¹ Paulusia po keya ku Debe noku Lisitra, omu akalile mufundishiwi yumweya olithzina lyo Timotea, mwana mbuyama o Mujuda okulitawa, unone tata wenji neli Mugelike. ² Hime nalimukiwa shuwana kwa kalitawa awa nakalanga ku Lisitra noku Ikoneamu. ³ Paulusi wafotile kuthza nenji, ngowa amushimbile kumutwala kumukanda mukonda Majuda akalile omo muibaka omo wahe amulimukile ci Mugelike. ⁴ Apa athzile wahe kuthzinguluka mu mambongi, hime natuminina anu ci akute milao ethzi napaka apositola na akulu mu Jelusalema. ⁵ Makeleke akolopile mushitawo no kubula liwa no liwa. ⁶ Paulusi nangenjenji athzile mushivaka sha Filigia no Galatiya, mukonda mupepo oukenu wawakanishile kuamba liywi mu Asia. ⁷ Ou akeile popepi no Misiya hime afotile ci aingene mu Betinia, unone mupepo wa Jesu wawakanishile. ⁸ Apa ashile misiya wanaingenine mumbongi thza Tolosi. ⁹ Paulusi wamonine shimonisha ushiku: Ayepo mona mukwelume oku Masedonia kunemana, kumulomba no kuamba ci, ''Okeya kuno ku Masedonia notukwase.'' ¹⁰ Apohoni Paulusi amonine shimonisha, popomwene atwepo tuliloishela yokuthza ku Masedonia, kotulimuka ci Nyambi onatuisha ci tukakutathze evangeli lyenji kukwo. ¹¹ Twa buile kutunda mu Toroasi, otwatambile ku Samotilase, liyuwa eli lya hatileko otwakele ku Neapolisi. ¹² Twatundilemo twathzile ku Filipi, ethzo mbongi thza Masedonia, mbongi thzoshokulu mu Masedonia ethzi aendishile Maroma, otwakalilemo maiwa oangi. ¹³ Pa liyuwa lyo Savata twapunine pola ko shelo thzo kulwale, oko twaanekelile ci koshili shivaka sho malombelo otwakaile nokuambaulana ambuyama awakeile kunaliwana pofoci. ¹⁴ Mbuyama yumweya olithzina lyo Lidia, muulishi oito yo pepo watundile ku mbongi thzaa Tiyatira, walombelangile kwa Nyambi, watuteelelile. Fumu po yanjulula mucima wenji ci atwale maano kwei ambile Paulusi. ¹⁵ Aye nakanjiyo thzenji ou amanine kukolovethziwa, ayepo tulomba, ci, ''Apa munaatula ci no munu omuwa kwa Fumu, muingene munjiyo thzange mukakalemo.'' Ayepo tuootela. ¹⁶ Hime kwakwamahalile kenge, kotuthza ku shivaka sho malombelo, mumbanda omupika oyu wakalile no mupepo o kuuka waliwanine netu. Wafumishile manene a nathsile enji mukuuka kwenji. ¹⁷ Oyu mbuyama ayepo yupwela Paulusi natwe kukuwelela ci, ''Awa akwelume apika a Nyambi o mukulu kuinu yoihe. amitongwela likunwa lyo moyo.'' ¹⁸ Hime akwamine heneya maiwa oangi. Unone Paulusi, mukaci ko kumungenyisha manene, wapilukile nokuambela mupepo ci, ''Nakutuminina mulithzina lya Jesu Kelesite ci otunde kukwenji.'' awopo utunda omo muhola ethzo mwene. ¹⁹ Anathsile enji oamonine ci oku nakulupelanga kuwana lufumo kunapu, awpo akwata Paulusi na Silasi nokuwakokela kushivaka sho musika kwa aendishi(avusisi). ²⁰ Apa awaletile kwa kakuatula, awopo amba, ''Awa akwelume ashupa mbongi thzetu. Awa anu Majuda. ²¹ Afundisha miikalelo ethzi thzikanishiwa ci Maroma athzitawe nji kuthzikwama.'' ²² Apo mbunga thzothzihe thopo thzikatuka kulwisha Paulusi na Silasi; atuli awopo ayataula evata yo no kutuminina ci afuliwe no evanthzi. ²³ Apa amanine kuafula evanthzi yoingi awopo awapaka mukamenga no kutuminina mukakunyunga kamenga ci awanyunge shuwana. ²⁴ Apa ayuvile hengeyo, oyu mukakunyunga kamenga ayepo watwala mukamenga ko mukaci nepo kawapaka makulo ku maulu. ²⁵ Pakaci ko ushiku Paulusi na Silasi kuma alombelile no kuimba membo okushangala Nyambi, angenjo awa akalile mukamenga kuma awateelelile. ²⁶ Popo mwene kwakalile kunyanganya ko litunga, apa katanalelile kamenga po kunyanganya; popo mwene mashelo oahe aopo ayanjuluka, no mawenge akalile kwa munu yomuhe wakalile mukamenga aopo aputuka. ²⁷ Mukakunyunga kamenga ayepo pinduka nepo mona mashelo o kamenga anayanjuluka; wahomonine mwele wenji ci alipae, mukonda hime aanekelile ci awa akalile mukamenga anacili. ²⁸ Unone Paulusi wakuwile no liywi lyoshokulu, kuamba ci, ''Walipaa, mukonda twahe motuli muno.'' ²⁹ Mukakunyunga kamenga ayepo lomba liyeye ayepo ndandumukela mukaci , ko kuyapa ayepo nawela pa meho a Paulusi na Silasi, ³⁰ nokuwapunishela pola nokuamba ci, ''Afumu ange , nitende ngepi ci niyoishiwe?'' ³¹ Awopo aamba, ''Olitawe kwa Fumu Jesu, co henge oyoishiwa owe nakanjiyo thzoye.'' ³² Awopo aamba liywi lya Fumu kukwenji, nakanjiyo thzenji. ³³ Nehoni mukakunyunga kamenga ayepo washimba mushikati sho ushiku, nokuwahupa pa ilonda yo,popo mwene aye nakanjiyo thzenji wahe awopo awakolovethza. ³⁴ Honi apa aletile Paulusi na Silasi munjiyo thzenji nokuwaloishela yo kulya, wanyanyukile nene nakanjiyo thzenji, ci onalitawa kwa Nyambi. ³⁵ Apa lyavile, mukakuatula ayepo tuma maywi kwa mukakunyunga kamenga ci, ''Oshiye awo akwelume athze.'' ³⁶ Mukakunyunga kamenga ayepo katongwela Paulusi ci, ''Mukakuatula onanitumena maywi ci nanimitongwele ci muthze. Cohoni mupune, muthze ko kuliyala.'' ³⁷ Unone Paulusi ayepo amba kukwo, ''Hime atufulelile pa mbunga kokupila mulandu, hianga ci natwe twa Maroma-no kutupaka mukamenga. Honi mwafota kutupunisha kokupila anu? Lyombo! Akeye woliyo natutundishemo.'' ³⁸ akwakunyunga awopo akambela mukakuatula, ne apa ayuvile ci Paulusi na Silasi nawo Maroma, kuma ayapile. ³⁹ Mukakuatula ayepo keya kunalilombela kukwo ne ayepo wapunisha, nokuwaambela ci athze atunde mumbongi. ⁴⁰ Honi Paulusi na Silasi awopo atunda mukamenga nokuthza ku njiyo thza Lidia. Paulusi na Silasi apa amonine akakulitawa, awopo awakolopisha micima ne awopo atunda mumbongi.