¹ Niti, niti, Na miambela ngao, oyu kana kwi ngeena ku selo mu mulaka no angu, kono a chikelamo ambu, oyo munu keo mbuyi kame wa ku pesa pesa. ² O munu o ingeena ku selo yonyiko o mulisani no angu. ³ O mulonda nopa selo a mu shokweela. Angu a yuba e lii lyaye, mane kame e sananga angu aye na mathina mane na kwa shokweela. ⁴ Apa mana ku shokola angu aye, a endanga kuposo, mane nangu nao keo a mukoñela, ka kuli angu a limuka e lii lyaye. ⁵ Angu ka twesa ku koñela munu ngenda kao kono mwa mwi yapa, ka kuli ka limuka e lii lyaye kao.'' ⁶ Jesu mwana ambaula ethi nguli o kwoo, kono ao na imwa ku limuka ngao inu mwike eyi ambaula o kwoo. ⁷ Keo Jesu o ambela kame ngao, ''Niti, niti, na mi ambela ngao, Ome no selo no angu. ⁸ Anu na wiya o kwange weli a mbuyi kame a pesa pesi, kono angu na imwa kwa tetheta. ⁹ Ome sonyiko e selo, ku mona munu onengene ku sebeisa ome, keo mwa yoisiwa, mwa ingena mushi na ku paena panthi kame mwa wana matafunisetho. ¹⁰ Mbuyi mwa wiyela ambu kwitha na kwipaa. Kono ome mo ina wiyele ngao angu ange a wane moyo na ku u kwata mu ungi. ¹¹ Ome yonyiko o mulisani no ku wapa. O mulisani no ku wapa apanga angu aye o moyo waye. ¹² O mupika no musebethi ka mulisani kao mane kame ka kwata angu kao. Ku mona ona mono e siwi siwiya a siyanga angu na kulupuka, mane na siwi keo sa tafuna angu aye. ¹³ A lupukanga ka kuli oye mubeleki ambu wa uka lomba kame ka kwite taba na angu kao. ¹⁴ O me no mulisani muwa, kame na limuka angu ange, kame nangu ange nao a ni limuka. ¹⁵ Weti apa Tate a ni limuka, kame name na limuka Tate, mane kame napanga o moyo wange kwangu ange. ¹⁶ Na kwata kame angu a kwao ao a kana kuli muno mulaka. Nao kame na swanela kwa leta, mane nao kame nga limuke e lii lyange ngao nga piluke oshe lingala limweya na muisani o mweya. ¹⁷ Esi sonyiko a ni wapeela Tate: O moyo wange natha na ku upa ngao ngo mbo ni uwane kame. ¹⁸ Njeko munu wa ku twesa ku uni yangela, Ni kwite maata aku upa, mane kame na maata a ku twesa ku ushimba. Mono nipiwa oku ku lauliwa ku tundela kwa Tate.'' ¹⁹ O ku ku fapana keo ku tendala mu kachi no Majuda kabakala ao mai. ²⁰ O ungi wo mwana amba ngao, ''A kwata lidimona kame a bulumuka. Ike apa mutha na ku mutethethanga?'' ²¹ A kwao mwana amba ngao, ''A ka twese ku piluka mai a munu wa madimona kao. Kandi lidimona lya twesa ku shokola meo a munu wa kufa a meo ngao a mone ndi?'' ²² Keo o mukiti no ku kenisa e Tempele u wiya ku tendala mu Jerusalema. ²³ Neli nako tha mupepo, apa Jesu natha na kwenda enda mu Tempele mu malibela no selo sa Salumoni. ²⁴ A Majuda keo a mupaka mu kachi na ku mwabela ngao, ''Mo tu shimbisa nako tha ku kuma papi kuno tutha na ku kana ku yubisisa? Aiba ndi owe yonyiko o Kreste, keo o tu tonweele pa kenu.'' ²⁵ Jesu no atambula ngao, ''Na mi ambela kale, kono no mwi mwa kwitana. E misebethi nitha na ku tenda mu lithina lya Tate, thonyiko thini tonola. ²⁶ Kono omwe ko mwitana kao ka kuli ka mwa angu ange kao. ²⁷ Angu ange a yuba e lii lyange; kame name na limuka angu ange, mane kame a ni koñelanga. ²⁸ Napa angu ange o moyo nombula kupwa, kame kombafu kao, mane njeko munu mbo twesa kwani yangela mu likaa lyange. ²⁹ Tate, oyu na inipu, mu kulu yonene kupita a kwaye oshe, kame njeko munu oyu twesa ku itundisa mu likaa lya Tate. ³⁰ Ome na Tate twa anu a mweya.'' ³¹ Keo a Majuda a shimba kame mañomo na ku mu yaana. ³² Jesu no alaba ngao, ''Ina mi monisa misebethi tha ku bula ku tunda kwa Tate. Kona kuli misebethi thipiko etho mu ni ñatanenanga?'' ³³ A Majuda na mwalaba ngao, ''Ko tu ku ñatanena e misebethi e thiwa kao, kono kabakala kanyaso, ka kuli owe, kupiluka o munu, wa ku tenda ofochi Mulimu.'' ³⁴ Jesu keo o alaba ngao, ''Kandi ko kwa iñoliwa mu milao thenu, 'Paya no niamba ngao, ''Mwa milimu kao'''? ³⁵ Ku mona ndi mwane sana milimu, ao e lii lya Mulimu okwoo kwonyiko no likeya( kame a mañolo ka twese ku choliwa kao), ³⁶ mwani ambela ngepi ome oyo Tate na kenisa na ku ni tuma mu kaye ngao,, 'Ona shwaula,' ka kuli mono ni amba ngao, 'Ome no mwana Mulimu'? ³⁷ Ku mona ndi koni tenda e misebethi tha Tate, keo ko muna nitaena. ³⁸ Kono aiba ndi na tenda, shiwa ngao ko muni itaene kao, keo mwitaneko e misebethi thange ngao ngo mu limuke na ku yubisisa ngao Tate e kala o kwange mane kame name ne kala kwa Tate.'' ³⁹ Mwana saela ku mu kwata kame, kono keo o panduka mu makaa oo. ⁴⁰ Jesu keo otha kame mu shambwaliwa wa Jordani ku ka kuma na ku sibaka eso Joani na kolobelethanga, mane keo oka tomanako. ⁴¹ Anu angi mwana wiya o kwaye na ku wiya kwamba ngao, ''Joani no imwa ku tenda isupo, kono e inu yoshe namba kwoyu munu ya sikuma.'' ⁴² Muya anu angi na mwitaena.