¹ Heni apanalipwa oliwilu na litunga, nainu yoshe no kuyoya ikilemo. ² Mumaiwa mutanu na meli Mulimu opo kuma kumanenono no hitenda natenda, muliwa no mutanu na meli opo pumula kuitenda yae yoshe natenda. ³ Mulimu opo fuyaula o liiwa no mutanu na meli nakulikehya, kakuli mwili liiwa Mulimu mona pumula kuitenda yae yoshe no kuumba na kupanga. ⁴ Ei yo inu no liwilu na litunga, apa naipangiwa, mwilyo liiwa o minya na apanga litunga na liwilu. ⁵ Nekena kwaikala muhitu kale mulyuwa, naikunanu mulyuwa noikena yamena kale, kakuli Ominya-moyo Mulimu nakena alukisa kale bula mulitunga, nakena kwaikala munu wa kulima mubu. ⁶ Kono mbundu monacifukanga pano pakaye na kuotihya peulu no mubu. ⁷ Ominya-moyo Mulimu opo umba munu palikungu no mubu, nakufuceela mumayulu aye moyo wa kuyoya, na munu opo ikala wa kuyoya. ⁸ Ominya-moyo Mulimu opo kuna hyanda kumuhila liiwa, mu Edeni, opo tulamo o munu na umba. ⁹ Mulimu opo menihya itondo yoshe ei itabihice kuimona na kuwapa kuilya pa mubu, nakutula na ihitondo no moyo nahikala pakaci no hyanda, na hitondo no kuli muka o uwawa na unyangunyu. ¹⁰ O liambai opo litunda mo eli nali selaelanga hyanda.Kutunda apo opo cikutapa nakuikala ma nuka mane. ¹¹ O licina no liamba ei no matatekelo Pishoni. Eli lyonyiko lihikile moshe mulitunga lya Habila, o mukuikile gauda. ¹² O gauda no lyo litunga ciwawa.Mwaikala kame na njilela na liwe lya Onikishi. ¹³ O licina nali amba ei no wili neli Gihoni. Eli lyonyiko lihikile moshe mulitunga lya Kushi. ¹⁴ O licina no liambai nouhatu Hindekele, liahekela kumuhila liiwa wa Asiliya. O liamba ei noune Eufurati. ¹⁵ Ominya-moyo Mulimu opo himba o munu nakumutula muhyanda hya Edeni inji atendemo itenda nakuhimamela. ¹⁶ Ominya-moyo Mulimu opo lahela o munu, nji, " kuitondo yoshe no muhyanda mwatehya kukulyela. ¹⁷ Kono kuhitondo no kulimuka ouwawa na unyangunyu waka hilya, olyo liiwa mbo-lyako, mowa kufa hemwa." ¹⁸ Heni Ominya-moyo Mulimu opo amba, " kakulukelile nji munu aikale yo hoci. Moni muumbela mukwaye wa kumufeka. ¹⁹ Ominya-moyo Mulimu opo umba iyama yoshe no mulitunga pa mubu na inyunyi yoshe no mumbyumbyaulu. Heni opo ileta ku munu kumona omu aihyanene. Omu moshe tuhyanene ohibupiwa na hibupiwa no kuyoya, lyo nyiko likala olicina lyohyo. ²⁰ O munu opo itula macina yoshe ilyama, oinyunyi yoshe no mumbyumbyaulu, naianjama yoshe no lyuwa. Kono o munu oye nekena kwa wanahala mukwaye wa kumufeka. ²¹ Ominya-moyo Mulimu opo letela omunutulotukukulu , o mulume opo lala, Ominya-moyo Mulimu opo himba maci kumaci caye na kuhucela onyama omo nahimba o maci. ²² Kumaci nahimba kumulume Ominya-moyo Mulimu opo umba mukaci na kumuleta ku mulume. ²³ Omulume opo amba," Cino nako, oyu hifupa hya ifupa yange, na nyama ca nyama cange. mo aihayaniwa mukaci, kakuli wa kutundihiwa ku mulume." ²⁴ Mungeyo o mulume momba ahiya ihwaye na ina waye, momba kwatelela kwa munuwaye, nakuikala nyama cimweya. ²⁵ Oshe monaikala sheshe, o mulume na munuwaye, kono nakena ayuba shonyi.