¹ Henyi Abrahama mana kulupala yonene na minya moyo nomu fuyaula muinu yoshe. ² Abrahama yopo ambela omupika wae, omukulu yenene oyu noendihya oinu yoshe ku njiyo cae, "inji pake likaha lyoe mu myeelo cange. ³ Inji niku ecihe kwa Minya-moyo, Mulimu no liwilu na Mulimu no litunga, inji kona mukaci wa mwanange kwa anange noa kacana aa no ma Kanana, aa nitungile mukaci koo. ⁴ Kono oongoce munaha cange, ku apange, okahimbelemo mwanange Isaka mukaci. ⁵ Omupika yopo amba nji, "ngepi henyi inj oyo mukaci kauketana kuniko ñelela muno munaha? Cambu nihuce mwanoe mulitunga opaine?" ⁶ Abrahama yopo mwambela, nji olike yenene nji mwanange kona muhucamuya! ⁷ Ominya moyo, Mulimu no liwilu, oyu nakunitundihya mu njiyo ca tate kulitunga noa pange, oyu no ni sepisa nji, ololupahi loe mani lupa cino naha, yonyiko otuma liñeloi lyae posho coe, cambu wakahimbela mwanange mukaci. ⁸ Kono nji mukaci akakana kuku koñenena, cambu ona lukuluha kuwiitamo wange. Cambu feela kona huca mwanange kuya." ⁹ Omupika yopo paka makaha mu myelo ca moolyae Abrahama, yopo mwecihya eci taba. ¹⁰ Omupika opohimba likumi lyama Kamele amolyae nakuca. nakuhimba nakuinu ya molyae. Kuca ku litunga lya Mesepatonia mumunji wa Nakoli. ¹¹ Nakubutihya ama kamele aye kumambali no munji ku lihima no meyu. Neli kuma ngolangola, ciya nako acanga akaci kukabeta meyu. ¹² Henyi yopo amba nji, "Minya moyo, Mulimu wa molyange Abrahama, onipe kutwehya pelo na kuni monihya hipangano kusepahala kwa moolyange Abrahama. ¹³ Taneke, pano hinemana pa lihima no meyu, naana no akacana aa no mu mumunji apana kuya beta meyu. ¹⁴ Henyi kutendahale ngeya. Apa niamba kwa kacana, 'obete meyu nji henyi ninwe,' na kuamba kwange, ' onwe kuma ni betela na ma kamele oye nao, ' oyo aikale yoye mukaci oyu naineke nji aikale wa Isaka. Mukutenda ngeya mani limuka nji onamonihya kusepahala hipangano kwa moolyange." ¹⁵ Mona kuikala ngeyo mangolangola youlwa kumana kuamba, mone Rabeka yopo pana mumunji na hibetihyo hyae pa mafuci. Rabeka mana hyemwa kwa Betele ku mwana wa mulume wa Milika, munu wa Nakoli, muzwale wa Abrahama. ¹⁶ Oyo mukacana neli muwawa kame hiwanji kale alimuka mulume. Hiwanji mulume no mulimuka po kale. Yopoca ku hyecumuka ku lihima kuumbihya hitele hyae na kukeya. ¹⁷ Henyi mupika yopo ituka nau kakuwana naye oyo mukaci na kuamba, "Nalomba hyemwa meyuana akunwa muhitele hyoe." ¹⁸ Yopo amba nji, "Onwe molyange," na wanguwangu yopo tula hitele hyae pashi mulikaha lyae, na kupa oyo mulume yopo nwa. ¹⁹ Uya amana kumupa meyu, yopo amba nji, "nakabetela ama kamele oe meyu kame, kutwala apa kahulukwela." ²⁰ Henyi yopo nyangupa kumwaela oshe meyu naa ikala mukaheya kuamwaela muhinwelo, nakuitukela kame kulihima kuka beta meyu, na kubeta meyu no ma kamele oshe. ²¹ Omulume no mu buha yomweine kumona nji Ominya moyo onakanihya mweendo wae kapa hiwanji. ²² Oma kamele ae oshe uya mana kunwa, mulume yopo panihya liseka lya gauda lyapa liyulu naulemu wa hipahi hya shekele, na meeli maseka a gauda apa likaha lyae ou lemu wa kukuma pa ma shekele likumi, ²³ nakumuipula nji, "omwana anyi wa mukaci? oniambele kwaikala musiyo munjiyo ca ihoye amu tutwehya kulala uno uhiku?" ²⁴ Mukaci yopo amba kwae, "no mwana Betele mwana Milika, oyu no waniwa kwa Nakoli." ²⁵ Nakumuambela nji, "twa kwata ilya ya iyama na musiyo omu mu twehya kuka lala ouhiku." ²⁶ O mulume yopo kubama pashi na kulapela Minya moyo. ²⁷ Yopo amba nji, "kulumbekiwe Minyamoyo, Mulimu wa molyange Abrahama, oyu nakana kuhiya tumelelano cae noku sepahala nakusepahala kwa moolyange. Wenjume, Minyamoyo ona nietelele kunjiyo ca apa moolyange. ²⁸ Henyi mukacana yopo ituka na kukambela inawae minya mwanda kwamana nai inu yoshe. ²⁹ Henyi Rabeka mana kwata manjae wa mulume, licina lyae neli Labani. Labani labani nakuitukela koyo mulume noikala kumambali no munjila nokulihima. ³⁰ Yonamono manjae liseka pama kaha, yona yubu mai anaamba manjae Rabeka, na, uya mumona, monaimona ku ma kamele ae kulihima. ³¹ Henyi Labani yopo ambanji, " Okeye, onafuyauliwa kwa minya moyo. Ike yoimanenine panji? Hina kulukiseze njiyo, na hibaka hyoma kamele." ³² Henyi mulume yopo keya kunjiyo na kubopolola ma kamele. Ma kamele manaapiwa ilya, na meyu yopo amupa kukuhupa kuma kondo ae na makondo noa lume naenda noo. ³³ Yopo amupa ilya yakulya, kono yopo ambanji, "Kona kulya ene oni amba eihina hingi kuamba." Henyi Labani yopo ambanji, "Oambe." ³⁴ Yopo ambanji, "nomupika wa Abrahama. ³⁵ Ominyamoyo ona fuyaula molyange yonene onaluka mukulu. Ona mupu mangu na ngombe, silibela na gauda, Apika noa lume na apika noa kaci, na makamele naa mbongolo. ³⁶ Sara, munuwa molyange, nakuelekela molyange mwana wa mulume yona kulupala, na kupiwa yoshe inu akwite. ³⁷ Molyange manaani ecihya, kuamba nji, "koswanelile kufaela mwanange mukaci kua kaci nomakanana, muhibaka hina tende munji. ³⁸ Waswanela kuca, kulusika lwaka ihyange, na kuapange, nauka himbela mwanange mukaci. ³⁹ Hinaamba kwa molyange nji, "mwendi kau kanikoña. ⁴⁰ Kono yopo niambela nji, "Ominyamoyo, niendile nae, matuma oli ñeloi lyae noe na kukondihya omu sipili woe, inji oka himbele mwanange mukaci kwa apange namu lusika lwatate. ⁴¹ Kono mo lukuluha ku peci haiba mokaca kwaapange nji kaukamukupa. Cambu ngo lukuluhe ku peci cange. ⁴² Henyi hina kumu pelo palihima, nakuamba nji, "Ominya moyo, Mulimu wamolyange Abrahama, hemwa, haiba moonalele kutenda musipili wange hiwana- ⁴³ yomono pano, hinemana kulihima no meyu-olehye mukacana oyu keya kubeta meyu, oyu niambela nji, "nipeko meyu muka heya koe ninwe," ⁴⁴ omukaci oniambela nji, "onwe, nakahimbela na makamele oe-ngaikale yoye hemwa, minyamoyo, ona ketele mwana molyange. ⁴⁵ Hiwanga niulwa nakumana kuamba mumucima wange, onilibelelile, Rabeka yopo pana nakaheya kae pama fuci naku shecumukela kulihima na uka beta meyu. Yopo niamba nae nji, "onipeko meyu ninwe. ⁴⁶ Wanguwangu nakutuula kaheya pa ma fuci ae nakuamba nji, "onwe, nakuselaelela ma kamele nao oshe. ⁴⁷ Yopo nimuipula na kuamba nji, "Omwana anyi?" Yopo amba nji, " Mwana Betele, mwana Nakoli, noelekiwa kwa Milika. Henyi yopo nipaka liseka pa liyulu na hyoi pamakaha. ⁴⁸ Henyi yopo ni kubama pashi naku lapela Ominya moyo, nakulumba ominyamoyo, Mulimu wa molyange Abrahama, Oyu naniendihya munjila ciwawa ku ya wana ana noa kaci aapa molyange kufaela mwana ee. ⁴⁹ Henyi apa, haiba ona kulukisa kumonihya o lilato na kusepahala kwa molyange, Oni ambele. Kono haiba hiwanji, oniambele, nihuke kuli kaha no hilyo kapa ku hiñomo." ⁵⁰ Henyi Labani na Betele yopo aalaba kuamba nji, "einu nakeye kutunda ku minyamoyo; Katutwehe kuamba koe inyangunyu kapa iwawa. ⁵¹ Mone, Rabeka aikala posho coe. Mumuhimbe nakuca, nji akaikale mukaci wa mwana molyoe, wenji omu anaambele ominyamoyo." ⁵² Henyi omupika wa Abrahama uya ayuba mai, yopo nyongamena pashi posho ca Minya moyo. ⁵³ Omupika yopo panihya silibela nafukela mukali na gauda na fukela mukali, na hito, nakuipa Rabeka. Kame yopo pa Labani naka inawae mipuzo ciwawa. ⁵⁴ Henyi oye na naenda nae, yopo alya na kunwa. Nakuikalako ouhiku, uya ainguka akena mahiku, na kuamba nji , "Muni fundule ni huke kwa molyange," ⁵⁵ Minae Labani naka Inawae yopo aamba nji, "muleshe oyu mwalanjo aikale netu hiwanga maiwa likumi, apa apwako ao penji ace!" ⁵⁶ Kono yopo ambela nji, " komunani liyeihya, kakuli ominyamoyo Onani endihya hiwana. Munifundule ni huke kwa molyange." ⁵⁷ Yopo aambanji, "motuihyana omwalanjo naku mwipula." ⁵⁸ Henyi yopo aihyana Rabeka na kumuipula, "kumooca nae oyu Mulimu?" Yopo alaba nji, "noca." ⁵⁹ Popo na kulukulula Rabeka nakuca nae, na mupika wae no mukaci, munjila na mupika wa Abrahama naalume nae nda noo, ⁶⁰ Yopo afuyaula Rabeka, nakuamba kwae nji, " Manjetu, ngokeekale Inawa ma lule likumi na ma kumi, oaikulyoe onguliwa aendihe omyelo no ila yoo." ⁶¹ Henyi Rabeka yopo imana, oye naapikae noa kaci yopo a cina pa ma kamele, na kukoñenena o mulume. Omupika opo himba Rabeka nakuca. ⁶² Eco nako Isaka neli yopilile ku mboela, yonakahuka ku Lakai-roi. ⁶³ Isaka mangolangola yopoca mu liyungu ukanahana. Uya ataneka, nakumona, posho neli amona ma kamele akeile! ⁶⁴ Rabeka uya ataneka, Henyi yopo mona Isaka, popo yopo shuluka pa kamele. ⁶⁵ Yopo amba ku mupika, "Anyi oya mulume tumbatawelile muno muliyungu?" omupika wa Abrahama nji, "Molyange." poopo bene yopo himba mulepo, naukufuka kuhifateho. ⁶⁶ Omupika yopo himekeca Isaka ei naatenda yoshe. ⁶⁷ Henyi Isaka yopo muleta mu tende ca inawae Sara, naku himba Rabeka, Yopoikala munu wae, nakumu hinga. Henyi, Isaka yopongwa omucima kutunda pa lifu lya inawae.