¹ Petulo, mtumiki wa Yesu Khilistu, kuna alendo wakumwazikila, omwe adasankhuliwa, ku Ponto, Galatiya, Kapadokiya, Asiya, na Bituniya. ² Ninga momwe Mulungu Baba adakudziwani, kuchoka pakutoma mwa basa la chicheneso cha Mzimu, wakuchena, kuti mubvere nakutsukiwa na mulopa wa Yesu Mkhirisitu. Chisomo chikhale na imwe, na mtendere wanu uthumizilike. ³ Alemekiziwe Mulungu na Baba wa Mbuya wathu Yesu Khilistu! Ninga chifundo chache chikulu, iye adatibala mwa tsapano nkudikhira moyo pakumukisa Yesu Khilistu kuchoka kwa kufa. ⁴ Kuti tikatambile chuma ndicho chidzongeka lini, chini kuipisiwa lini, pinango kufota. Chomwe akukoyelani imwepo kudzaulu. ⁵ Imwe akukuyani namphabvu za Mulungu kudzera kuchikhulupiro na chipulumuso chomwe chidakonzewa kale kuonesewa pa nthawe yakumaliziro. ⁶ Mubzimwebzi mukomedwe kwenekwene, neye kuti tsapano, kuna kanthawe kang'onong'ono, imwepo munibva bzakuwawa m'mayezero yakusiyana siyana. ⁷ Mayezeroya yanifika na chakulinga cha chikhulupiliro chanu, chomwe ni chakuumira kuposa golide omwe ambamala, ngakhale kuti ambayengiwa na moto. Ibzi bzidzachitika kuti chikhulupiliro chanu chikaoneke kuti ni cha chaicho kuti mudzatambire kutenda, ulemelero, na ulemu pomwe Yesu Khilisitu amdzaoneka. ⁸ Imwe mulibe kumuona iye, soma mumbamukonda iye. Imwe mukumuona lini iye lero, soma mumbamu khulupilira iye napo mumbadekedwa na chimwemwe chikulu na chakusaya kuleweka na ulemerelo. ⁹ Imwe tsapano mukutambiriratu mwekha chakulinga cha chikhulupiliro chanu, ndicho chipulumuso cha moyo wanu. ¹⁰ Kulewa bza chipululumuso, aneneri omwe adasewera bza mwayi ndiwo udabwera kuna imwe, adafunisisa kunyang'ana bza chipulumusocho bwinobwino, ¹¹ kufuna kudziwa bza munthu uponi pinango nthawe ya Mzimu wa Mkhiristu wakhala kuna iwo omwe ambalewera bza kubonera kwa Mkhilistu na ulemelero ndibo amdzakhala nabo. ¹² Bzidazimbuliwa kuna iwo kuti akhatumikira lini okha, soma imwe, pamene iwo adasewera bza bzinthu bzomwe imwe mudauziwa tsapano kuchoka kuna iwo omwe ambalalika mafala yabwino kuna imwe mwa mphamvu ya Mzimu Wakuchena wakutumiwa kuchoka kudzaulu_ bzinthu bzomwe angero ambafunisisa kuwonambo bzikuchitika. ¹³ Thangwe lache konzani bzakukumbuka bzanu. Khalani kulambiza. Ikhani chizindikiro chanu kwakumaliratu ku chifundo chomwe chidzapasiwe kuna imwe pomweYesu Mkhirisitu amdzaoneka. ¹⁴ Ninga wana wakubvera, nampodi kutewera bzilakolako bzakuipa bzomwe mukhanabzo pome mukhali anyakusaya kudziwa. ¹⁵ Soma nakuti omwe adakuchemeraniyo ngwakuchena, imwembo, pomwe, khalani wakuchena mu bzakuchita bzanu bzense. ¹⁶ Thangwera kwanembiwa, ''Khalanimbo wakuchena, thangwe ine ndine wakuchena.'' ¹⁷ Nakuti penu imwe mumbachemera ''Baba'' iye omwe ambayeluza basa la munthu aliyense, bzikhaliseni mwekha wa mantha pa nthawe yanu yomwe ndimwe alendo kuno. ¹⁸ Tsono imwe mudziwe kuti mulibe kuomboledwa na bzinthu bzomwe bzimbadzongeka ninga siliva pinango golide kuchoka kuchikhalidwe chanu cha pezipezi ndicho mudatambira kuna abereki wanu, ¹⁹ soma na mulopa wa dipo la patali wa Mkhilistu, ninga mwana wa bira wakusaya banga pinango kupunduka. ²⁰ Mkhirisitu adasankhuliwa likanati kukonzewa dziko lapansi, soma tsapano iye waonesewa kwa imwe pa nthawe ino yakumaliza. ²¹ Kudzera mwa iye mumbakhulupilira Mulungu, omwe adamulamusa iye kuna wa kufa achimupasa iye ulemelero, tsono kuti chikhulupiliro na chidikizo chanu chili kuna Mulungu. ²² Mumbachenesa miyoyo yanu pakubvera chadidi. Ibzi bzikhali telepo thangwe chikondi cha chadidi cha abale; ndiye mukondane winango na mwayache kuchokera pansi pa mtima. ( Mabukhu inango yakalekale yadanemba kuti, mungakonze mzimu wanu kukhala wadidi pa kuteweza kuchita bza chadidi kudzera kuna Mzimu Wakuchena). ²³ Pakuti imwe mwabaliwa pomwe, neye kuti na mbewu ndiyo imbadzongeka, soma ndiyo imbadzongeka lini, kudzera mu mafala ya Mulungu yomwe ngakukhalisa. ²⁴ Nakuti, ''Thupi lense liri ninga uswa, apo ulemelero bwache buli ninga dzuluwa lakuthengo la uswa Uswa bumbafota na duwa limbathothoka, ²⁵ soma mafala ya Mbuya yambakhala nthawe zense.'' Mafala aya ni uthenga bomwe tidalalika kuna imwe.