¹ Cho kuma maana ku wekutambekela? Kumani kuthzibithitha kwendi kukatambakana lizwi ² lyendi? Akamwa ya malundu kuyehi na ngila, ha mathambwa angila, Maana anambata bwimano bwendi. ³ Thimbu kanda ete ha bikolo bya kukobela munganda, ha chikolo munganda, walilile nakutambakana. ⁴ "Chili kuli yeni, baanu baje njithana; lijwi lyange linethzila baana babanu. ⁵ Yeni ba kweeba, lilongetheni maana; cho neni bilema, munapande kuthzibithitha bwino. ⁶ Tolilileni, mwafwa njendeka byuma byabibwa, cho munjashama mukanwa kange njendeka byuma bya bibwa. ⁷ Mwafwa kanwa kange kendeka byuma byabuthunga, cho ngechi bubi bwakala chiyobo mu tunwa twange. ⁸ Oshe majwi amukanwa kange akwoloka; mukemo kumwethi akumbilumuna nambe bithinganyeka bya bubi. ⁹ Oshe anapu akwoloka kuli uje munu awa thzibithitha; majwi ange a kwoloka kuli baje boshe baka wanamo mangana. ¹⁰ Baje batambula bilongetha byange batubakana siliba; batambula mangana akutubakana ngolinde. ¹¹ Omu mangana amabwa kutubakana mamanya aseho; kukwethi chuma chachibwa chikapwitha hamo nendi. ¹² Yange, mangana, akuyoya nji muka kunongonona, cho njakala na mangana akusompa kwakubwa. ¹³ Lyoba lyakutewa Yehoba kubanga uthzinde bubi. Yange njathzinda kulyaletha na kulyana bukama, ngila yabubi, na majwi amakuli. Njaba thzinda. ¹⁴ Njili na bukwatho bwabubwa na mangana a mabwa; njinapu waku nanga; bithzili nawa byakala kuli yange. ¹⁵ Hali yange bimyene bakaswana, naba kakuyula bakalinga mashiko aje a mabwa. ¹⁶ Hali yange baana babi myene bakayula, bangulu, na bakusompetha mwamubwa. ¹⁷ Njathzema baje ba njithzema nange, na boshe baje banjitonda yange manene, bakajiwana. ¹⁸ Kuli yange kuli bufuko na kalemetha, bufuko bwa myaka yoshe na kuthungama. ¹⁹ Bushuka bwange bwatubakana ngolinde; nambe ngolinde ije ineti mutuhya; binjikateje binatubakana silba. ²⁰ Njikende mungila ya kusungama, mukati kabingila byabibwa. ²¹ Mwafwa wechi, nja pwithile baje banjithzemene kuswana bufuka; njika shulitha bishete byabo. ²² Yehoba anjitangele mumaputikilo, wakulibanga kukutanga chendi myaka yakutheñulu. ²³ Ku myaka laja oyo kunjakele—kutunda hakilibanga, na nakutunda kumaputukilo a lifuti. ²⁴ Thimbu kanda kukale Kalunga meema, njathemukile laja— thimbu kanda kukale tubwelu bwelu twa meema twa kwandununa binginga bya meema. ²⁵ Thimbu kanda minkinda ikaleko na thimbu kanda malundu bawatumbike mu myela yawo, yange njasemuka laja. ²⁶ Nja themukile kanda Yehoba atange kaye nambe mahya nambe likungu lya kulibanga mu kaye. ²⁷ Kunjakele omu a tangele meelu, omu afundile mufunda hakamwa yakuloba. ²⁸ Kunjakele omu atangele mashelwa mwilu na mwilu na mwilu na tubwelu bwelu twa meema aluloba. ²⁹ Kunjakele omu akele nginga ya Kalunga ndonga, cho meema kethi ajalele kutubakana lishiko lyendi, nomu akele nginga ya lubula lwa kaye. ³⁰ Njakele nendi, ngwe muka kushonga wabutongwe; njakele njinakumuthzibitha kubwaha hatangwa hatangwa, kubwahelela thimbu yoshe. ³¹ Njakele na kubwahelela mu kaye kendi koshe, cho kubwahelela change chakele mu baana ba lifuti. ³² Cho bana bange, njitolilileni, boshe baje banyunga bingila byange ba kupwa baku bethzika. ³³ Tolilileni bilongetha byange mukale na maana kethi mulimbunune. ³⁴ Woshe owo anjitolilila akakala wakubethzika. Akakala na kukenga ha litangwa ha litangwa ku chikolo change, kubandamena nendi bitumo hachikolo change. ³⁵ Owo woshe akanjiwana ha myaka yoshe, akawana mwonyo, cho lalo akawana kubethzika cha Yehoba. ³⁶ Oloni uje woshe akahona, akababaletha mwonyo wendi; boshe baje banjithzinda yange bathsema kutsa."