¹ ''Mukonda muvuthso o kuwilu walipitula eci, munu oyu li no shilwa oyu nathzi mashikushiku ku aisha aka kukwama ci nakwame mu shilwa shenji sho veine. ² Ou amanine kuliyuva naka kukwama ci kenge awapa dinare thzofoci(mali) mu liyuwa, ayepo watuma ci akakwame mu shilwa sho veine. ³ Ayepo thza kalo kuma 9:00hrs ayepo mona aka kukwama wamweya kwa nemana lika ku musika. ⁴ Ayepo amba kukwo, 'Namwe muthze mushilwa shane sho veine, kenge nipa eshi shiloela.' Honi awopo athza kukakwama. ⁵ Kalo ayepo thza mutanya kuma 12:00hrs, kalo no kuma 15:00hrs ayepo kwama kengeyo. ⁶ Kalo shikati sho 17:00hrs ayepo thza no kukawana wamweya kwa nemana lika. Ayepo amba kukwo, 'Ine munemanena kuno liyuwa lyo lihe?' ⁷ ''Awopo amu ambela ci, 'Mukonda kwithsa natwisha.' ayepo wa ambela ci, 'Namwe muthze musilwa sho veine.' ⁸ Lungulo ou lwakumine, shinda sha shilwa sho veine ayepo ambela muka kuendisha shilwa ci, 'Oishe aka kukwama owape mali o, otatekela o kuhula okamanene nawa o mutatekelo.' ⁹ Aka kukwama awa naishiwa kuma 17:00hrs ou akeile, munu no munu ayepo tambula dinare thzofoci. ¹⁰ Aka kukwama o mutatekelo ou akeile kuma anekelile ci kuma atambula mali oangi kupita angenjo, unone nawo kuma atambulile dinare thzofoci munu no munu. ¹¹ Ou atambulile mali, awopo avilela kwa shinda sha shilwa. ¹² Awopo amba, 'Awa aka kukwama o kuhula anamana hola thzofoci pohuma pa shikwama, unone ona wapa mali eci aa onatupa, atwe tunakwama liyuwa lyolihe no kupya ko litanya.' ¹³ Unone shinda sha shilwa ayepo tawa no ku ambela yumweya kukwo ci, 'Mbusha, kani kuipishelile. Kanatuliyuvu ci kuma okwamena dinare thzofoci? ¹⁴ Oshimbe yoye ne olithzele. Nina hangula kupa awa aka kukwama o kuhula mali eci aa ninakupa. ¹⁵ Kani loelile kukwama ei nihima pa inu yange? nji wayuva omango mukonda nakwama shuwana? ¹⁶ Honi o kuhula kenge akula o mutatekelo, kalo o mutatekelo kenge akukala o kuhula.'' ''Owangi aishiwa unone owa onye woliyo ahanguliwa. ¹⁷ Jesu kuthza ku Jelusalema, ayepo shimba o likumi no eli kuwatwala ku mbali, ne kwali mulikun'wa ayepo wambela ci, ¹⁸ ''Mumone, twa kanduka ku Jelusalema, ne Mwana Munu kenge akapiwa kwa a pulisita owa kulu na an'oli. Kenge akamuatulela kufa ¹⁹ ne kenge amupa kwa anu angana ci amu hendaane, amumwashule ko shivantzi, no kumungongotela pa mbinda. Unone pa lyuwa lyo mushihatu kenge apinduka.'' ²⁰ Nehoni mama wa ana a Zevedea wakeile kwa Jesu na anenji. Ayepo natongama ku manwi ne ayepo lomba shinu shimweya kukwenji. ²¹ Jesu ayepo mu ambela ci, ''Ine ofota?'' Ayepo muambela ci, ''Otuminine ci awa anange eli akukale, yofoci ku lyoko lyoye lyo shilyo yumweya ku lyoko lyoye lyo shimoho, mu muvuthso woye.'' ²² Unone Jesu ayepo tawa no ku amba ci, ''Kalimuka ei mulomba. Mwatwesha kunwa mu nganja omu nitanba kunwa?'' Awopo amuambela ci, ''Twatwesha,'' ²³ Ayepo wambela ci, ''Mu nganja thzange kenge munwa shemwa. Unone kukala ku lyoko lyange lyo shilyo nji lyo shimoho kali yame nipa, unone kwao ana loisheliwa kengeyo ko Tata.'' ²⁴ Afundishiwi wamweya o likumi ou ayuvile engeyo, awopo anjipela nene awo a munu na minenji eli. ²⁵ Unone Jesu po waisha no ku amba ci, ''Mwalimuka ci aka kuendisha o anu angana awaendisha, kalo akulu o awalyatelela. ²⁶ Unone kwakala kengeyo mukaci kenu. Unone, yomuhe oyu fota kukala o mukulo kukwenu apiluke ngamba wenu, ²⁷ kalo yomuhe fota kukala o mutatekelo apiluke ngamba wenu, ²⁸ eci eli ali Mwana Munu kana keya kuna kwameniwa, , unone kuna kwamena, no kunapa moyo wenji ci ayoyishe owangi.'' ²⁹ Ou atundile mu Jeriko, mbunga thzoshokulu po thzimushupwela. ³⁰ Kuma kwakalile a kwelume eli o kufa meho awa akalile kumbali thzo likun'wa. Ou ayuvile ci Jesu yoliyo pita, awopo akuwa, ''Fumu, Mwana Davida, otuyuvele n'eke.'' ³¹ Mbunga po thziwa anjipela, kuwa ambela ci atutwale, Unone mbeci akuwelele manene, ''Fumu, mwana Davida otuyuvele n'eke.'' ³² Nehoni Jesu po imana kuwaisha noku amba ci, ''Ine mufota ci nimikwamene?'' ³³ Awopo amu ambela ci, ''Fumu, ci meho etu amone.'' ³⁴ Nehoni Jesu, ayepo wayuvela n'eke, ayepo kwata meho o. Popo mwene awopo amona ne awopo amushupwela.