¹ Alaɓe diki Wɔ̃keni tuuke ye, Mɛrɛyamu Magadaliya, Mɛrɛyamu Yakubu ɓɔɔ Salomi yĩngɓi ɓɔɔ Yusuu yii woo nung sini aruɓe yii daa sɔ̃ɔre Yeso a bii. ² Ni gandi zibĩni a diki shɔni, yii wa yusa alaɓe la keye ɓe. ³ Yii shãngke ni weni, "Ɓi we daa gɔ̃ɔse wo tara ɓe a yãa yusa mi weya?" ⁴ Alaɓe yii peng nung ye ni paa, yii ze ke shɔng gise tara ɓi ye ni gaa, aruviya tara ɓi bɔrɔ. ⁵ Yii ɓoo vusu yusa a ze jekasa ɓɔɔ ni fara a bii puru shãng, wɔ̃ng ye ni kaa nashãng, bii za yii ke. ⁶ A gãle yii ni, "Nɔ na za vɔɔ ɓa. Nɔng bee Yeso, shɔng Nazara, ɓe shɔng jishe wu. Yupa yeǃ Wu ɓa a mɔmi ɓa. Nɔ mile mɔngɓe shɔng yɔɔ wu ta. ⁷ Nɔ wata, nɔ waa gãle wu jaadɔɔyi ɓɔɔ Bituru, "Ing wa a tĩng a Galili. A mɔng wa ko nɔng ze wu ke, anaɓe gãle nɔ ɓe."' ⁸ Yii ke gaa a yuu a sɔɔ yaa yusa; yii bii de zateni yii de za vɔɔ ni. Yii de shãngshe shɔngɓɔɔ ruu ɓɔɔ ɓa aruviya yii a vusu zani. ⁹ Ni gandi zibĩni a diki shɔni a tũmpu diki wɔ̃keni, a tũmpu ɓe yupa, a ke shɔni a Mɛrɛyamu Magadaliya bii , wuko sooye ɓe kese vĩnivĩvĩ rãmang nawa tati awu bii. ¹⁰ A wa gãle shɔngɓe yii ni wu ni, alaɓe yii dong a viki yato ɓɔɔ kaani yãa vɔɔ. ¹¹ Yii tãa ke ni wu dong ni wu surubi sooye ɓi sɔɔ ze wu ye, yii sɔɔ de azɔng ɓa. ¹² A tũmpu viɓemiyi sɔɔ keseyi a zɔng ɓɔɔ tok tok a shɔngzeng ziti miyi bii alaɓe ying knle ying waa vusu koo. ¹³ Yii sɔɔni tũmpu a wa gãle shɔng gãasi yii, yii de sɔɔ azɔng ɓa a yini ɓa. ¹⁴ Yeso sɔɔ ke a kop atu goro ɓiyi bii alaɓe yii wɔ̃ngre ye a kati teburu, a sɔɔ gɔ̃ɔre yii kɔse yii yãa aruɓe yii de azɔng ɓa ɓɔɔ yii lakeni sĩngsĩng, aruviya yii de azɔng ɓa a shɔngɓe yii ze wu ɓa alaɓe yupa a yusa. ¹⁵ A gãle yii ni, "Wata a vusu koodanga walikãng, nɔ waayãa polo ruu tɔ̃ɔving a shɔng koodanga yii bii walikãng. ¹⁶ Shɔngɓe na azɔng ye sɔɔ pele Batizima ing kpeng, shɔngɓe na de azɔng ɓa shɔng lese wu. ¹⁷ Vii taseni ɓemi ing waani shɔngɓe yii azɔngː Ang vusu rĩng yĩng kese vĩnivĩvĩ rãmangyi. Yĩng shãngke polo yãakoo ɓɔɔyi. ¹⁸ Yĩng too sɔkɔ ni yii naa, yii na ɓoo vii vɔɔ nungni ye, ing lese yii ɓa. Yĩng shĩng naa a shɔng vɔɔyi yuu, yĩng sɔɔ gangte ke." ¹⁹ A tũmpu ɓe Daayere Yeso shãngshe yii yãa ye ɓe, shɔng too wu a ware wu koolapa a wɔ̃ng a Laa nashang. ²⁰ Wu jaadɔɔyi yii yaa mɔng ɓi a sɔɔ waayãa a mɔng walikãng, aɓe Daayere pele vii shoni ni yini a sɔɔ taseyi wu yãa shãng ni vitaseni ɓe watĩng ni yini.