¹ Honi ou apitile mu mbongi thza Ampipolisi no Apolonia, awopo akeya ku mbongi thzaTesalonika, oko kwakalile sinagoge thzo Majuda. ² Paulusi, ko muikalelo wenji, ayepo thza kukwo, ne ayepo kalifundisha no mu masavata ahatu yo mu man'olo. ³ Kuma nasikula man'olo no kuamba ci kuma naku loela ci Kilesite anyande no kupinduka kalo kutunda kwaka kufa. Ayepo amba, ''Oyu Jesu niamba kukwenu yoliyo KIlesite.'' ⁴ Majuda wamweya kuma nayuvishisha ne awopo aliwana na Paulusi na Silasi, kuvandakana na anu oangi o Magerike akakulitawa, na ambuyama oku lemekiwa mbicana. ⁵ Unone Majuda akakkukana kulitawa, awopo ayuva shipululu, awopo akashimba akwelume wamweya owamango ku musika, awopo awaneka mbunga pofoci, awop aliwanawana. Awopo athzinguluka njiyo thza Jasoni, kuma afotile Paulisi na Silasi ci awatwala kwa anu. ⁶ Unone ou akwangile kuwawana awopo akokela Jasoni kwa akulu o mbongi, kwa kuwelela ci, ⁷ ''Awa anu ana fulumeka kaye anakeya no kuno. Awa anu anatambula Jasoni alwisha mulao wa Sesare; amba ci kwali Fumu yumweya-Jesu.'' ⁸ Mbunga na akulu o mbongi kuma anjipile ou ayuvile ei enu. ⁹ Unone akulu o mbongi ou amanine kukulisha Jasoni na amweya mali., nehoni awopo awashiya ci athze. ¹⁰ Ushiku o liyuwa elyo mwene akakulitwa awopo ambela Paulusi na Silasi ci athze ku berea. Ou akakumine ko, awopo akaingena mu sinagoge thzo Majuda. ¹¹ Honi awa anu kuma akalile shuwana kupita oku Tesalonika, mukonda kuma atambulile liywi kwana liloishela mu micima, kwa fotishisha mu man'olo liyuwa no liyuwa ci amone ci ei enu moliyo naikalela kengeyo. ¹² Honine owangi kukwo awopo alitawa, kuvandakana ambuyama o Magerike o kulemekiwa na akwelume owangi. ¹³ Unone Majuda oku Tesalonika ou ayuvile ci Paulusi kalo amba liywi lya Nyambi ku Berea, awopo athza ko no kukashangawethza mbunga. ¹⁴ Nehoni wanguwangu, akakulitawa awopo ambela Paulusi ci athze ku liwate, unone Silasi na Timotea awopo ashiyala ko. ¹⁵ Awo natwala Paulusi awopo aka mukumisha ku Atene. Ou akashile Paulusi oko, ayepo walaa ci aka ambele Silasi na Timotea athze kukwenji wanguwangu. ¹⁶ Honi Paulusi kuwa tatelela mu Atene, ayepo yuva umango mu mupepo wenji mukonda o kumona mbongi thzina yala thzo athzimu o kulikwamena. ¹⁷ Honi ayepo amba no Majuda mu sinagoge na amweya awa nalombelanga Nyambi, ayepo kakwama kengeyo no ku musika kwawa nawaniwanga ko. ¹⁸ Unone kalo aka filosofi thzo ifundishi yo Epikure no Sitoiki awopo amukananisha. Wamweya awopo amba ci, ''Ine amba oyu shanga?'' Wamweya awopo amba, ''Amonahala ci yoliyo tongwela anu ci alombele athzimu ao,'' mukonda kuma na amba yo evangeli thza Jesu no kupinduka kwawa anafu. ¹⁹ Awopo ashimba Paulusi no kumuleta ku Areopago, awopo amu ambela ci, ''Otutongwele ei efundisha yoipe ona amba? ²⁰ Mukonda waleta enu yipe mu matwi etu. Honine twafota kulimuka ci ei enu yatongola ine.'' ²¹ (Honi wahe aka Atene na enda awa nakalanga oko shikati shishihe kwithsa eshi nakwamanga shime ku amba no kuteelela ku enu yoipe.) ²² Honi Paulusi ayepo imana mukaci ko Areopago no kuamba, ''Amwe akwelumme aka Atene, namona ci mwakakulitawa mu mikalelo thzothzihe. ²³ Mukonda ou nani pitapita nanimono enu yokulombela munakwama, kuma naniwana aletare kuna n'oliwa, ''Kwa Nyambi oyu kana kulimukiwa.'' Honine ei namu lombelanga ko kukana kulimuka, yoliyo nimitongwela. ²⁴ Nyambi oyu wakwamine kaye no enu yoihe ili mo, amona yoliyo Fumu o liwilu no kaye, kakalangile mu matempele o kuumba no moko. ²⁵ Kakwameniwa shanga ko moko a anu, eci koili anapili, amona yoliyo napanga anu moyo no kupuya no enu imweya. ²⁶ Kutunda pa munu yofoci onakwama anu wahe kunayoya pano kaye, yoliyo naloisha miaka no miseto thzo ivaka ayoya anu, ²⁷ ci afote Nyambi ne kalo aliyuve shuwana ou amufota no kumuwana. Unone kali kokule netu. ²⁸ Mukonda kukwenji tuyoya no ku enda no kukala ko kwetu, eci muka kuloka yumweya kukwenu eli ambile, 'Mukonda natwe twa anenji.' ²⁹ Honine, amona twa ana Nyambi, katuloelile ku anekela ci Nymbi alipitula no gauda, nji silivera, nji mawe-enu anakwamiwa ko un'ulungu wa anu no kuanekela kwa anu. ³⁰ Honine Nyambi onashiyelela shikati shokukana kulimuka, unone honi atuminina anu wahe oku ali ci ahumbe. ³¹ Mukonda onapaka liyuwa eli akuatula kaye ko kuluka, ko mukwelume anahangula. Nyambi onamonisha upaki oyu mukwelume ko kumupindula kwaka kufa.'' ³² Honi akwelume oku Atene ou ayuvile yo kupinduka kwawa anafu, wamweya awopo aheke Paulusi; unone wamweya po amba, ''Kenge tutelela kukoye kalo mu iamba ei.'' ³³ Munyima weyo, Paulusi ayepo washiya. ³⁴ Unone anu wamweya awopo aliwana nenji no kulitawa, kuma kwakalile Dionisiasi muka Areopago, mbuyama o lithzina lyo Damarisi, na amweya awa akalile no.