¹ Ukufuma kuli ba cilolo ukuya ku mwanike uwa salilwe ne bana bakwe, uwu ntemenwe mu cine-kabili tepalwandi nenka, sombi nakuli bo bonse abeshibikile ² bucine-Pamulando wa cine icili muli fwebo kabili cikaba nafwebo umuyayaya. ³ Uluse, inkumbu ne cibote cikaba nafwebo ukufuma kuli ba Lesa ba Wishifwe nakuli Yesu Kilisitu, umwana umwalalume waba Wishi, mu cine ne butemwe. ⁴ Ndi ne nsangalashi ishikulu pa kusanga abana bobe balu kwenda mu cine, koti fintu twapokelele ili funde kuli ba Wishifwe. ⁵ Pano ndikupapata na mwebo, we mwanankashi-tacilipo ati naku lembela webo ifunde lya bukumu, sombi ni lyelyo ili twakwete ukufuma ku kutatika ukweba ati umo ne mubyakwe. ⁶ Ubu ebu temwe, ubu tulingile ukwendemo ukulingana ne mafunde. Ili efunde, koti fintu mwa umfwile ku citati, ukweba ati mungenda muli lyo. ⁷ Pakuti aba kutumpaika abengi balile mu calo, sombi taba suminepo ukweba ati Yesu Kilisitu alishile mu munefu. Aba eba kutumpaika naba mukana Kilisitu. ⁸ Li cecenteni, ukweba ati mwilufiya ifintu ifi binse twabombele, sombi ati mungapoka iclambu icikumanine. ⁹ Uyo onse uwa twalilila ne kubula ukwikala mu bu sambishi bwaba Kilisitu takwetepo ba Lesa. uyo uwikalilila mubu sambishi, uyu alikwete ba wishi ne mwana. ¹⁰ Kani umuntu umbi aisa webo ne kubula ukuleta ubusambishi ubu, teku mupokelelapo mu nga'nda yobe kabili teku muposhapo. ¹¹ Onse uyo uwamuposha apintamo ulubali muficitwa fyakwe ifibipile. ¹² Ndine fingi ifyaku mwebeni mwebo, sombi nshafwaile ukulembe pa bula ne cilembelo. Nangabefyo, ndi kucetekela ukwisa kuli mwebo ne kulabila nenu icinso ne cinso ukweba ati insangalashi shesu shinga shiila. ¹³ Abana bankashi yobe iya salilwe ba kuposha.