¹ Akwelume wamweya aulumukile kutunda ku Judea kukeya ku Antioke nokuna fundisha akakulitawa, kuamba ci, ''Ngeci kamutwaliwa kumukanda kuthza ko shithzo sha Mushe, kamwa kuyoyishiwa.'' ² Eshi sha letile Paulusi na Barbanasi kulipilukela no kulikananisha no manene. Nehoni Paulusi na Barnabasi nawa amweya mukaci ko , kuma awa hangulile ci akandukele ku Jelusalema kukaliwana na apositola na akulu pa shipula eshi. ³ Awo nehoni, mukutumiwa ko keleke, apitile mu Foenisha no Samaria kwamba yo kualuka kwa anu angana. Aletile kunyanyuka kokulu kwakakulitawa wahe. ⁴ Ou akeile ku Jelusalema, awopo natambuliwa kwaka keleke na apositola na akulu, awopo atongola inu yoihe anakwama Nyambi kukwo. ⁵ Unone akwelume wamweya awa alitawile, awa akalile ku shipathsi sho afalisi, awopo aimana nokuamba, ''Kulishuwana kuwatwala kumukanda nokuwatuminina ci atuleke mulao wa Mushe.'' ⁶ Ne apositola na akulu awopo aliwana kuayala eshi shiamba. ⁷ Munyima thzo kuliipaula nene, Pitolosi ayepo imana nokuamba kukwo, ''Apange mwalimuka ci kunyima Nyambi hime ahangulile mukaci kenu, ci ko kanwa kange anu angana ayuve liywi lyo evangeli, no kulitawa. ⁸ Nyambi, oyu limuka mucima, onapaka kukwo ko kuwapa mupepo oukenu, eci eli akwamine kukwetu. ⁹ wakwamine kukana kuliya mukaci ketu noo, kwana kenisha micima thzo ko kulitawa. ¹⁰ Nehoni shinu mwine muelekela Nyambi, ci amwe mupake coko pa thsingo thza afundishiwi ethzi a tata wetu hianga yatwe katutwesha kuthziyelula? ¹¹ Unone twatawa ci henge twa kuyoyishiwa ko shihemo sha Fumu Jesu, eci eli akalile awo.'' ¹² Mbunga thzothzihe atutwalile kwa teelela Barnabasi na Paulusi kwatongola emonisha no ikomokisha eyo Nyambi akwamine mukaci ka anu angana ko kulikwathsisha awo. ¹³ Apa amanine kuamba, Jakobo ayepo tawa, kuamba ci, ''Apange muniteelele. ¹⁴ Simoni onamba eli Nyambi atatekile ko shihemo kukwathsa anu angana ci ashimbe mukaci ko anu enji. ¹⁵ Muywi o apolofita aliyuva nei, eci eli kunan'oliwa, ¹⁶ 'Munyima thzo ei inu henge nakuhuka, kalo henge nakuumba tavanakele thza Davida, ethzi thzina umbuluka; henhe mbela nithzimeka kalo no kuthzihushela nawa kalo, ¹⁷ ci anu anashiyala atweshe kufota Fumu, kuvandakana no anu angana awa aishiwa ko lithzina lyange.' ¹⁸ Eshi sholiyo eshi amba Fumu, oyu wakwamine ei inu yalimukahalile kukale. ¹⁹ Nehoni, ame nina ayala ci lelo twahumbisha awo anu angana awa ahuka kwa Nyambi. ²⁰ Unone henge tuwan'olela ci aloela kulihenga ku mathzilo o athzimu, ku uhule, no kunyama thzo iyama yo kuoiwa, kalo noku manyinga. ²¹ Mukonda Mushe naambiwa mumambongi oahe kutunda kushikati sho kukale ne kalo ataliwa muma sinagoge lyo sabata neli lyo sabata.'' ²² Nehoni kwamonahalile nawa kwa apositola na akulu, no keleke thzothzihe, ku hangula Judasi oyu ishiwa Barsabasi, no Silasi, awo akalile aendishi o keleke, no kuwatuma ku Antioke no Paulusi na Barnabasi. ²³ An'olile ei: ''Kutunda kwa apositola na akulu, apenu, kuthza kwa anu angana oapetum mu Antioke, Siria, no mu Silisha: twamivumenena! ²⁴ Mukonda tunayuvu ci akwelume wamweya anatundu kukwetu, awa tunakana kuambela, ne anamiyuvisha omango mu mioyo thzenu ko ifundisha yo, ²⁵ hime tunamono ci kuli shuawna kukwetu, atwe tunaliwana no mucima ofoci, kuhangula akwelume pofoci na ahemewa etu Paulusi na Barnabasi ²⁶ akwelume awa alihupwelile mioyo thzo mukonda wonlithgzina lya Fumu wetu Jesu Kelesite, nokuwatuma kukwenu. ²⁷ Nehoni tunatuma Judasi na Silasi, awa namiambela inu yokulipitula mumaywi o. ²⁸ Mukonda kwamonahalile owa ku mupepo no kukwetu, ci twamitweka mupango oulemu unone tumitweke inu iloela: ci mulihenge kuinu anakin'ena athzimu, manyinga, inu yo kuowa, kalo noku ku uhule. ²⁹ Ngeci mulihenge kuinu ei, henge kuloa kukwenu. Mushiyalepo.'' ³⁰ Honi awo, ou alitepile, awopo aulumuka ku Antioke; apa amanine kuwaneka mbunga pofoci, awopo awapa lin'olo. ³¹ Apa amanine kulitala, anyanyukile mukonda o kutanlishiwa. ³² Judasi na Silasi , kalo na apolofita, awopo ambela akakulitawa no maywi oangi okuwatanalisha. ³³ Munyima thzo kukala shikati oko, awopo ahushiwa kutunda kwakakulitawa kuthza kwawa awa tumine. ³⁴ Unone kwamonahalile ci Silasi aye kuma aloelile kushiyala. ³⁵ Unone Paulusi na Barnabasi awopo aikala mu Antioke, kwa fundisha nokuamba (na amweya owangi) liywi lya Fumu. ³⁶ Munyima thzo mayuwa kupita Paulusi ayepo ambela Baranabasi, ''Ngatuhuke honi kalo no kuthzingula akakulitawa mu mambongi momuhe omu twaambile liywi lya Fumu, tuwamone eli ali.'' ³⁷ Barbanabasi wafotile kalo kushimba Joani oyu naishanga ci Mreka ci athze no. ³⁸ Unone Paulusi waayalile ci kakwaloile kushimba Mareka, oyu wawashiile mu Pamufilia kalo kathzile kokule no muikwama. ³⁹ Nehoni akopo kupinduka kukana kuliyuva kokulu, honi awopo alitepa, ne Barnabasi ayepo shimba Mareka nokuvuwa nenji kuthza ku Sipurasi. ⁴⁰ Unone Paulusi wahangulile Silasi ne ayepo thza, munyima thzo kupakiwa mu shihemo sha Fumu ko akakulitawa. ⁴¹ Nehoni wapitile mu Siria no Silisha, kutanalisha makeleke.