¹ Inzho lushomo nkutazuluzha ku shintu shesho nshitulangila alimwi u bumboni ku shintu nshitabonwa. ² Kaambo ka chechi ba shaakale besu bakashomwa mu lushomo lwabo. ³ Kwiita mu lushomo tulahwumina ati inshi ya kalengwa kwiita mwizwi lyaka Leza, ubobo sheshi shibonwa shiina nishakapangwa kuhwa ku shintu shesho shakaakubona. ⁴ U kaambo ka lushomo Abelo wakapa chipayizho chibotu chitambulika kwa Leza kubaala nchaakapa Kaini, muli checho wakabikwa kuba mululami, alimwi Leza mwini wakapa bumboni u kaambo ka shipo shakwe, alimwi u kaambo ka lushomo Abelo u chikanana, nikuba kwaamba ati uli fwile. ⁵ Kwiita mu lushomo Enoki wakatolwa kwizeulu kwaamba ati atabi naabona lufwu. "Wiina naakayanwa, kaambo Leza wakamutola." Katana kutolwa kwizeulu, kwakapewa bumboni bwa kuti wakabotezha Leza. ⁶ Inzho bwiina lushomo chilakatazha kumubotezha Leza. Alimwi chilazandika kwaamba kufwumbwa u swena kwa Leza ulyeelele kushoma kwaamba ati nkwaali alimwi ulapa bulumbu kuli babo bamukapula. ⁷ U kaambo ka lushomo Nowa, wakapewa mulumbe wa shintu shitana kubonwa, u chabulemu wakabeza bwato kwaamba afwutule bang'anda yakwe. Mukuchita chechi, wakoombwezha luundu alimwi wakatambula bululami kwiingayinya u lushomo. ⁸ U kaambo ka lushomo Abulahamu, lelyo naakoompololwa, wakateelela amane wakaya ku busena bobo mbwaaya kutambula ukoya lukono. Wakaya, katakwizhi nkwaakaakuya. ⁹ U kaambo ka lushomo wakakala muchishi cha chishomezho ukoya muhwamashi. Wakakala mu matente u Ayizeki alimwi u Jakobo, bashikukonanina chishomezho. ¹⁰ Kaambo kalangila munzhi mukando uuli mwiimbi muzumu, walo wakatelaikwa alimwi u zaka ngu Leza. ¹¹ U kaambo ka lushomo, nikuba kwaamba ati lwakwe mwini Saala katazhali, wakatambula cheelelo cha kumita. chechi chakachitika nikuba kwaamba ati kali muchembele, kaambo waka mushoma wezo walo wakapa chishomezho. ¹² U bobo, kuhwa ku muntu wezu womwi--alimwi kali ukoya mufwu--nkukwakahwa mazhalane banji banji aali ukoya intongwezhi mwizeulu alimwi ukoya musenga utabi kubala waku lwaatele. ¹³ Kamuli mu lushomo baba boonse bakafwa chakutatambula shishomezho. Nikuba bobo, bakabona alimwi bakabaanzha kuhwa alaale, alimwi bakazhibisha kwaamba ati kabali bahwamashi alimwi kabali beenzu ano anshi. ¹⁴ Kuli babo baamba shintu shili bolya balachibika atuba kwaamba ati balaya bulanga chishi cha kukala. ¹⁵ Naakuti nibakaakutelaika ku chishi checho chalo nchibakashiya, nibakalozha kupiluka kufwumbwa chiindi. ¹⁶ Pele nikuba bobo, kabazandisha chishi chili kabotu, walo, munzhi wa kwizeulu. U bobo Leza tafwi insoni kutewa ati ngu Leza wabo pe, mbukuli ati wakababambila munzhi mukando. ¹⁷ U kaambo ka lushomo Abulahamu, lelyo naakasunkwa, wakapa Ayizeki kuba chipo. Kali mwanakwe iche wezo ngwaakapa bu chipo, wezo walo wakatambula shishomezho. ¹⁸ Ukwa Abulahamu inkuko kwa kaambwa ati, "Kwiita mwaka Ayizeki mazhalane woonse alakawulikwa." ¹⁹ Abulahamu kezhi kwaamba ati Leza ulalozha ku mubusha alimwi Ayizeki kuhwa ku bafwu, alimwi chakutazumbauzha mukwaamba, kuhwa kuli mbabo wakamutambula. ²⁰ Kakuli alimwi kwiita mu lushomo kwa shintu shizhiza kwaamba ati Ayizeki wakalongezha Jakobo alimwi u Isau. ²¹ Kwiita mu lushomo Jakobo, lelyo naakaakuzanda kufwa, wakalongezha umwi umwi mwanakwe Jozefu. Jakobo wakakomba, kumwi kalishaaminine amusako wakwe. ²² Kakuli kwiita mu lushomo Josefu, lelyo mamanino akwe naakashika, wakaamba bweende bwa bana ba Izilaili kuhwa mu Ijipiti u kubalailila makani shifwuwa shakwe. ²³ Kwiita mu lushomo Mozesi, lelyo naakazhalwa, bazhali bakwe bakamusoseka kwa myezhi yotatwe kaambo bakabona kwaamba ati kali mwana mubotu. Bayina nibakaatiya malailile a mwami. ²⁴ U kaambo ka lushomo Mozesi, naakakomena, wakakaka kutewa ati mwanakwe Falawo mukaintu. ²⁵ Wakasala kwaamba ati apengele antoomwi u bantu ba Leza kubaala kutangala u misobano ya chibi kwa chiindi chishoonto. ²⁶ Wakalibika kubula bulemu u kaambo ka Kilisito kuba bulumbu kubaala bubotu bwa mu Ijipiti, walo kalanga kumbele ku bulumbu bakwe. ²⁷ U kaambo ka lushomo Mozesi wakamuhwa mu Ijipiti. Wiina naakatiya bukali bwa mwami, wakatolelela ukoya wakaakumubwene wezo walo utabonwa. ²⁸ U kaambo ka lushomo wakabamba ikubi alimwi u kusansaila bulowa, kwaamba ati shikuyaya wa bana bataanzhi atabi naayaya bana ba Izilaili bashoonto shoonto. ²⁹ U kaambo ka lushomo bakayita a lwaatele lwa mabu ukoya bayita anshi inzumu. Baku Ijipiti nibakasoleka kwaamba bayite, lwaka bahwumba boonse. ³⁰ U kaambo ka lushomo bwaanda bwa Jeliko bwa kawa, nibakamana kubuzhinguluka kwa mazuba aali chiloba. ³¹ U kaambo ka lushomo Lahabu muhwuule wiina u kafwa u babo batakaakuteelela , kaambo kakuti wakatambula ba shikutwela mu luumuno. ³² Nchiinzhi chimwi nchinkonzha kwaamba? Ndiina chiindi chakuti ng'ambe aba Gidiyoni, Balaki, Samusoni,Jefwuta, Devidi, Samuwele, alimwi u bashinshimi. ³³ Kakuli kwiita mu lushomo kwaamba ati balozhe kuzunda mami manji manji, bakachita bululami, alimwi u kutambula shishomezho. Bakalesha milomo yaba shuumbwa, ³⁴ bakamanya insana sha mulilo, bakanununwa kuhwa ku macheba, bakazuma kuhwa ku bulengushi, bakazunda munkondo, bakazunda bashikalumamba bahwamashi. ³⁵ Bakaintu bakatambula bafwu babo kwiita mu kubushiwa lwabili. Bamwi bakapenzhewa, kabatahwumina kulekwa, kwaamba bakayane bubuke bubotu. ³⁶ Bamwi bakasampaulwa u kuumwa, alimwi u macheni u kubikwa muntolongo. ³⁷ Bakayaswa mabwe. bamwi bakakosolwa mushipazha shobile. bamwi bakayayiwa icheba. kabasama shikanda sha mbelele alimwi usha mpongo. Kabali bapushi, kabapenzhewa, alimwi u kutonkayikwa. ³⁸ Alimwi bantu bali bobo kabatazandika mono mu luundu. Kabazhinguluka munkanda alimwi umu mapili, umu myaako ya mabwe alimwi u mushilindi shaanshi. ³⁹ Nikuba bobo boonse bantu baba bakahwuminwa kwa Leza u kaambo ka lushomo lwabo ,bayina nibakatambula chishomezho. ⁴⁰ Leza wakatuchitila uswe chintu chibotu, kwaamba ati u kwiina uswe, nibatakalulamikwa.