¹ Nehoni Jesu ou amanineshile a maywi, naye no kutunda mu Galileya kalo no kwiya mulitunga lio Judea thzo livale lo Jodani. ² Munga thzo shongi thza mushupwelile, kalo aye wakapolishile wae kuya. ³ Mafalisi akeile kukwenji, no kuna muheleka no kuamba kwenji, ''ne mulao watawethza mukwelume kulukulula munuwenji pa mulandu ouhee?" ⁴ Jesu wawatawile no kuamba, "Amwe mushime kutalapo ci aye waombile kumatatekelo wa kwamine mukwelume no mbuyama? ⁵ Aye wawa kwamine aye poamba, 'Ne mulibaka ali mukwelume henge ashiya tatawenji no mama wenji no kunakala no munuwenji, nekalone eli henge akala nyama thzo foci.' ⁶ Nekalo kakala eli, unone nyama thzo foci. Nehoni eshi Nyambi ana waneka pofoci, kupile shanga yo foci okushihandula.'' ⁷ Ao ambile kukwenji, "Enene Mushe atwa ambelile ci tupe lin'olo liokulukulula kalo no kumucithza ci athze? ⁸ Aye wa ambile kuko, "kukukalupa kumicima thzenu, Mushe wamitawithzile kulukulula anu wo, unone kumatatekelo kayakalile mulikun'wa lio hengeyo. ⁹ Ame nahamba kukwenu, Omuhe olukulula munuwenji, kutundishako oyu onakwateliwa, kalo no kuyeka yu mweya, ona kwama uhule, ne kalo mukwelume okuyeka mbuyama nalukululiwa ona kwama uhule." ¹⁰ Afundishiwi ambile kwa Jesu, "Ngeci owo po mulandu kumunu no munuwenji, nehoni uwa po kukana kuyeka. ¹¹ Unone Jesu wambile kuko, "Keli omuhe munu twashe kutawa eyi yambiwa, unone emi ao anapiwa hengeyo. ¹² Unone kwali akana kuyeka mukonda kwatundelela mulila lia njina, kwli akana kuyeka mukwami wa kwanu,kalo kwali akana kuyeka kukuimako ao ashinda, amweya akana kuyeka mukonda atwalela mahano ku muvuthso okuwilu. Ao oliyo ana hamuhela ifundishiwi, mwashiye aitawa." ¹³ Nehoni ao po amuletela mwanuke kukwenji ci aye apake mooko papoo kalo awa lombile, ¹⁴ unone Jesu wambile kuko, "Mushiye anuke, kalo lelo mwa anukethza kukeya ku kwange, mukonda muvuthso wo kuwilu po walipitula nawo.' ¹⁵ Aye po paka mooko kuko, kalo ne aye wathzile kutundako. ¹⁶ Nga mumone munu aye pokeya kwa Jesu kalo no kunaamba, "Mufundishi, shine shoshiwa shinu nininga ci newane moyo okukana kupwa?" ¹⁷ Jesu wa mbile kuko, 'Shine oni ipulela ci shipi shoshiwawa? shofoci lika sholiyo shoshiwawa, unone ngeci wafota kuwana moyo okukana kupwa, omamele mulao." ¹⁸ Ayepo mukwelume poamba kukwenji, "Thzipi milao." Jesu ayepo poamba, "Lelo wapaha, lelo wakwama uhule, lelo waithza, lelo wa nungelela mungenjoye yo kwithsa, ¹⁹ Okuteke atata woye na mama woye, kalo oime muenjoye ici omo lihimena yowe oshinda.'' ²⁰ Mucaha poamba kukwenji, "yoihe eyo inu ina imamela. Shine kalo shifotahala ci nininge ?" ²¹ Jesu aye po amba kukwenji, Ngeci wali mona ci olinawa, othze okaulishe yoihe olinayo, kalo no kukaipa awa anapili, kalo enge oka kala no shifumu kuwilu, kalo keye, onishupwele. ²² Unone owo mucaha ayubile eyo ambile Jesu, aye wathzile kunayene, mukonda eme akalile no lufumo lolungi. ²³ Jesu wa ambile kwa fundishiwi enji, "Shemwa na amba kukwenu, kukalunene ci mufumi nji akaingene mu muvuthso wa Nyambi. ²⁴ Kalo namba kukoye, ci woto kamele kuingena mulithziyo lio thsonga kalo no mufumanyi ci akaingene mu muvuthso wa Nyambi" ²⁵ Nehoni afundishiwi owa ayuvile eyi, ao akomokile nene kalo no kuamba, "Nehoni api akuyoishiwa? ²⁶ Jesu aye po wakengelela kalo no kuamba, "Kukwenu anu po ikalu, unone kwa Nyambi shohe inu yoto." ²⁷ Nehoni Pitrosi wamutawile kalo no kuamba, "Omone, tuna shiyi yoihe inu nokuku shupwela. Henge kukala halaha ngepi kukwetu?" ²⁸ Jesu aye po amba kuko, "Yashemwa na amba kukwenu, unone mushikati shoshipe mwana munu enge akakala popakenu, kalo namwe munanishupwela namwe enge mukakala pa mabona oli kumi na eli, kumuatula mukuta thzo likumi na eli thza Isilaele. ²⁹ Yo muhe nashiyi njiyo thzenji, mwapa munu, ndumbu thzamunu, tatawenji, mama wenji, na nuke, no muvu mukonda lo lithzina liange enge awana shikati yo shita shofoci kalo kenge awana mooyo okukana kupwa. ³⁰ Unone ao akalile omatatekelo enge apwa omatunwelo, kalo omatunwelo enge akala omatatekwlo.