¹ Pano ukulinga ne mpindi ne mpindi yaiko, mwebakwasu tacilingilepo kuli mwebo ukulukufwailisha ifintu ifitalembelwepo kuli mwebo. ² Pakuti mwebo mwebene mulishi bwino ukwebati ubushiku bwakwaShikulu bulukwisa koti ni kabwalala alukwisa pampindi ya bushiku. ³ Ili balabila ati, ''Umutende nekulisunga,'' pano ukupumikisha kwa bonaushi kukesa pali boo. Cikaboneka koti kukalipwa kwakwa nyinefwe uuli pabukulu. Tabakabonapo nenshilaiyaku fyukilamo. ⁴ Sombi mwebo, mwebakwasu, tamulipo mu mfifi iya kwebati bulya bushiku ili bukesa tabukamucilishenipo koti nikabwalala. ⁵ Pakuti mwebo muli bana abaswetele ne kuba abana bakasuba. Tatulipo abana ba mubushiku neli abamufifi. ⁶ Pakuti pano, tatulingilepo ukulala koti nififilya ificita bonse. Mucifulo, ngatulame nekulola nekuteka imitima. ⁷ Pakuti kuli babo abalalapampindi yabushiku, nakuli babo abakolwa pampindi ya bushiku. ⁸ Sombi fwebo tuli kubushiku bulya, tuli lingile ukuikala abafuuke nekutetekela ne kutemwa koti ningabo yapacifuba, nebucetekelo bwepusukilo koti cakulicikila ku mutwi. ⁹ Pakuti Lesa tatusontelepo ukuba abkali, sombi ukukwate ipusukilo ukupitila muli Shikulu Yesu Klistu. ¹⁰ Niye uuwatufwilile pakwebati ili tuli abalole neli abalele, tulingile ukwikala na kwe. ¹¹ Nipali fifyo sangala sashansheni umo ne mubyakwe ne kukulama umo ne mubyakwe koti fintu mulukucita mukutwalilila. ¹² Twamwipusheni, mwebakwasu, ukwibukishako abo abamupyungila nabo pamo nababo abamucilileli mulishikulu nabo abamukonkomesheni. ¹³ Twamwipusheni ukukombetela apakulu mukutemwa pakuti umulimo uuweme. Beni ne mutende pakati kenu mwense. ¹⁴ Twamukoselesheni, mwebakwasu: Sopesheni abaline cimfulunganya, mukoseleshe nebanakukile, nekofweleshako abanakile, mube abtekenye pali bonse. ¹⁵ Boneni ukwebati takupo neli umo uwabwesesha ububi pa bubi kuli bonse. Mucifulo citeni iciweme kuli umo ne mubyakwe na kuli bonse. ¹⁶ Sangalaleni impindi yonse. ¹⁷ Tembeleni ukwabula ukuleka. ¹⁸ Mufintu fyonse peleni ukutota, pakuti ubu ebufwayo bwaba Lesa muli Yesu Klistu kuli fweboo. ¹⁹ Tekwesha ukufulunganya uumupashi. ²⁰ Tekwesha ukulingulula ubusesemo. ²¹ Esheni ifintu fyonse. Ikatilileni kufintu ifiweme. ²² Talukeni kuli fyonse fintu ifibipile. ²³ Lekeni ba Lesa bamulengeni ukuba abaswetele. Lekeni umupanshi, ne mweo, ne mibili ibe icingililwe ukwabula akalema pakwisa kwakwa Shikulu Yesu Klistu. ²⁴ Icine cilikuli uyo uwamwitileni. Uyo ukacita fyonse. ²⁵ Mwebakukwasu tutembeleniko nafwebo. ²⁶ Sekeleni abakwasu mukufyompana ukuswetele. ²⁷ Namubuleni muli Shikulu ukwebati iyii nkalata iipendelwe kuba kwasu bonse. ²⁸ Lekeni uluse lwaba Shikulu ba Yesu lube na mwebo.