¹ Njapwa nji shani ya bintemo bya Shaloni, liñanda lya chimbongo. ² Ngwe liñanda akati kamambimbo,ngwe muka chithzemo change akati ka munakathzi kakandondo. ³ Ngwe muti wa apulu akati miti ya mu shwata, ngwe yobe muka chithzemo change ngwe balume baba ndondo. Njitumbama athi lya chimbembethi chendi na kubwaelela kwakama manene nabu shuka bwendi bwapwa bwa kutobala mu kubu makela change. ⁴ Wanjinenele ku njubo ya binyu, na chi mwetho chobe ali yange chapwile chithzemo. ⁵ Njitakemethe na likende lya mithzi ya bushuka bwa binyu naku njonowetha na muti wa ama epalu, omo yange njina thzeye na chithzemo. ⁶ Liboko lyendi lya chimoshwe lili mwithi lya mutwe wange, na liboko lya chilyo linji thzembeleke. ⁷ Njishaka yeni kulithinga, bana babana kathzi bamu Yelusalema, ngwe shonge na bimbambi ba mu mahya, baje kuba kendula chithzemo kubanga achikashakela chikecho babenya. ⁸ Nja thzibi lijwi lya muka chirthzemo change, thziba, ou ali na kwija, ali nakunjalikita helu lya malundu, atumbothzoka helu lya tumalundu twa tundondo. ⁹ Muka chithzemo change napu ngwe shonge nameme naba wamundondond; njubo kenga, nemana kunima ya mbango ya njubo yetu, na kushumbila mu njanena, na kunonoka mu mbengwa. ¹⁰ Muka chithzemo change wendekele kuli yange; muna ngwendi, "Katuka, muka chithzema change; Munakathzi wange umo wa mubwa, tuye amolika nange. ¹¹ Kenga, chithika chinahu; na nyonthzi inahu nakuya inai. ¹² Bintemo binatholoka mu lifuti; thimbu ya kuteja na kwimba kwa tuthzila kuneja, na kwendeka kwa tutela bana chithzibi mu lifuti lyetu. ¹³ Chiti cha mukuyu chashangumuka kwitha mikuyu yacho, na binyu bya shangumuka ku shamuna; na kwana kunika kwa lwengo. Katuka, muka chithzemo change, munakathzi wange umo wamubwa, ija tuye. ¹⁴ Katela kange, uli mu myanthzi ya mamanya, uli mu myanthzi ya buthe buthe bwa mu malundu, echela njithzibe lijwi lyobe, omo lijwi lyobe litobala, na chihanga chobe chachi thzemo." ¹⁵ Tukwatele bimbanje, bimbanje byabi ndondo bije bikabiitha mahya a binyu, omo mahya etu a binyu ali na kushamwina. ¹⁶ Muka chithzemo change, napu wange, cho nange njinapu wobe; ukalitha ma butanga akati ka mañanda na thenga. ¹⁷ Tundako, muka chithzemo change, thimbu kanda litangwa lituuke na chimbeebethi chifumeo. Tundako; pwa ngwe shonge nambe nba wa mundondo waha malundu.