¹ Ngeno akwo yutulitha e mitelo na kwo akwo kutenda thibi oshe awiya kwa Jesu ku mu tethetha. ² Ama Pharisisi na Scribes keo a bilaela,ngao,oyu munu amuela na akwo ku tende thibi,mane na kulya noo.'' ³ Jesu keo oambela nguli,ngao, ⁴ ''kumona o mweya wenu,oyu kwite angu mwanda keo omweya na yongo,oshemwa kuthiya a makumi mutanu na makumi mane na mutanu na ane mu liyungu,na kutha kathaa oyo na yongo kendi apa mba ka muwaena? ⁵ Apa amana ku mu wana,amu kambeka pa thifuthi naku na ku taba enene. ⁶ Apa wiya kukuma ku nthuwo thaye,awiya kwithana a onyiaye na tunga no mupepi na kwa mbela ngao, 'Muwapele nange kakuli ina ka wana ongu wange nayongo.' ⁷ Na mi ambela ngao monyimo bene ngeyo mo kwi kala ku wapela ku wilu pa munu wa thibi omweya ku mono na piluka ku teneka e thibi ,kupita a makumi mu tanu na mane na mutanu na ane ana kana kumbilumuka. ⁸ Kapa mukathi oyu kwite likumi lya silvere, ku mona na yongitha po thimweya oshemwa ku laita e lampi thaye,kufiyela mu nthuwo na ku thaela thiwana ku pitela apa mba thiwana? ⁹ Oshi thiwana ngeya mwethana a onyiaye na tunga no mupepi,na kwamba ngao, ''Mu wapele nange, ' Kakuli ina wana ka siuvera kange aka no ka yongo. ¹⁰ Ngeyo bene na mi ambela ngao kwe kalanga ku wapela enene ku mañeloi a Mulimu ku wilu pa munu mweya oyu na teneke o ku koñela thibi. ¹¹ Keo Jesu oamba ngao, 'Mulume omweya mona kwata anaye alume aili, ¹² Omwanaye o munyonyo keo ambela yaye ngao, 'Tate onipe ko umweya ku ufumu woye owangeko, 'Keo o a tapela oufumu waye kwa naye o aili. ¹³ Mono pa pita ambu mayuwa manyonyo, o mwanaye munyonyo keo shimba ufumu waye naku ku thela kule ku litunga lyalyo, oko na ka petha petha oufumu waye woshe mu ku thinya thunya. ¹⁴ Apa na manitha ku thinya o ufumu waye woshe,keo kwi kala nthala thi nene muya mu litunga,keo tateka kunyanda. ¹⁵ Keo kengena musebethi ku munu mweya muya mu litunga,oyu no ka mupa musebethi wa ku litha angulu. ¹⁶ Keo owapela kulya ku ilya na lithanga angulu kakuli njeko oyu no mupa ya kulya. ¹⁷ Keo oyu mwana okengela enene na kwamba,ngao, 'Angi anu abeleka' kwa tate a kwite ingwa ingi,ome kuno,nafa ku nthala. ¹⁸ Na funduka ku tunda kuno na kutha kwa tatemna ku ka mwambela ngao, ''Tate mo ina fothethe eliwilu na we. ¹⁹ Njekame ku swanela ngaoni thaniwe nga no mwanoye,oni shimbe ni feke wendi omweya no abeleki oye.'' ²⁰ Keo oyu mwana o funduka na ku wiya kwa yaye.Yoshi panena kule,yaye keo na mu mono keo eñeke thimu kwata enene,keo oituka kamu kumbatela na ku mwi mitha. ²¹ Mwanaye keo amba ngao,'Tate,mo no nitende thibi ku liwilu na koye, Ko niswanela kuni thana nga no mwanoye kau.' ²² ''Yaye keo ambela a beleki aye ngao, 'Mulete wangu eyapalo iwa iwa, mu mu mange kame mu pake litheka ku likaa lyaye, na ma katulo ku maulu aye. ²³ Kame mu lete o ngomwana wo ku nuna enene na ku mwipa. Tuwapele enene na ku kina. ²⁴ Kakuli oyu mwanage mo na fa,pelo na yoyo. Mona yonga,pelo na waniwa. 'Keo a tateka oku kina. ²⁵ ''Cwale o mwanayo mukulu no shemwa kwikalako mona kekala kuilwa,Apa kauka na ku shenyena kunthuwo,ayuba membo na kukina. ²⁶ Keo oithana mubeleki omweya naku mwipula ngao ike noyi tendaala. ²⁷ Omubeleki keo mwambela ngao, 'Oya minoye ona kauka kame aka iyo anepaa ngomwana no ku nuna enene kakuli ona amwele mwanaye yona ku kete. ²⁸ ''O mwanaye o mukulu keo lwana na ku kana kwingena mu munthi,keo yaye owiya na ku mu lomba enene. ²⁹ Keo mwanaye o mukulu o ambela yaye ngao, 'Mumone tate eilimo ingi ina ku belekele,kame shamba natanga omo ku ku kaena ei wamba yoshe,kono kowa tanga ku nipa shiwa ka membe ka mweya ngao ni ku wapelithe naa kwange. ³⁰ Pelo oyu mwanoye apa na kumu oyu na ka petha petha o ufumu woye na maule,ona mwipaele o ngomwana no ku nuna enene.' ³¹ ''Yaye keo mwambela ngao, 'Mwanange enako thoshe mo we kala nage,kame yoshe iyi ni kwite yoshe yoye. ³² Cwale ngeno twa swanela ngao tu kine na ku wapela,kakuli oyu minoye mo nafa,ngeno mu yumi,mona yonga,ngeno na waniwa.''