¹ Paulu, musebezhi waka Jeso Kilisito, mwite kuba mwaapositolo alimwi musale ku mulumbe waka Leza, ² ngwaa kashomezha kale kale kwiita mu bashishimi bakwe ku malembe asalala, ³ ku makani a mwanakwe walo wa luhubo lwaka Devidi kwiingayina uku mubili. ⁴ Kwiita mu Moza usalala wakahuminwa u chansana kwaamba abe Mwana wa Leza kwiita mu kubuka kuhwa ku bafu, Jeso Kilisito Mwami wesu. ⁵ Kwiita mwakwe twatambula luse alimwi u bwaapositolo bwa kulibonzha kwa lushomo akati ka mashi, u kaambo kezhina lyakwe, ⁶ Akati ka mashi aza, Amwe mwakoompololwa kuba baka Jeso Kilisito.i ⁷ Kuli babo boonse mu Loma bafwunwa baka Leza alimwi bakatewa kuba bantu bakwe basalala: Luse lube kwenu alimwi u luumuno luhwa kwa Leza Ushesu alimwi u Mwami Jeso Kilisito. ⁸ Kutaanguna, ndalumba Leza wangu kwiita mwa Jeso Kilisito u kaambo kwenu noonse, u kaambo ka lushomo luundu loonse balaamba bulyo sha lushomo lwenu. ⁹ Kaambo Leza ngu kamboni wangu, wezo ngu nsebezela mu moza wangu mu mulumbe wa Mwanakwe, u kukakatila kumubanda umwe. ¹⁰ Lyoonse ndakumbila mu kupayila kwangu kwaamba ati kufwumbwa inzhila ndahwililila mu kuzanda kwa Leza ndazhiza nkumubele. ¹¹ Ndazandisha kumubona, mupe chipo chaku moza, kwaamba ati muzumye zumye. ¹² Kukuti, ndazanda kuzumizhiwa cha bwini akati kenu, kwiita mu luzhomo lwa umwi uumwi, u lwenu alimwi u lwangu. ¹³ Inzho shizanda kwaamba umwe muukwiina nchimwizhi, nubakwesu, kwaamba ati ndazandisha lyoonse kwiza nkumubele (pele kuli nchinkasha kushichila u ninzho), kwaamba mukwate michelo akati kenu amwe, umbona mbundakakwata akati kabahwa mashi. ¹⁴ Ndyeelele kuchitila boonse ba Giliki u bahwa mashi, antoomwi u basongo alimwi u balimbushi. ¹⁵ Ubobo, ukoya lwangu, ndalibambila kukambauka mulumbe mubotu ukuli umwe nimuli mu Loma. ¹⁶ Kaambo nshifwiinsoni ku mulumbe, kaambo nshiinsana shaka Leza sha lufutuko sha umwi uumwi ushoma, cha kutaanguna kuba Juda alimwi uba Giliki. ¹⁷ U kuti muli chechi bululami bwa Leza bwazubululwa kuhwa ku lushomo, umbona mbuchakalembwa, "Baluleme balapona mu lushomo." ¹⁸ Kaambo bukali bwa Leza bulazubululwa kuhwa kwizeulu kuli babo batachiti sha buna leza alimwi u shitali sha bululami u bantu balo kwita mukuchita shitaluleme baseseka bwini bwini. ¹⁹ Chechi chili bobo kaambo checho chizhibikilwe ku makani aka Leza chilalibonya nkubabele. Kaambo Leza wa bazubululila. ²⁰ Kuhwa luundu lelyo nilwakalengwa, bubambe bwa kutalibonya kwakwe, kwaambisha ku nsana shakwe shiteeli alimwi u bubambe bwa bulenge bwakwe, shakalibonya antangalala, lelyo nibakashiteelelesha shintu shesho nshaakalenga. Ubobo kwiina butame. ²¹ Ubobo, nikuba kwaamba ati kabatwizhi twaambo twaka Leza, bayina niba kamutembaula ukoya Leza, nikuba kumulumbayizha. Pele, bakaba balimbushi mu mizeezo yabo, alimwi u myonzo yabo itazeeza kabotu yakaba mu mushinze. ²² Nikuba kuti bakalibika kuba basongo, pele bakaba balimbushi. ²³ Bakabuchincha bulemu bwaka Leza utafwi ku chinkozha cha chibumbwa cha muntu ufwa, u bazuni, u banyama bafwumba shone, alimwi u shintu shikalaba. ²⁴ Ubobo Leza wakabaleka kuchita shizanda u myonzo yabo shamafwunze, kwaamba mibili yabo itakwati bulemu akati kabo. ²⁵ Mbubeni bakachincha bwini bwaka Leza kuba bwa bubeshi, alimwi babo bakakomba u kusebezela bulenge kubaala wakabalenga, wezo ulemekwa kwa lyoonse. Ameni. ²⁶ U kaambo ka chechi, Leza wakabaleka kuchita shintu shuusha insoni, bakaintu babo bakashichincha shintu mbuli mbushaakweelele kuchitwa bakashichitila munzhila inji. ²⁷ Muzhila yezhi njiyona, balombwana abo bakaleka kuchita mbubachitwa bakaintu bakazandisha kutwalana beni u beni. Baba kabali balombwana bachita chechi chuusha insoni u balombwana bamwi alimwi bakatambula chisubulo chibeelele mukuchita shamafwunze. ²⁸ Alimwi mbubona mbubatakahwumina kuba u Leza mu luzhibo lwabo, wakabapa muzeezo yabo beni mibiyabi, kwaamba ati bachite shintu shesho shiteelele kuchitwa. ²⁹ Bakazuzhiwa shitali sha bululami, bubiyabi, alimwi u buhwizhi. Balizwile munyono, buyazhi, bulwati, luchengo, alimwi u mizeezo mibiyabi. Mbahwizhi, ³⁰ baswile Leza, batateeleli, bashichisapi, u balikuumusha, ubaya bulanga kuya buchita shibiyabi; tabateeleli bazhali babo. ³¹ Bayina matelaishi, bayina lushomo, bazuma myonzo, alimwi tabalekelela. ³² Balizhi kabotu kabotu malailile aka Leza, alimwi babo bachita shesho shintu balyeelele kufwa. Pele tabachiti bulyo sheshi shintu, alimwi balabahwuminina babo bashichita.