¹ Nyambi waanekelile Nuwe, iyama yoihe yo mu mulundu, no emuna yoihe naikala nenji mu Areka. Nyambi epo kwama mupepo naupepela mu kaye momuhe, no meyu epo atateka kupwelela. ² Maweluwelu opathzungi no tunjanenu to kuwile twathsikiwile, ne ayepo mana kuloka. ³ Limina lyo meyu epo lihuka pashi kamanana kamanana mukaye, ne munyima thzo kumamaneno o mayuwa o kukwama 150 meyu epo apwelela. ⁴ Aleka epo thzishekela mu ngonda thzo mutanu no maonda eeli, pa liyuwa lyo 17 ku ngonda, peulu thzo mikinya thzo Ararati. ⁵ Meyu shime athza no kupwelela kutwala pa ngonda thzo ulikumi. Liyuwa lyo matatekelo ku ngonda mitwi thzo mikinya athzopo thzitateka kumonahala. ⁶ Kwa kalile kenge munyima thzo mayuwa o makumi anee Nuwe epo yanjulula njanena thzo Aleka ethzi na kwama. ⁷ Ayepo punisha likololo ne epo liunduka kolithzanga no kuhuka shime meyu ou naa pwelela mu kaye. ⁸ Ne ayepo tuma likuci ci likamone ngeci meyu ana pwelela pa ndanda mu kaye, ⁹ unone likuci kanalikawana ko kutulela, ne alyopo lihuka ku kukwenji mu Aleka, mukonda meyu mana yala mu kaye momuhe. Ayepo punisha lyoko lyenji, ne epo lishimba no kuliusha mu Aleka kukwenji. ¹⁰ Ayepo tatiela pa mayuwa mutanu no eeli kalo ayepo punisha likuci mu Aleka. ¹¹ Likuci epo likahuka kukwenji lungulo. Kenge! Kuma kwakala limuna lyo lishu lyo shitondo sho Olive mu mulomo walyo. Ne Nuwe ayepo limuka ci meyu ana pwelela mu kaye. ¹² Ayepo tatiela kalo pa mayuwa o kukwana mutanu no eeli, kalo ayepo punisha likuci. Kanalika huka kukwenji kalo. ¹³ Kwa kalile kenge mu myaka thzo ita mutanu no shofoci no mwaka wo matatekelo, mu ngonda thzo matatekelo, o liyuwa lyo matatekelo o ngonda, ci meyu apwelelile mu kaye. Nuwe ayepo punisha shituwa sho Aleka, ayepo kenga, epo mona ci, inene pa ndanda pana kukuta. ¹⁴ Mu ngonda thzo mushili, mu liyuwa lyo 27 ku ngonda, kaye kapwelelile. ¹⁵ Nyambi ayepo amba kwa Nuwe. ¹⁶ Opune mu Aleka, owe, munu woye, anoye, pofoci naa ngumwenyoe. ¹⁷ Opunishe yoihe ihumbiwa iyoya ili- kukoye inyunyi, iyama noyi yoihe endisha mala yienda mukaye -eci yoku vula manene mu kaye, eci ya kukale oshuka ne ivule mu kaye." ¹⁸ Ne Nuwe ayepo punamo no anenji, munu wenji, naa ngumwenyenji. ¹⁹ Yoihe ihumbiwa, yoihe yienda ko mala, inyunyi yoihe, yoihe yienda mu kaye, kuthza mu mipambi yathzo, yapunine mu Aleka ²⁰ Nuwe ayepo umbela aletale shinda sha moyo. Ayepo shimba ku iyama imweya yoikenu no kuinyunyi imweya yoikenu, ne ayepo itumeka ku kwama itavelo yo aletale. ²¹ Shinda sha moyo ayepo nukelela munuko wouwa ne ayepo amba mu mucima wenji, "Kalo kana kukuta pashi mukonda ko munu, shianga ci maayalo o micima thzo omango kutundelela ku wanuke. Inji shianga kwipisha yoihe iyoya, weci eli nina kwama. ²² Ou kaye kashiliko, mumone shikati no kuyanga, kuombola no kuenya, ndombo no kufu, mutanya no ushiku kaya kufotiwa."