¹ Yesu elabila soti nao m'mafanizo, eciti, ² ''Ufumu wa kululu uli ngati mfumu iyakine yekonzekela ukwati wa mwana wake mwanalume. ³ Yetuma anchito bake kuti bakaite bala oitiwa ku ukwati, koma baliye wele. ⁴ Mfumu yetuma soti bayakine anchito, ndipo yeciti, 'Baujyeni bala otiwa, ''Onani nakonza cakulya ca m'mazulo. Napaya nkhabi na ng'ombe zangu zoina, ndipo zonse zakonzeka. Welani ku madyelelo ya ukwati.'' ⁵ Koma baliye ikeko nzelu ndipo bengoluta, muyakine ku munda wake, muyakine ku malonda yake. ⁶ Bala bayakine bekata anchito ba mfumu, nakubamvwisha soni, nakuzobapaya. ⁷ Mfumu yekalipa, ndipo yetuma asilikali bake nakubapaya ba mbanda noshoka mzinda wao. ⁸ Ndipo eciti kubanchtio bake, 'Ukwati wakonzeka, koma bala beitiwa benze osayenela. ⁹ Mwa ici nkhoyani mu miseu mkaite banthu banyinji bati mupeze ku madyelelo ya ukwati.' ¹⁰ Anchito beluta mumiseu ndipo beunjika banthu onse bepeza, onse aipa na bwino. Ndipo ng'anda yocitilamo ukwati yezula na alendo. ¹¹ Koma mfumu peyewela kuzoona alendo, yeona munthu muyakine aliye vwale covwala ca pa ukwati. ¹² Mfumu yeciti muyangu, waloba tyani muno ciliye covwala ca pa ukwati?' Koma lidoda lenzeve mau ula. ¹³ Ndipo mfumu yeciti, 'mumangeni manja na mendo, ndipo m'mutaye panja pa mdima, pati pa nkhale kulila na kukuta meno.' ¹⁴ Pakuti oitiwa na nyinji, koma natontho osonkhiwa.'' ¹⁵ Lomba afalisi ecoka nakuyopangana mwangamukashile mkulabila kwake. ¹⁶ Ndipo betuma ophunzila bao pamozi na bacihelode. Beciti kwa Yesu, ''Mphunzisi, tuziba kuti nimwe acendi, ndipo muphunzisa njila ya Mulungu mcendi. Muliye nao kanthu na ciganizo ca munthu, ndipo musankhila lini pa banthu, ¹⁷ Lomba tiuzhyeni, muganiza tyani? Ko nicoyenela kulipila msonkho kwa Kaisala?'' ¹⁸ Koma Yesu emvwishisha viipa vao na kuti, "Nicinji cumuniyesela, mweo awenye? ¹⁹ nilangizheni ka ndalama ka msonkho." Ndipo bemuletela k ndalama. ²⁰ Yesu ecti kwa beve, "Ninkhope na zina yabani vili apa?" ²¹ beciti kwa eve, "Kaisara." ndipo Yesu eciti kwa eve, "Lomaba pelekani kwa Kaisara vinthu vake va Kaisara, na kwa Mulungu vake va Mulungu." ²² Pebecimvwa izi, bedabwa. Teto bemusiya nofumako. ²³ Pa siku iyo asaduki ayakine, benzo kamba kuti kuliye ciukosho, bewela kwa eve. Bemukonsha, ²⁴ kuti, "mphunzisi, Mose eciti, 'ngati mwalume wafwa, aliye bana, mkwao ofunika kukwatila mwakazi wake nakunkhala na bana ba mkwao.' ²⁵ Kwenze maddoda pokwao bali seveni. woyamba ekwatila ndipo ecifwa. Posasiya mwana, esiya mwana mwanakazi wake kuli mkwao. ²⁶ Na mkwao wacibili ecita cimozi-mozi, na wacitatu, mpka onse seven. ²⁷ Kufuma pali onse, mwankazi ecifwa. ²⁸ Lomba akayouka, akankhale mwakazi wabani pa bali pokwao bali seveni? pakuti onse enzemkwatila." ²⁹ Koma Yesu ebayankha nakuti kwa beve, "mungolakwa tyala cifukwa muziba lini malembo kapena mphamvu ya Mulungu. ³⁰ Pakuti mu kuuka kuliye kukwatila kapena kukwatiliwa. M'malo mwake, bakuba monga angelo kululu. ³¹ koma pa za kuuka kwa akufwa, Ko muliye belenge camene celabiliwa na Mulungu, kuti, ³² 'nine Mulungu wa Abrahamu, Mulungu wa Isaki, na Mulungu wa Yakobo?' Mulungu ni Mulungu lini wa akufwa, koma wa amoyo." ³³ Gulu piyecimvwa izi, benze odabwa na ciphunziso ici. ³⁴ Koma afalisi pibemvwa kuti Yesu eyankha asaduki, besonkhana pamozi. ³⁵ Umozi mwa beve, ozibishisha malamulo, emkonsha konsho, kumuyesa- ³⁶ "Mphunzisi, lamulo ikuleni mu cilamulo niyotyani?" ³⁷ Yesu eciti kwa eve, "konda Mulugnu wako na mtima wako wonse, na moyo wako wonse, na nzelu zako zonse.' ³⁸ Iyi niye lamulo ikuleni. ³⁹ Nanga lamulo yacibili ili monga eve-'konda muyako monga uzikonda weka.' ⁴⁰ Pa malamulo aba abili niye puyodalila malamulo yonse na aneneri." ⁴¹ Lomba afalisi pebenze bakali pamozi, Yesu ebakonsha konsho. ⁴² Eciti, "Muganiza tyani pali Kristu? Nimwana wa bani?" eciti kwa eve, "mwana wa Davite." ⁴³ Yesu eciti kwa beve, "Ko zucitika tyani kuti Davite mu mzimu omuita kuti, ⁴⁴ Ambuye, nakuti, 'Ambuye eciti kwa Ambuye bangu, "nkhala ku kwanja kwangu kwa kwendi, mpaka nikapange adani bako coika mendo bako?" ⁴⁵ Ngati Davite oita Kristu kuti 'Ambuye,' ni mwana wa Davite tyanni?" ⁴⁶ paliye ekwanisha kumuyankha liu, Paliye lidoda lekwanisha kumukonsha konsho kufumila siku iyo.