¹ Paulo na Timoteyo, ancito a Kristu Yesu, kuli once banthu atuba a Mulungu mwa Yesu Kristu wamene ali ku Filipi, pamozi na oyanganila na otumikila. ² Cisomo cinkhale na mweo na mtendele ofuma kwa Mulungu ausuwasu na Ambuye Yesu Kristu. ³ Nuwonga Mulungu wangu nthawi zonse panukumbukila weo, ⁴ nthawi zonse, mu pemphelo yangu iliyonse kwa monse, yupangisha pemphelo yangu kunkhala okondwa ⁵ kamba ka kugwilizana kwanu mu uthenga wabwino kuyamba pa siku yoyamba mpaka lelo. ⁶ Nukhulupilila izi zinthu , kuti wamene oyamba ncito yabwino mwa mweo akapitilizye kusilizya ncito mpaka siku ya Yesu Kristu. ⁷ Ncofunikila kwa neo kuyesa njila iyi kuli mweo monse cifukwa nili na mweo mumtima mwangu. Monse nimwe ogwilizana mu cisomo na mukumangiwa kwangu na mukuzicinjilizya kwangu na kusimikizya kwa uthenga wabwino. ⁸ Pakuti Mulungu ni Mboni yangu, Mwanufunila monse nacifundo ca Kristu Yesu. ⁹ Teto iyi ndiye pemphelo yangu: kuti cokondi canu cizule ngako muciziwisho nakumvwishisha vonse ¹⁰ kuti mweo mukasimikizye camene cili cacendi, nakuti mweo mukankhale osalakwa mpaka siku ya Kristu, ¹¹ ozula na cipaso ca olungama cuwela kupitila mwa Yesu Kristu muulemelelo na ciyamiko ca Mulungu. ¹² Lomba nufuna mweo muzibe, anekwasu, kuti cecitika kwa neo zoona ceyavya uthenga wabwino. ¹³ Zokonkhapo zake, macheni yangu mwa Kristu yewela ya cilungamo nthawi yonse kuli olonda mu palasi onse nakuli aliyense. ¹⁴ Anyinji mwa anekwasu alina cikhulupililo cikulu mwa Ambuye kamba ka macheni yangu, ndipo belimbikishiwa kusayopa kulabila mau. ¹⁵ Ayakine cendi elalikila Kristu kufuma mu kaduka na ndeo, na ayake soti kufuma ku kuwama mtima. ¹⁶ Osala ecita kufuma mu cikondi, kuziba kuti neikiwa muno ku cingilizya uthenga wabwino. ¹⁷ Koma opuma olalikila Kristu kufuma mkuzikonda, osati zacendi. Oganiza kuti anifalisile ziipa panili mumacheni. ¹⁸ Ncinji lomba? Tyala ndaba munjila iliyonse-kapena zawenye olo za cendi-Kristu olalikiliwa, ndipo mwaici nukondwela. Ee, ndipo nikakondwele, ¹⁹ pakuti nuziba kuti ici cikanicitile cipulumuso mwa ma pemphelo yanu na thandizo ya mzimu wa Yesu Kristu. ²⁰ Nikufunishisha kwa coganizila cangu na ciyembekezo kuti paliye cinthu cati cinimvweshe nsoni, koma mwa kulimba mtima konse, lomba nthawi yonse, Kristu azakwezewa mu mubili wangu, kapena na moyo olo na imfwa. ²¹ Pakuti kwangu kunkhala na moyo ni Kristu na kufwa ni phindu ²² Koma ngati nunkhala na moyo mu mubili, ndiye kuti cipaso ca ncito yangu neo. Lomba nicini cosankha? Nuciziba lini. ²³ Pakuti nuliba lini cosankha pali zibili. Cofuna cangu ni kufuma na kunkhala na Kristu, camene ciliko bwino, ²⁴ lomba kusala mumubili nicofunikila ngako kwa mweo. ²⁵ Posimikizya za ici, nuziba kuti ninkhalilile nakupitilizya na mweo monse, pa kuonjezela nakukondwela mwa cikhulupililo, ²⁶ teto kuti mwa neo, kuzitukumula kwanu kupake mwa Yesu Kristu pamene niwela kwa mweo soti. ²⁷ Tyala samalani umoyo wanu mmacitidwe a uthenga wabwino wa Kristu, teto kuti pamene nukuzoona mweo olo paliye, nukokumvwa za mweo, kuti ndimwe opanama mu mzimu umozi na ciganizo cimozi na kukatila pamozi pa cikhulupililo ca uthenga wabwino. ²⁸ Osayopa pa vinthu vonse pali bala amene ali adani banu. Ici ndiye cizindikilo kwa beve ca cionongeko cao., koma pa cipulumuso ca mweo-na kufuma kwa Mulungu. ²⁹ Pakuti kwapasiwa kwa ulele kuti mweo cifukwa ca Kristu osati tyala kuli okhulupilila mwa eve, koma nasoti kuti ovutika cifukwa cake, ³⁰ kunkhala nao mkangano olingana umweona mwa neo, ndipo lomba mukumvwa kwangu.