka, naku takutaleleza uitamo ou nanieca ihoe Abrahama. ⁴ Ku mani buliha lusika loe wenji tundungweci no ku wilu, na kupa ehi hibaka hyoshe ku lusika loe. Bakeng'isa masika oe manaha oshe no mulitunga kuma fuyauliwa. ⁵ Ku mani tenda ei kakuli; Abrahama mana kuteka lii lyange na kubuluka taelo cange, milao cange, mwi kalelo wange, na milao cange." ⁶ Henyi Isaka opo tunga mu Gerari. ⁷ Apo a lume nomo muhibaka a mwipula ya munu wae, opo amba, "Oyu manjange." Mana iyapa kwamba nji, "munu wange." kakuli mana nahana nji, "Ao alume nomo mu hibaka kuma nipaa nji a himba Rabbeca, kakuli muwawa yonene." ⁸ Mumanyima Isaka yonoikala noko cile, Abimeleki mulena no Mafilisita manatanekela mu fifitele. Opo mona, mumone Isaka apepihya Rabeka, munu wae. ⁹ Abimeleki oi hyana Isaka kwae na kuamba, "Taneke, hemwa oyu munu wae. Ike ei onaamba, 'Oyu manjange'?" Isaka opo amba kwae, "kakuli I nanahana nji mwendi munu manipaa inji a muhimbe." ¹⁰ Abimeleki opo amba nji, "Ei ike ona tende kwetu? omweya kwanu atwehya kulala na munu woe, inga ku moleta ufosi okwetu." ¹¹ Henyi Abimeleki opo laela anu oshe na kuamba nji, "Oyu kwata oyu mulume kapa munu wae hemwa kuma aipaiwa." ¹² Isaka yopo kuna icalo omo muhibaka na kukutula omo mu hilimo ikala mwaanda, kakuli Minya-moyo neli a mufuyaula. ¹³ Oyu mulume opo fuma, na kuekeza yonene kulima yonene-nene kupitela yo ikala mulimi mukulu na kutuma. ¹⁴ Ku mana kwata mangu mangi na ngombe, na lubasi lungi. Mafilisita opo amukumbwela. ¹⁵ Apo mahima oshe na hapuliwa kwa pika a ihyae omo mumaiwa a Abrahamu ihyae, Mafilisita apa alehihya naku a funda mubu. ¹⁶ Abimeleki opo amba kwa Isaka, "Oce otunde kwetu, wakwata mata kutupita." ¹⁷ Henyi Isaka yopo funduka kutunda mo ku ka nyunyumana mumusindi noku Gerari, na kutunga mo. ¹⁸ Kame Isaka yopo hapula mahima a meyu, wenji ao nahapuliwa mu mayuwa a Abraham ihyae. Omafilisita mana lehihya mumanyima no lifu lya Abraham. Isaka mana ta ao macina akukufeka nao na ihyanihyanga ihoo. ¹⁹ Apo a pika a Isaka aya hapula lihima mu musindi, apa a yawana liweluwelu lya meyu. ²⁰ Alihyani a Gerari akufilika na alihyani a Isaka, na kuamba nji, "Aa meyu etu." Henyi Isaka ota elyo lihima "Esek," kakuli mana akufilika nae. ²¹ Henyi opo hapula licina lyalyo, opo akufilikelapo, kame, henyi opo pakapo licina lya "Sitina". ²² Yopo hiya po na ku hapula kwako lihima lyalyo, kono elyo hiwanji alikufilikela. Henyi yopo lita Rehobota, na kuamba, "Apa Minya-moyo ona tupangele hibaka, na kuata muhibaka." ²³ Henyi Isaka opo funduka kutundapa kuca ku Beeasheba. ²⁴ Minya-moyo okumona haliha kwae owo na kuamba, "yome no Mulimu wa Abrahama ihoe. Kona iyapa, ome naikala noe kumani kufuyaula na ku buliya lusika loe, muli baka no mupika wange Abrahama." ²⁵ Isaka opo umba katala oko na kwi hyana palicina lya Minya-moyo. Oko na cekela tende cae, na apika ae opo ahapula lihima. ²⁶ Henyi Abimeleki yopo ca kwae kutunda ku Gerari, na Akuzati, muhonyi wae, na Pikoli, mukulu no masole ae. ²⁷ Isaka yopo amba koo, "Ike eimukeyelile kwange, mana municimba na kuni cica kutunda kwenu?" ²⁸ Henyi yopo aamba, "Tunamono hiwana nji Minya-moyo aikala noe. Henyi tuna mono nji tu kwece mu kaci ketu, eni mukaci ketu nawe. Henyi tu pange tumelelano noe, ²⁹ Inji kona tutenda unyangunyu, wenji otwi o mu tuna kana kukutenda unyangunyu, na mu na kutendele hiwana na ku kucica mu kozo. Hemwa, ona fuyauliwa kwa Minya-moyo." ³⁰ Henyi Isaka yopo a tendela mukiti, opo alya na kunwa. ³¹ Apa ainguka ma hikuhiku na kukueca upaki munu na munu. Henyi Isaka yopo a cica, opo a muhiya mu kozo. ³² Elyo liiwa lyo a pika a Isaka apa keya na ku ya mwambela yelyo lihima na hapula. Yopo amba, "Tu na wana meyu." ³³ Yopo lita lihima Shibah, Henyi licina lyoo munji Beeresha kuleta pelo. ³⁴ Apa Isau neli wa ilimo makumi mane, opo yeka mukaci Judi mwana mukaci Beeri nomu Hiti, kame na Basemati mwana no mukaci wa eloni no Muhiti. ³⁵ Yopo aleta maswabi kwa Isaka na Rabeka.