¹ Walo wakaunka wahvwa uko a kuboola kucihyi cakwabo, alimwi abalo bahikwiiya bakwe bakamutobela. ² I Nsabata noyakahyika, wakayiihya mu synagogue. Bantu banji bakamunhvwa alimwi bakagambwa. Bakati, ''Wakazhyiyana kuli injihyo izhyi?'' ''Mbusongo nzhyi ubu bwalo ubwakapewa kuli nguwe?'' ''Maleele nzhyi aya ngacita amatanhyi aakwe?'' ³ Hena uyu tali himuhwala mapulanga, mwana waa Mary alimwi kali munyina James alimwi a Joses a Judas a Simon? Hena bana bakwabo bahyimbi tatuli limwi ano?'' Balo bakabiilwa a Jesu. ⁴ Jesu wakaamba kuti kuli mbabo, ''Munhyi nhyimi kunyina nanga takwati bulemu, cita buyo mumunzhyi wakwabo alimwi aakati kabasazhyinyina a mung'anda iini yakwabo.'' ⁵ Taaka cikonzhya kucita uumbi mulimo mukando, cita buyo kubika matanhyi aakwe ali bamwi baciswa bahyoonto buyo a kubaponya balo. ⁶ Wakagambwa akutahyoma ukwabo. Mpoona wakaunka kuyaa kuzhyinguluka muminzhyi kuyiihya. ⁷ Mpoona wakaita abali ikumi a bobile alimwi akutali kubatuma bobile bobile, alimwi wakabapa insana izhyakukwihya myoza mibyaabi, ⁸ alimwi akubalailila kuti batabi nobabweza cintu nociba comwe mu lweendo ulwabo, cita buyo inkoli - kunyina cinkwa, kunyina kaputumende, alimwi kunyina a mali muntambo zhyabo zhya mucibuno - ⁹ pele kusama buyo impato, alimwi kutali kusama zhyisani zhyobile. ¹⁰ Wakaamba kuli mbabo, ''Kuhwumbwa nomwanjila iying'anda, kamukkala kuhikila mukahvwe uko. ¹¹ Kuti kukabe munzhyi mobata mutambuli nokuba kumuteelela mwebo, mwaaku buhyiya busena ubo, muka kunkumune kahwuko ka kumaulu eenu kuti bukabe bumboni kuli mbabo.'' ¹² Bakahvwa bakaunka alimwi bakaa kukambauka kuti bantu beelele kusanduka. ¹³ Bakatanda bahyikazwa banji, alimwi akunanika mahwuta bantu banji abaciswa alimwi akubaponya balo. ¹⁴ Mwami Herod wakanhvwa ici, akaambo kakuti izhyina ilyaa Jesu lyaka kwata impuwo imbotu. Bamwi bakali kwaamba kuti , ''John mubbizhyi wakabuka kuhvwa kubahwu, alimwi nka kaambo kaako izhyi insana zhya maleele zhyilabeleka mulinguwe.'' ¹⁵ Abambi bantu bakaamba kuti, ''Ngo Elijah.'' Alimwi abamwi bakaamba kuti, ''Uyu muntu muhyinhyimi, umbona mbuli umwi waba hyinhyimi aba muzhyiindi zhyakalakale.'' ¹⁶ Pele ilyo Herod naakanhvwa ceeci wakaamba kuti , ''John, ngwinda kakosola mutwi, wabuhyiwa.'' ¹⁷ Nkaambo Herod wakatumine mulomo wakuti John aangwe alimwi wakamwaanga walo muntolongo mukaambo kaa Herodias (mukaintu muka munyina Philip), nkaambo wakaza kumutwala uyo mukaintu. ¹⁸ Nkaambo John wakaambila Herod kuti, ''Tacili mu mulawo kuti webo utwale muka munyoko.'' ¹⁹ Pele Herodias wakakwatilila kubukali ubwa kulwana John alimwi akuyandihya kumuyaya, pele tii cakakonzhyeka, ²⁰ nkaambo Herod wakali kumuyoowa John; walo wakali kumwizhyi kuti muntu uusalala alimwi muntu uululeme, alimwi wakamulela kabotu. Kuteelela makani aaya kuli nguwe cakamucita kuti anyongane kapati, pesi kakuli wakali kumuteelela icakukondwa. ²¹ Mpoona limwi buzuba bweelele bwakahyika ilyo Herod naakali kusekelela kusekelela buzuba bwakuzhyalwa bwakwe alimwi wakabambile cakulya icababelehyi bakwe a bahilutwe alimwi abasololi baku Galilee. ²² Mwana muhyimbi waa Herodias ulwakwe wakaza kunjila alimwi akubazhyanina balo, alimwi cakabotela Herod alimwi a beenzu bakucilyo cakwe mbwaakazhyana. Mwami wakaambila muhyimbi kuti, ''Kombuzhya kuhwumbwa ncoyanda alimwi ndacipa kuli ndiwe.'' ²³ Walo mwami waka konkezhya kuli nguwe muhyimbi wakaamba, ''Kuhwumbwa nchondomba mebo, ndakupa, kuhyiikila kucisela ca bwami bwangu.'' ²⁴ Muhyimbi wakahvwa waunka a kwaamba kuli ba banyina, ''Ninzhyi nciti mulombe mwami kumpa?'' Banyina wakati, ''Mutwi waka John Mubbizhyi.'' ²⁵ Ndilyona wakabindaana wapiluka kuya ku mwami, a kumulomba, waamba, ''Mebo nyanda kuti umpe, ono so, mutwi waka John Mubbizhyi kauli mu mutiba wacisamu cibezelwe.'' ²⁶ Nokupa kuti ici cakamucisa cinicini mwami, taakali kukonzhya kumukahya kulomba kwakwe mwana muhyimbi akaambo kacikonke ncaaka bamba alimwi akaambo kabeenzu bakwe bahikulalila. ²⁷ Aboobo mwami wakatuma hikalumamba kuhvwa kubalindizhyi bakwe a kumulailila walo kuti aulete mutwi waka John. Mulindizhyi wakaunka a ku mukosola mutwi John muntolongo. ²⁸ Wakauleta mutwi wakwe mu mutiba wakubeza alimwi akuupa ku muhyimbi, a walo muhyimbi wakaupa kuli ba banyina. ²⁹ Mpoona bahyikwiiya bakwe noba kaateelela aya, bakaboola akubweza mubili wakwe alimwi akuya kuubika mucuumbwe. ³⁰ Bama apostles bakaboola antoomwe a Jesu a ku mwaambila walo zhyoonse nzhyo bakacita alimwi akuyiihya. ³¹ Mpoona walo wakaamba kuli mbabo, ''Kamuboola muhvwe mulicenu tuye kubusena bwa nkanda kutontola a kulyookezhya kahyoonto buyo.'' Nkaambo kakuti banji bakali kunjila a kuhvwa, alimwi tobakakwete a ciindi ca kulya. ³² Aboobo bakahvwa baunka a bwato kuya kubusena bwa nkanda balo beni mulicabo. ³³ Pele bantu baka babona nobakali kuhvwa kuunka alimwi baka bazhyiba balo, alimwi bantu bakatiyaana boyoboloka antoomwe a maulu kuhvwa mu minzhyi yoonse, alimwi bakahyika kulya kumbele lyabo. ³⁴ Ilyo nobakahyika ku nkomwe, walo Jesu wakabona inkamu yabantu inkando alimwi akuhwa luzhyalo ali mbabo nkaambo bakali buyo mbuli imbelele zhyinyina mweembezhyi. Aboobo wakakanka kubayiihya zhyintu zhyinji. ³⁵ Nolyaka hika woola lya mangolezhya, bahyikwiiya bakwe bakaboola kuli nguwe a kwaamba kuti, ''Ubu mbusena ubunyina cintu alimwi iwoola lyaba kale lya mahiku. ³⁶ Baambile bantu baunke kutewa baye mumasena a minzhyi ili muhwaahwi kuti bakaule zhyintu zhya kulya izhyabo beni.'' ³⁷ Pele walo wakaingula a kwaamba kuti kuli mbabo, ''Mwebo kamubapa cakulya balye.'' Balo bakati kuli nguwe, ''Hena inga twaunka a kuya kuula cinkwa ca myaanda yobile ya ma denarii a kubapa ncico cinkwa kuti balye?'' ³⁸ Wakati kuli mbabo, ''Ino mukwete zhyi loohwu zhyo ngaye mwebo? Kamuya mulange.'' Nobakamana kulanga, bakaamba kuti, ''Kuli zhyo sanwe zhyi loohwu alimwi a tuswi tobile.'' ³⁹ Walo wakalailila bantu boonse kuti bakkale anhyi mutubunga bunga mubwizu bwaka mweenhvwe. ⁴⁰ Bakakkala anhyi mutubunga bunga utwa myaanda atwa makumi osanwe osanwe. ⁴¹ Wakabweza zhyi loohwu zhyosanwe alimwi atuswi tobile, alimwi kumwi kalangile kwizeulu wakacileleka alimwi aku komoona zhyi loohwu a kubapa bahyikwiiya kuti basombe bantu. Alimwi wakaazaula a tuswi tobile wabasomba boonse buyo. ⁴² Bakalya boonse buyo kuhyiikila bakalamwa. ⁴³ Bakabwezelela buhwehwelenga bwa cinkwa, mintaanga iili ikumi ayobile iizwile, alimwi abwa tuswi. ⁴⁴ Uko kwakali ba malombwana abali zhyuulu zhyosanwe bakalya zhyi loohwu. ⁴⁵ Mpoona buyo aawo wakabacita kuti bahyikwiiya bakwe banjile mu bwato akusolola kuli nguwe kuya kwitala lyakokulya, kuya ku Bethsaida, walo mbwakacili kumwaihya inkamu ya bantu kuti baunke. ⁴⁶ Noba kamaninina kuunka, walo wakatanta a mulundu kuya kupaila. ⁴⁷ Kwakahiya, alimwi a bwato ono bwakali kale akati kati kalwizhyi, alimwi wakali alike anyika njumu yankomwe. ⁴⁸ Wakabona kuti bakali kukazhyanya amayiwe makando makando, aakaambo ka kuti iguwo lya mulwizhyi lyaka balwana. Noolya kalondelela kuhyika iyoola ilyane lya mahyiku wakabeenzhya, kayaa kweenda atala a lwizhyi, alimwi wakali kuyanda kubaindilila balo. ⁴⁹ Pele nobaka mubona walo keenda atala a lwizhyi, balo bakayeeya kuti ncizwa a kulila ca koonglola, ⁵⁰ nkaambo balo bakamubona alimwi bakapengana. Mpoona aawo walo wakakanana kuli mbabo a kwaamba kuti, ''Kamukwata camba! Inta ndime! Mwebo mutayoowi!'' ⁵¹ Walo wakanjila mu bwato ambabo, alimwi iguwo lyakaleka kuunga. Balo bakakankama icakumaninina. ⁵² Nkaambo kakuti tobaka citeelelehya ncozhyakali kwaamba zhyi loohwu zhya cinkwa. Anu kuti, myoyo yabo yakayuma oobuya. ⁵³ Nobakalanduka kwitala ilya lwizhyi, bakahika kunyika ya Gennesaret alimwi akwaanga bwato bwabo. ⁵⁴ Nobakahvwa mu bwato, bantu balo bakamuzhyiba mpoona aawo, ⁵⁵ a kutiyaana busena bwacooko boonse alimwi akukanka kuleta ba malwazhyi amasasa kuhwumbwa mpoba kateelela kuti mpabele. ⁵⁶ Kuhwumbwa leelyo walo nakanjila mu minzhyi, naa madolopo, naa mumasena aa musokwe, bantu bakali kunga balabika ba malwazhyi mu masena aamihika. Balo bakali kumulomba kuti abahvwumizhye kukwata kambele kacibaki cakwe, alimwi bunji bwa boonse abaka mukuma walo baka ponezhyewa.