¹ Ngechi mwa meema a kukonda muthimbu ya nyonthzi nambe nyonthzi a thimbu ya kuteja, mukemo chinapu na chilema katelele kathingimiko. ² Ngwe omu kantzilili a ka pekumuka cho na ndeba omu a ka thangumuka mu ba kapulula, mukemwo muchili na chithingo kuchatha kukwata munu wa kweneka mulonga. ³ Chibathzi cha pandama ku mulumbi , mikole ya pandama ku kabalu cho ngechi chibantzi cha kupupa a mwonyo ya balumbi. ⁴ Kethi ukumbulule mulumbi kwetheketha na bulumbi bwendi, kutewa ufwa ngwe ikeye. ⁵ Kumbulula mulumbi kuya mu bulumbi bwendi, mangana kethi a limone ngwendi ali na maana. ⁶ Woshe owo a tuma lijwi kupangetha mulumbi a batule mendi endi na kuli thanena bukalu. ⁷ Chithimo cha kutunda mukanwa ka balumbi, chili ngwe mendi a munu wa kalepa ali na kujejela. ⁸ Kwana kathingimiko ku mulumbu chili ngwe kukutilila limanya ku chipapa cha kenya. ⁹ Chithimo chakutunda mukanwa ka balumbi, chili ngwe mungonga uje u kobela mu liboko lya muka kupenda. ¹⁰ Uje woshe a lanya mulumbi nambe a lanya ali woshe ali na kwita mungila, ali ngwe munu ali na buta bwa mingamba cho a betwetha boshe ba muthzengeleka. ¹¹ Ngechi katali mwa kelukila ku bishanjo byendi, chimo lika na mulumbi ou elukilao kulinga bubi. ¹² Ushaka kumona munu a kalimono ibenya ngwendi ali na maana? Kuli kutalelela chakama cha mulumbi ku mu tubakana. ¹³ Munu wa mulwa a kendeka ngwendi, "Mutapalo muli ndumba! Muli ndumba mukati ka bingila!" ¹⁴ Ngwe omu chiñalamba cha lipito chikende a bikete byacho, chimo lika na munu wa mulwa a kalumuka a mwela wendi. ¹⁵ Mulwa a kaaka liboko lyendi mu lilonga oloni kethi na binthzili bya kujundula liboko na kwaka bya kulya mukanwa kendi. ¹⁶ Munu wa mulwa a ka lithzibi kukala na maana kutubakana banalume babali ba maana. ¹⁷ Uje umo a kwata ku matwi a katali napu ngwe munu uje alitila mungila cho a lubala na kukobela mu biñanda bije ku bya mupandamene. ¹⁸ Ngwe munu wa kuthzaluka a uje a shaanga ndundu katete, mikili, na kuthsa napu ngwe munu a kwitha ¹⁹ uje ya lyaya nendi na kwendeka ngwendi, "Kunjakele na kulinga lika sanda?" ²⁰ Kwakweneka bitale, tuya tuthzima; cho kwa kweneka lufwe, kulijokota kuchikalako. ²¹ Ngwe omu manungu a na pandama ku manungu a kwenyeka na tuya cho na bikuni bi na pandama ku tuya, cho muchifwa chimo bene na uje munu wa kanwa a ka shanumuna bimata. ²² Majwi a munu wa lufwe ali ngwe bungululu bwa ku nikila bwino; aka kobela mu bilama bya mukati ka mubila. ²³ Ngechi mwa ngilasi iba na fwiki a ndeho ya buma, chimo lika na majwi a chibembulu na mbunge ya bubi. ²⁴ Ou wathzinda bakwabo a ka shweke bithinganyeka byendi na tunwa twendi cho a ka tulika makuli mukati kendi. ²⁵ Endeka na ngothzi, oloni kethi mu mukulaele, mwafwa kuli biyobo bitanu na bibali mumbunge yendi. ²⁶ Nameme chithzindo chendi china banda mu makuli, bubi bwendi buka sholoka a kuliwana. ²⁷ Woshe owo ainda bwina a ka wilamo ibenya cho lalo limanya likelukila uje na lithindika. ²⁸ Lilimi lya makuli lika nthzindi baje banu likabulumuna cho kanwa kaka lenge kakanene kunyonga.