¹ A litangwa lije batandele mu mukanda wa Mosesa oku banu bali nakuthzibilila. Bachi wanene banichithono ngwabo kukwethi baka Amoniti nameme baka Moabu banapande kwija mu chikungulwilo cha Njambi myaka yoshe. ² Cho chakele mwafwa kubethzile kuli banu bamu Isalela na likende na mema embwe, choni balanyene Mbalamu kuka shangumuna ba Isalela. Nameme ngocho Njambi yetu watengulwile kushangumuna kupwa kukwithula. ³ Uje bene bathzilile lithiko, balyangunwine kutunda kuli metandinda abanu boshe. ⁴ Cho thimbu kanda ou Eliyashimbu kapilisitu ba mwangwile akati kabibatulo bya kunyungilamo bitenga byamu njubo ya Njambi yetu. Cho walithzibathenene na Tombiya. ⁵ Eliyashimbu wabwahethelele Tombiya chibatulo chakama manene chakutulikila, kuje bakele nakutulikila laja binona bya milambu, ya kunika mwa mubwa, bitenga bya bibwa, bitenga bya bunga, binona bya chimo kulikumi, binyu bya bihya, na mathzi, aje abakambeyeye kupwa abaka Lebiti, baka kwimba, baka kunyunga kubikolo, na mukungwiya waba tupilisitu. ⁶ Oloni mubithimbu byoshe ebi kunjakele mu Yelusalema embwe, Cho mu mwaka wa mumakumi atatu naibali mu bumwene bwa Alitashashe wamu Mbambiloni njaile kuli mwene, Anima yathimbu bimo njalombele kuli mwene kwiluka, ⁷ cho njelukile ku Yelusalema. Njemanene ha bubi buje Eliyashimbu walingile mukwana Tombiya chibatulo cha njubo muthzango ya milonga ya njubo ya Njambi. ⁸ Echi chanjibabalethele cho njombilile anja bitenga bya Tombiya kubitunditha muchibatulo cha njubo ya kutulikila bitenga. ⁹ Cho njabakambeyeye ngwange ba jelethe mubibatulo bya kutulikila bitenga, cho njelwithilemo bitenga bya mu njubo ya Njambi, binona bya milambu na bya kunika. ¹⁰ Njathzubukile ngwange ba Lebiti kuba banene chela chabo embwe, cho batewele, ou kulihya lyendi ou kulihya lyendi, ba Lebiti na bakakwimba baje balingile chipangi. ¹¹ Cho njabatenukilile bakulunu babipangi na kwendeka ngwange, "Bikajo munechelele njubo ya Njambi?" Njaba kungulwilile amolika na kubaka abyela byabo. ¹² Cho ba Yunda boshe banenele chimo kulikumi cha binona, binyu bya bihya na mathzi a olyu kubishete. ¹³ Cho njangwile wa kunyunga akati kabishete Shelemiya kapilisitu na Zandoki mukakuthona, wakutunda kuli ba Lebiti, Pendaiya. Watelele kuli bakebo wapwile Hanani mwana wa munalume wa Mataniya, omo baba labele kupwa ngwe buthunga. Bipangi byabo byapwile wakulipangethela byuma mwa mubwa akati kabo. ¹⁴ Njanuke, Njambi yange, hali echi, cho kethi muthzimangane byuma bya bibwa buje njinalingi ku njubo ya Njambi yange na bipangi byabo. ¹⁵ Muma tangwa aje njamwene mu Yunda banu balyatangela chakukamwinamo binyu a Sabata nakunena mitumbo ya binona na kubilonga abi muli, cho lalo binyu, bingelepu, mikuyu, na byuma byoshe bya bitele byakulithethzathethza, bije biba nenele mu Yelusalema alitangwa lya Sabata. Njaba tenukilile kulandetha bya kulya alitangwa lije. ¹⁶ Cho banu bakutunda ku Taya bayoyela mu Yelusalema banenele bithi na bya kulya byoshe bya kuli thethzathethza, cho babilandethele alitangwa lya Sabata ku banu bamu Yunda na mu binganda! ¹⁷ Cho njaba tenukilile bakulunu babo ngwange, "Bikajo mulinakulingila echi chabubi, chakulithzilulula litangwa lya Sabata? ¹⁸ Kethi baishweni balingile echi lalo? Njambi yetu kanenele obu bubi ali yetu na munganda inondi? Ololo muli nakunena bukalu bwakama manene ali Isalela mukuthzilulula Sabata." ¹⁹ Ajebene kwakele lithuthulungu kuchikolo cha Yelusalema thimbu Sabata yete, njakambeyeye ngwange bikolo babishoke cho kethi bipwe bya kushoka embwe kubanga anima ya Sabata. ²⁰ Cho bakulandetha nabakakulandulula byoshe bya kulithethzathethza balikungulwile anja ya Yelusalema lumo nameme lubali. ²¹ Olojo njabatenukilile ngwange," Bikajo mwalikungulwila anja ya mbango ya njubo? Ngwe mulingamo lalo, cho njikakambeka maboko ali yeni!" Kutunda athimbu ije kubethzile ku Sabata embwe. ²² Cho njakambeyeye ba Lebiti kuli jeletha bakebo babenya, na kwija na kunyunga bikolo, cho alitangwa lya Sabata lipwe lyakuthzila. Njanukeni ali echi lalo Njambi yange, na kukala na ng'eke ali yange mwafwa wachikumiiyo cha ng'eke chiuli nacho ali yange. ²³ Mumatangwa aje njamwene ba Yundeya baje bambatele banakathzi baku Ashindondi, Amoni, na Moambu. ²⁴ Chitika chimo cha bana babo bendekele ndakwithzi ya baka Ashindondi. Naumo wai muli bakebo wendekele ndakwithzi yaba Yunda, oloni kubanga ndakwithzi ya banu bakwabo. ²⁵ Cho njabatenukilile, na kubathinga, cho nja pupile bamo na kuba shuta bing'ambu byabo. Njabalingithile kulithinga kuli Njambi, nakwendeka ngwange, "Kumukatha kukana bana beni babanakathzi kuli bana beni babanalume, nameme kutwala bana babo babanakathzi kuli bana beni babanalume, nameme kuli yeni babenya. ²⁶ Kethi Solomoni mwene waba Isalela wabulumwine bubi akati kaba banakathzi ndi? Akati kamiyati yaingi kukwakele mwene ngwe ikeye, cho bamuthzangele kuli Njambi yendi, na Njambi wamupangele kupwa mwene ali ba Isalela boshe. Nameme ngocho, banakathzi bendi ba miyati yeka bamulingithile bubi. ²⁷ Choni kumani tunapande kuthzibilila kuli yobe nakulinga obu bubi bwakama manene na kulinga chakujeneka kukulaela kuli Njambi yetu mukwambata banakathzi ba miyati yeka?" ²⁸ Mwana umo wa munalume wa Joiyanda mwana wa munalume wa Eliyashimbu wapwile ishemweno- ya Sanimbalati muka Holoniti. Nameme ngocho njamushekele na kutunda ku mesho ange. ²⁹ Banuke Njambi yange, mwafwa banashaula bu pilisitu, na chikimiiiiyo cha bupilisiti na baka Lebiti. ³¹ Mukemo njaba bwahethele kutunda ku byuma byoshe ya miyati yeka naku bangwila bipangi ba tupilisitu naba Lebiti, ou nabyendi ou nabyendi. ³⁰ Njathungamethele mulambu wa mabaya a thimbu ibangwile bushuka bwa kulibanga. Njanukeni, Njambi yange nakunjilingila bya bibwa.