¹ Mumanyiwa nei inu o ili lya Minya-moyo opo likeya kwa Abrame mu pono, kuamba nji, "Koneyapa, Abrame! Minya-moyo no tebe na mupuzo oye ukulu." ² Abrame opo amba nji, " Mulena Minya-moyo, ike yonipa, kakuli na ekukeza uumba, oyu wakuyola onjiyo cange Eliezere wa Damaseka?" ³ Abrame opo amba nji, " kakuli hiwanji wanipa lusika, omone, oyu mbohyemwena munjiyo cange yo mbo niyola!" ⁴ Henyi, mumone, olii lya Minya-moyo opo likeya okwae, kuamba nji, "Oyu mulume liwa kakuyolo; kono mwanaye nokukwelekela yombokuyola." ⁵ Henyi opo muleta panji, na kumwambelanji, " Tanekele muwilu, otale mandungweci, Inji watwehya okwatala." Henyi opo omuambela nji, " Ngeyo mwakwikalela masika oe." ⁶ Opo itana ei naamba Minya-moyo, na kuibala okwae inji kuluka. ⁷ Opo mwambela nji, " Yome no Minya-moyo, nanikutundihya mu Ure no Machaldenia, kukupa uno mubu ouyole." ⁸ Opo oamba nji, " Mulena Minya-moyo, moni limuka ngepi nji liwa niuyola?" ⁹ Henyi opo mwambela nji, " Niletele ka ngombe aka no ilimo ihatu, mbembe mukaci wa ilimo ihatu, ngu wailimo ihatu, nkwilimba na likuci litoma." ¹⁰ Henyi omuletela yohye ei, nakuimbatula mui emba ili, na kupaka oiemba na iemba muwilu wayo kukupa omyongo, kono hiwanji atapa oinyunyi. ¹¹ Apa oinyunyi no kulya ikwayo oapa naiya tula pa itupu, Abrame oicica. ¹² Henyi apa liwa nalica ku kwika, Abrame oca pa tulo tukulu henyi, mumone, milena cikulu no kwiyapihya cimukeyela. ¹³ Henyi Minya-moyo oamba kwa Abrame, " Olimuke hemwanji masika oe kuma aikala a ngenda mu naha cikanine kwikala coo, kuma a tendiwa upika na kulyateeliwa mulimo mianda ci ne. ¹⁴ Kuma ni atula eco naha akubelekela, mumanyima kama akutunda mo na hifumu hingi. ¹⁵ Kono kuma oca kwa kaihoemukuzo, henyi kuma okafundiwa ona kulupala. ¹⁶ Kuma akeya kuno kame mu lusika no une, kakuli oui no Maamori hiwanji kale wa kuma pa mafelelezo." ¹⁷ Oliwa lyo lineki henyi seli milena, mumone, Kanyungu no mulilo na Mushe na malimi no taci lipita mukaci no ipinji. ¹⁸ Muliwa eli Minya-moyo natenda tumelelano na Abrame, kuamba nji, " Napa cino naha ku masika oe, kutunda ku lyambai lya Egepita kuca ku ku lyambai likulu, ma Eufrati- ¹⁹ Maakeni, Maakenizi, Maakadamoni, ²⁰ Maahiti, Maaperizi, Maarefaimi, ²¹ Maamori, Makanana, Magirigashi, Majebusi."