¹ Jesu hamana kuzalwa mwa Betelehema ya Judea mwi nako za simwine Heroda, vakwame valitutite vazwa kuvuzwe zuba civeza mwa Jerusalema, ² ''Wina kuhi yava zalwa simwine wa Majuda? kakuti twavona inkani yakwe kuvuzwe bwe zuva, twakeza kukumu fukamina". ³ Simwine Heroda hazuwa catiya ahulu mane nivantu vamwa Jerusalema vonse. ⁴ Heroda ca supa ma Purisita vonse ni vañoli va mulao mi cava vuza nati, "Kriste uswanela kuzalilwa kuhi"? ⁵ Civamuco kuti Mwa Bethelehema wa Judea, kakuti muvava ñoleli va porofita, ⁶ Iwe, Bethelehema, mwinkanda ya Juda,kana umunini kuvayendisi va Juda,mukuzwe muyendisi yete a alise cisi ca Isilaele". ⁷ Cwale Heroda ca sumpila va litutite kumbali nikuva vuza kuti inkani yavoneka inakonzi luli. ⁸ Cavatuma kwa Bethelehema nikuvata kuti "muyende mukasakisise ce ntokomero muhwile, cimwaka muwana, zemuniizibise name zeniyende nikamu fukamine." ⁹ Havamana kuzuwa kwa simwine, civaliyendeza mi inkani ivava voni kuvuzwezuva ciyava yenda kuvusu nikuka zimaninina hewulu lye civaka mwa vali kwikere mucice. ¹⁰ Hava vona inkani civa sanga ahulu cokuhitiriza. ¹¹ Habenjila mwinzuvo civa vona mucice nena ni Maria nyina.Civa fukama nikumu lapera.Civavungununa cifumu cavo nikumuha impo ze gauda, ni insense, ni mira. ¹² Ireza cava kalimera muciloto kuti sanzi vaboli kwa Heroda,mi civavola kwi nkanda yavo cenzila ingi. ¹³ Hava yenda, iñiroi lye Ireza cilye zira Josefa kwi ñonzi mi cilyati, " vuke uhinde mucice niva nyina, mutirire kwa Egepita, muke kale kwateni kusikira hete nini kuwambile, kakuti Heroda mwasake mucice kuti a mwi haye." ¹⁴ A o masiku Josefa cavuka nikuhinda muhwire niva nyina niku tilira kwa Egepita. ¹⁵ ava kekali kwa Egepita kusikira he fu lya Heroda.Ici ci be zuzilizi civa wambwa nji Ireza camu porofita, "kuzwa mwa Egepita niva sumpi mwangu wo muswisu ." ¹⁶ Cwale Heroda havona kuti vakwame va litutite vavamucengi, cavenga ahulu.avatumini vantu kuti vake haye vahwile vonse veciswisu mwa Bethelehema, mane nimucilalo conse civehaya vahwile ve zilimo zo vere kuzwa hakuzalwa kuvoza hansi, cokuya ce inako yava lakalezi kuzwa havava mu wambilili va kwame va litutite. ¹⁷ Mi cikwalizuziliza civa wambiwa ca muporofita Jeremia, ¹⁸ "Linzwi li vazuweki mwa Rammah, cililo ni kuvokolola kukando,Rahele ulilira vana vakwe ukana mane nikutontozwa kakuti kavasikwina." ¹⁹ Hafwa Heroda, Ingiloi lya Ireza cilyeza kuvoneka kwa Josefa muciloto mwa Egepita ni kumuta, ²⁰ Vuke hinde mwana niva nyina mi uyende kwi nkanda ya Isilaele,kakuti vavali kusaka kwi haya mucice ci vavafwi." ²¹ Josefa ca vuka ni kuhinda muhwire niva nyina civeza mwinkanda ya Isilaere. ²² kono hazuwa kuti Arkelausi avali ku vusa mwa Judea ha cipula cesi Heroda, ava tiyi kuya kwateni. mi Ireza camukalimera muciloto,cayenda kwi nkanda ya Galileya ²³ mi cayenda mi cakekala mucivaka cisupwa Nazareta.I ci cibezuzilizi civawambiwa cava Porofita, kuti mwa supwe mu Nazareta.