¹ Jeso aha shamana oku wamba zintu zonshe ku bantu, na kabira mwa Kapenauma. ² Omukuru ubashi nkondo kakwesi o mwika ozyu kashaka hawa, mi kali murwele kame kena hafwihi nokufwa. ³ Omukuru ubashi kondo aha ashuwa za Jeso, paha shatuma abakuru bechi Juda, yekute akezye ahoze omwika wakwe. ⁴ Aha shiba hura kwa Jeso, ba kumukumbira hawa, ye, "Ozyu muntu abotere ye omutendere, ⁵ chokuta ye ashaka hawa e chishi chetu, mi ndeye natu zyakira ama sinagoge etu." ⁶ Paho Jeso sha zwira habuso nabo. Kono aha shaka kere hafwihi ne njuwo, omukuru we nkondo aku tumina ko abayenze bakamute ye, ''Nfumu, waha likatazi, kakuli ndazya kuswanere ye okabire munjuwo yangu. ⁷ Ke baka li ninda kibona ye kandirukeli kukyezya kwako, kono o ambe bulyo ezywi mi mwika wangu mbwa hore. ⁸ Kakuta ye neme ndiyendiswa kubakuru, neme ndiyendesa bashi nkondo. Ndishi ta ye, 'Yende,' ayenda, ndishita zyumunya ye 'Kezye,' akezya, ndishita no mwika wangu ye, 'Tende chi,' neye akuchitenda." ⁹ Jeso aha shuwa zi, na mu komokwa, mi a kuzokera kwi dhxandiya kaimucilile akuta ye, "Ndimisumwina ye, nanga kwa Isiraere ndishini kubona entumero yobulyena." ¹⁰ Kame bena ni batumiwa aha shibaka boora kunjuwo, ni bakezya kuwana mwiika naholi. ¹¹ Kuzwa ho Jeso nayenda ku munzi ukuwiwa Naeni, abazyiizwa bakwe ne chigugi cha bantu baku yenda neye. ¹² Aha shaka shunine ha chizyi cho munzi, mubone, o mukwame ozyu kafwite kahinditwe, mwana yenke kubanyina (o mufwirwa ), mi bantu bangi bo mu munzi kabena neye. ¹³ Aha shamu bona Nfumu, namufwira hawa nshe nokumuta ye, "Waha lili." ¹⁴ Paha shamu shunina noku kwata eshasha kabamuhindire, mi aba kaba muhindite ni ba zyimana. Akuta ye, ''Muroba, ndikuta ye, buke." ¹⁵ Omufu paho shabuka nokukara no kutatika kuamba, mi Jeso aku mutambika kwa nyina. ¹⁶ Paho shibatiya hawa bonshe, boku zwira habuso kumuha tumbo Nyambe, ne bata ye, "O muporofita munene na zikuki mukati ketu" kame "Nyambe na tondi bantu bakwe" ¹⁷ Eyi mbuzi yoku zyura mu munzi wonshe wa Judeya ne i munya minzi kai na hafwihi. ¹⁸ Bazyiiswa ba Johani niba musumwina zonshe zi zintu. ¹⁹ Johani paha shakuwa bazyiiswa bakwe bo bire no ku batuma ku Nfumu kuta ye, "Ndiwe niwa tewa kukezya, kapa tuka shake ungi?" ²⁰ Aha bahura hafwihi ne Jeso, omukwame zyumwi akuta ye, "Johani Mukorobezi naka tu tumi kwako kuta ye, 'Ndiwe okyezya kapa tuka tonde wungi?'" ²¹ Mweiyo nako na hoza bantu bangi abarwele ne be myoya mibbi, kame noku bofu naaba bonesa. ²² Jeso akuba taba ye, "Aha shemu boora, muka sukurwire Johani ezi mwa boni noku shuwa. A bofu bakwesi ba bona, ezi yanga zikwesi ziyenda, bashi mbingwa bakwesi bachenesewa, a baru bakwesi ba shuwa, a bafu bakwesi ba buka no kuhara, na ba baazya bakwesi bashuwa embuzi ndotu. ²³ O muntu zyo kali shaka asiye kundi zumina kakuya kezi ndi tenda a fuyawirwe." ²⁴ Aha shiba nabooli aba niba ka tumiwa kwa Johani, Jeso akutatika kusumwina chinalyanga za Johani kuti ye, "Chinji namwa yendera ka bona mwi nkanda? Karuli rutaka ru hungiswa ku ruho? ²⁵ Nga chinji nemwa yendera kabona? Mukwame azwesi zizwato zi rotu? Kamutonde, aba bazwata ezi zwato zirotu, no kuhara nenja bena mu mazyuwo aba nfumu. ²⁶ Nga chinji nemwa yendera kabona? O muporofita? Ee, ndimi sumwina, ahita o muporofita. ²⁷ Zyunu ndeye na ñoliwa, 'Bone, ndikatuma omutumiwa wangu habuso bwako, Ozyo shaka na tende nenja njira yako.' ²⁸ Ndimita ye, kubantu bonshe aba niba pakiwa kwaazya ahita Johani. Omucenya mu mubuso wa Nyambe ndo mukuru kwakwe." ²⁹ Aha bashuwa zo bantu, ne ba telisi, niba bonisa e niti ye Nyambe achena, aha kaba korobezwa mu korobezo ya Johani. ³⁰ Kono aba falisi neba zyiisi bo murao we ci Juda niba kana omuhupuro wa Nyambe kwabo, kokuta ye kali niba korobezwa mwi kolobezo ya Johani. ³¹ Kunji he, oku ndiwora ku kozesa a bantu belinu eshika? Mbuti ba fwana? ³² Bafwana mbwe bance bakwesi ba zanina ha maulisizo, nebakere neba kikuwa ye, 'Twami lilisizi enshengo, kame ka mwazani. Twami zyimbili ruzyimbo rwa mafu, kame ka mwalili.' ³³ Kakuli Johani kali kalya enkoko kapa kunywa waine, kame muta ye, 'Akwesi oruho rubbi.' ³⁴ Omwana wo muntu kalya no kunwa, kame muta ye, 'Bone, ozyu mulyabi no budakwa, muyenze wa ba telisi ne batenda zibbi! ³⁵ Kono obutali ni bwana kipaka ku banabo bonshe." ³⁶ Zyumunya o mufalisi oku kumbira Jeso ye akyezye alye neye. Jeso aha shakabira munjuwo yo mufalisi, akukara ye alye. ³⁷ Bone, kakwina omukentu wa mumo mu munzi, ozyu katenda zibbi. Aha sha shuwa ye Jeso akalya munjuwo yo mufalisi, nareta akateneana ka mafuta a nunka nenja. ³⁸ Aku kezya kumuzyimana murushara rwa Jeso ha matende akwe, nalila, akutatikya kumu bombesa kumatende akwe ne nsozi zakwe, mi akuzi singura ne shunki zakwe kame na chuchuna ha matende akwe no kusinga ho a mafuta a nunka nenja. ³⁹ O mufalisi ozyu na kuwa Jeso aha shabona bulyaho, aku liazyara ye mwini, kuta ye, "Ozyu mukwame nali muporofita, nazyi ye ozyu mukentu amukwata-kwata mu tenda zimango." ⁴⁰ Jeso akumutaba kame nata ye, "Saimoni, kwina ezindishaka kuku sumwina." Akuta ye, "Wambe, muzyiisi!" ⁴¹ Jeso akuta ye, "Omuntu zyumunya na kolotisa abantu bo bire. Zyumunya ka korota makumi amakumi e anja, kame zyumunya makumi e anja. ⁴² Aha bakangwa ku mulifa, na ba kwatira bonshe. Kokuta ye, ndini abotere kumushaka hawa?" ⁴³ Saimoni akumutaba ye, "Zywina we cikoroti cinene." Jeso paha shamuta ye, "No tabi nenja." ⁴⁴ Jeso akuzokera ku mukentu nokuta Saimoni ye, "Obwene zyu mukentu. Ndakabili munjuwo yako. Konondihi menji akuma tende, kono na bombesi matende angu ne zi sonzi zakwe no kuzi singura ne nshuki zakwe. ⁴⁵ Kono ndi chunchuni, kono mwinako eyi ndahuli bulyo kanasiyi kuchunchuna matende angu. ⁴⁶ Konondi singi mafuta mumutwi, kono nasingi matende angu na mafuta a nunka nenja. ⁴⁷ Paha ndimita ye, e zibi zakwe, ezi kazili zingi, zakwatirwa- kokuta ye na shaka hawa. Kono ozyu na kwatirwa kanini, a shaka kanini." ⁴⁸ Paha shamuta ye, " e zibi zako za kwatirwa." ⁴⁹ Aba kalya nabo bokutatika ku ki ambauza, "Ndini zyu a wora kukwatira ne zibi?" ⁵⁰ Jeso paha shata mukentu ye, "E ntumero yako yaku hazi. Yende ke nkozo."